Hum se Ahmad Bin Abi Raja ne bayan kiya, kaha hum se Nazr ne bayan kiya, kaha un se Hisham ne, un se Ikrimah ne aur un se Ibn Abbas Radi Allahu Anhuma ne bayan kiya ke jab Rasul Allah Sallallahu Alaihi Wasallam ki umr chalees saal ki hui to Aap Sallallahu Alaihi Wasallam par wahyi nazil hui. Is ke baad Nabi Kareem Sallallahu Alaihi Wasallam tera saal Makkah Mukarramah mein rahe phir Aap Sallallahu Alaihi Wasallam ko hijrat ka hukm hua aur Aap Madinah Munawwarah hijrat kar ke chale gaye. Wahan das saal rahe phir Aap ne wafat farmai is hisab se Aap ki kul umr shareef taresath saal hoti hai aur yahi sahih hai
.

Mujh se Zakariya Bin Yahya ne bayan kiya, kaha hum se Abdullah Bin Numair ne bayan kiya, kaha ke Hisham ne bayan kiya ke unhein un ke walid ne khabar di aur unhein Aisha Radi Allahu Anha ne ke Saad Bin Muaz Radi Allahu Anhu ne kaha ke ay Allah! Tu janta hai ke is se zyada mujhe aur koi cheez pasandida nahi ke tere raste mein, mein is qaum se jihad karoon jis ne tere rasool Sallallahu Alaihi Wasallam ki takzeeb ki aur unhein (un ke watan Makkah se) nikala. Ay Allah! Lekin aisa maloom hota hai ke tu ne hamare aur un ke darmiyan larai ka silsila khatam kar diya hai. Aur Aban Bin Yezid ne bayan kiya, un se Hisham ne bayan kiya, un se un ke walid ne aur unhein Aisha Radi Allahu Anha ne khabar di ke (ye alfaz Saad Radi Allahu Anhu farmate thay) «Min qaumin kazzabu nabiyyaka wa akhrajoohu min Quraishin.» Yani jinhon ne tere rasool Sallallahu Alaihi Wasallam ko jhutlaya, bahar nikal diya. Is se Quraish ke kafir murad hain
.

Hum se Matar Bin Fazl ne bayan kiya, kaha hum se Rooh ne bayan kiya, un se Hisham ne bayan kiya, un se Ikrimah ne bayan kiya aur un se Abdullah Bin Abbas Radi Allahu Anhuma ne bayan kiya ke Nabi Kareem Sallallahu Alaihi Wasallam ko chalees saal ki umr mein rasool banaya gaya tha. Phir Aap Sallallahu Alaihi Wasallam par Makkah Mukarramah mein tera saal tak wahyi aati rahi is ke baad aap ko hijrat ka hukm hua aur aap ne hijrat ki halat mein das saal guzare. (Madinah mein) jab aap ki wafat hui to aap ki umr taresath saal ki thi
.

Mujh se Matar Bin Fazl ne bayan kiya, kaha hum se Rooh Bin Ubadah ne bayan kiya, kaha hum se Zakariya Bin Ishaq ne bayan kiya, un se Amr Bin Dinar ne aur un se Ibn Abbas Radi Allahu Anhuma ne bayan kiya ke Rasul Allah Sallallahu Alaihi Wasallam ne nubuwat ke baad Makkah mein tera saal qiyam kiya aur jab aap Sallallahu Alaihi Wasallam ki wafat hui to aap ki umr taresath saal ki thi
.

Hum se Abu Naeem ne byaan kiya , kaha hum se Shayban bin Abdur Rahman ne byaan kiya , un se Yahya bin Abi Kaseer ne , un se Abu Salamah bin Abdur Rahman ne aur un se Aisha aur Ibn Abbas razi Allahu anhum ne ke Nabi Karim salla Allahu alaihi wasallam ne (basat ke baad) Makkah mein das saal tak qiyam kiya . Jis mein Aap salla Allahu alaihi wasallam par wahi nazil hoti rahi aur Madinah mein bhi das saal tak Aap ka qiyam raha .

Hum se Abdullah bin Musa ne byaan kiya , un se Shayban bin Abdur Rahman ne , un se Yahya bin Kaseer ne , un se Salma bin Abdur Rahman bin Auf ne byaan kiya ke mujhko Aisha , Abdullah aur Ibn Abbas razi Allahu anhum ne khabar di ke Nabi salla Allahu alaihi wasallam Makkah mein das saal rahe aur Quran nazil hota raha aur Madinah mein bhi das saal tak rahe aur Aap salla Allahu alaihi wasallam par wahan bhi Quran nazil hota raha .