Hum se Ahmad ne bayan kiya jo Salih ke bete hain, kaha hum se Anbasah Ibn Khalid ne bayan kiya, un se Yunus Bin Yezid ne bayan kiya aur un se Ibn Shihab ne bayan kiya ke phir mein ne Husain Bin Muhammad Ansari se jo Bani Salim ke shareef logon mein se thay, Mahmud Bin Rubai ki hadees ke mutaliq poocha jis ki riwayat unhon ne Utban Bin Malik Radi Allahu Anhu se ki thi to unhon ne bhi is ki tasdeeq ki
.

Hum se Abdullah bin Maslama Qanabi ne bayan kiya , unhon ne kaha hum se Ibrahim bin Saad ne Ibn Shihab ke wastay se bayan kiya , unhon ne Mahmood bin Rabia se unhon ne Itban bin Malik se jo nabina thay ke Nabi Karim salla Allahu alaihi wa sallam un ke ghar tashreef laye . Aap salla Allahu alaihi wa sallam ne poocha ke tum apne ghar mein kahan pasand karte ho ke tumhare liye namaz parhun . Itban ne bayan kiya ke mein ne ek jagah ki taraf ishara kiya . Phir Nabi Karim salla Allahu alaihi wa sallam ne takbeer kahi aur hum ne aap salla Allahu alaihi wa sallam ke peechay saff bandhi phir aap salla Allahu alaihi wa sallam ne do rakat namaz nafl parhayi .