Hum se Abdan ne bayan kiya, kaha hum se Abdullah ne bayan kiya, kaha hum ko Shuba ne khabar di, unhein Saad Bin Ibrahim ne, un se in ke walid Ibrahim ne ke (in ke walid) Abdur Rahman Bin Auf Radi Allahu Anhu ke pas khana laya gaya. Aur wo roze se thay to unhon ne kaha, Musab Bin Umair Radi Allahu Anhu (Uhud ki jung mein) shaheed kar diye gaye, wo mujh se afzal aur behtar thay lekin unhein jis chadar ka kafan diya gaya (wo itni chhoti thi ke) agar is se in ka sar chupaya jata to paon khul jate aur paon chupaye jate to sar khul jata tha. Mera khayal hai ke unhon ne kaha aur Hamza Radi Allahu Anhu bhi (isi jung mein) shaheed kiye gaye, wo mujh se behtar aur afzal thay. Phir jaisa ke tum dekh rahe ho, hamare liye duniya mein kushadagi di gayi ya unhon ne ye kaha ke phir jaisa ke tum dekhte ho, humein duniya di gayi, humein to is ka darr hai ke kahin yahi hamari nekyon ka badla na ho jo isi duniya mein humein diya ja raha hai. Is ke baad Aap roye ke khana na kha sake
.

Hum se Ahmad bin Muhammad Makki ne byaan kiya ‘ kaha ke hum se Ibrahim bin Saad ne ‘ un se un ke baap Saad ne aur un se un ke waalid Ibrahim bin Abdur Rahman ne byaan kiya ke Abdur Rahman bin Awf razi Allahu anhu ke saamne ek din khana rakkha gaya to unhon ne farmaya ke Musab bin Umair razi Allahu anhu (Ghazwa-e-Uhud mein) shaheed huay ‘ woh mujh se afzal thay . Lekin un ke kafan ke liye ek chadar ke siwa aur koi cheez muhayya na ho saki . Isi tarah jab Hamza razi Allahu anhu shaheed huay ya kisi doosre sahabi ka naam liya ‘ woh bhi mujh se afzal thay . Lekin un ke kafan ke liye bhi sirf ek hi chadar mil saki . Mujhe to dar lagta hai ke kahin aisa na ho ke hamare chain aur aaram ke saman hum ko jaldi se dunya hi mein de diye gaye hon phir woh rone lage .