Hum se Amr bin Khalid ne bayan kiya, unhon ne kaha hum se Zubair ne bayan kiya, unhon ne kaha hum se Abu Ishaaq ne bayan kiya, un ko Bara bin Aazib Radhiallahu Anhu ne khabar di ke Rasoolullah Sallallahu Alaihi Wasallam jab Madinah tashreef laaye to pehle apni nanihaal mein utre, jo ansaar the. Aur wahaan Aap Sallallahu Alaihi Wasallam ne solah ya sattrah maah Bait-ul-Muqaddas ki taraf munh kar ke namaz padhi aur Aap Sallallahu Alaihi Wasallam ki khwahish thi ke aap ka qibla Baitullah ki taraf ho (jab Baitullah ki taraf namaz padhne ka hukm ho gaya) to sab se pehli namaz jo Aap Sallallahu Alaihi Wasallam ne Baitullah ki taraf padhi Asr ki namaz thi. Wahaan Aap Sallallahu Alaihi Wasallam ke saath logon ne bhi namaz padhi, phir Aap ke saath namaz padhne waalon mein se ek aadmi nikla aur us ka masjid (Bani Haarisa) ki taraf guzar huwa to woh log Ruku’ mein the. Woh bola ke main Allah ki gawaahi deta hun ke main ne Rasoolullah Sallallahu Alaihi Wasallam ke saath Makkah ki taraf munh kar ke namaz padhi hai. (Yeh sun kar) woh log usi haalat mein Baitullah ki taraf ghoom gaye aur jab Rasoolullah Sallallahu Alaihi Wasallam Bait-ul-Muqaddas ki taraf munh kar ke namaz padha karte the, yahood aur Isaayi khush hote the Magar jab Aap Sallallahu Alaihi Wasallam ne Baitullah ki taraf munh phair liya to unhein yeh amr na-gawaar huwa. Zubair (ek rawi) kehte hain ke hum se Abu Ishaaq ne Bara se yeh Hadees bhi naql ki hai ke qibla ki tabdeeli se pehle kuch musalmaan inteqaal kar chuke the. To hamein yeh ma’loom na ho saka ke un ki namaazon ke baare mein kya kahen. Tab Allah ne yeh Aayat naazil ki «وَمَا كَانَ اللَّهُ لِيُضِيعَ إِيمَانَكُمْ» (Al-Baqrah: 143).

Hum se Abdullah bin Rajaa ne bayan kiya, unhon ne kaha hum se Israil bin Yunus ne bayan kiya, kaha unhon ne Abu Ishaq se bayan kiya, kaha unhon ne Bara bin Aazib Razi Allah Anhuma se ke Nabi Kareem Sallallahu Alaihi Wasallam ne solah ya satrah mah tak Bait-ul-Muqaddas ki taraf munh kar ke namazin padhein aur Rasool Sallallahu Alaihi Wasallam (dil se) chahte thay ke Kaaba ki taraf munh kar ke namaz padhein. Aakhir Allah Ta’ala ne yeh ayat nazil farmayi ” Hum Aap ka aasman ki taraf baar baar chehra uthana dekhte hain. Phir Aap ne Kaaba ki taraf munh kar liya aur ahmaqon ne jo Yahudi thay kehna shuru kiya ke unhein agle qibla se kis cheez ne pher diya. Aap farma dijiye ke Allah hi ki milkiyat hai mashriq aur maghrib, Allah jis ko chahta hai seedhe raste ki hidayat kar deta hai. “ (Jab qibla badla to) ek shakhs ne Nabi Kareem Sallallahu Alaihi Wasallam ke sath namaz padhi phir namaz ke baad woh chala aur Ansar ki ek jamaat par is ka guzar hua jo asr ki namaz Bait-ul-Muqaddas ki taraf munh kar ke padh rahe thay. Is shakhs ne kaha ke main gawahi deta hoon ke main ne Nabi Kareem Sallallahu Alaihi Wasallam ke sath woh namaz padhi hai jis mein Aap ne maujooda qibla (Kaaba) ki taraf munh kar ke namaz padhi hai. Phir woh jamaat (namaz ki halat mein hi) mud gayi aur Kaaba ki taraf munh kar liya.

Hum se Abu Nuaym ne bayan kiya , kaha main ne Zuhair se suna , unhone Abu Ishaq se aur unhone Bara bin Azib rz se ke Rasool Allah صلی اللہ علیہ وسلم ne Baitul Muqaddas ki taraf rukh kar ke sola ya satra mahine tak namaz parhi lekin aap chahte thay ke aap ka qibla Baitullah (Kaaba) ho jaye (aakhir ek din Allah ke hukm se) aap ne asr ki namaz (Baitullah ki taraf rukh kar ke) parhi aur aap ke sath bohat se Sahaba rz ne bhi parhi . Jin Sahaba ne yeh namaz aap ke sath parhi thi , in mein se ek Sahabi Madinah ki ek masjid ke qareeb se guzre . Is masjid mein log ruku mein thay , unhone is par kaha ke main Allah ka naam le kar gawahi deta hoon ke main ne Rasool Allah صلی اللہ علیہ وسلم ke sath Makkah ki taraf munh kar ke namaz parhi hai , tamam namazi isi halat mein Baitullah ki taraf phir gaye . Is ke baad logon ne kaha ke jo log Kaaba ke qibla hone se pehle intiqal kar gaye , un ke mutaliq hum kya kahein . (in ki namazen qabool huin ya nahi ?) Is par yeh ayat nazil hui «Wa Ma Kanallahu Liyuzia Imanakum Innallaha Binnasi Lara'ufun Raheem» ”Allah aisa nahi ke tumhari ibadat ko zaya kare , beshak Allah apne bandon par bohat bara meharban aur bara Raheem hai .“

Hum se Muhammad bin Musanna ne bayan kiya , unhone kaha hum se Yahya ne bayan kiya , un se Sufyan ne , un se Abu Ishaq ne bayan kiya , kaha ke main ne Bara bin Azib rz se suna , unhone bayan kiya ke hum ne Nabi Kareem صلی اللہ علیہ وسلم ke sath sola ya satra mahine tak Baitul Muqaddas ki taraf munh kar ke namaz parhi . Phir Allah Ta'ala ne humein Kaaba ki taraf munh karne ka hukm diya .

`Hum se Yahya bin Musa Balkhi ne bayan kiya, kaha hum se Wakee bin Jarrah ne bayan kiya, un se Israil bin Yunus ne, un se Abu Ishaq Sabi'i ne aur un se Bara bin Azib Radi Allahu Anhu ne bayan kiya ke jab Rasul Allah صلی اللہ علیہ وسلم Madinah tashreef laye to Aap sola ya satra mahine tak Bait-ul-Muqaddas ki taraf munh kar ke namaz parhte rahe lekin Aap ki aarzu thi ke Ka'ba ki taraf munh kar ke namaz parhein. Phir Allah Ta'ala ne (Surah al-Baqarah mein) yeh ayat nazil ki «Qad nara taqalluba wajhika fis-sama'i falanu-walliyannaka qiblatan tarzaha» ”Hum Aap ke munh ke baar baar aasman ki taraf uthne ko dekhte hain, an-qareeb Hum Aap ko munh ko is qibla ki taraf pher dein ge jis se Aap khush hon ge.“ Chunancha rukh Ka'ba ki taraf kar diya gaya. Ek sahab ne asr ki namaz Nabi Kareem صلی اللہ علیہ وسلم ke saath parhi, phir wo Madinah se nikal kar Ansar ki ek jamaat tak pahunche aur kaha ke wo gawahi dete hain ke unhon ne Nabi Kareem صلی اللہ علیہ وسلم ke saath namaz parhi hai aur Ka'ba ki taraf munh karne ka hukm ho gaya hai chunancha sab log Ka'ba rukh ho gaye halanke wo asr ki namaz ke ruku mein thay.