Mujh se Muhammad ne bayan kiya, kaha hum ko khabar di Abdah ne, unhein Hisham Bin Urwah ne, un se un ke walid ne bayan kiya ke mein ne Abdullah Bin Jafar se suna, unhon ne bayan kiya ke mein ne Ali Radi Allahu Anhu se suna, unhon ne bayan kiya ke mein ne Rasul Allah Sallallahu Alaihi Wasallam se suna aap ne farmaya (doosri sanad) aur mujh se Sadaqah ne bayan kiya, kaha hum ko Abdah ne khabar di, unhein Hisham ne un se un ke walid ne bayan kiya ke mein ne Abdullah Bin Jafar se suna unhon ne Ali Radi Allahu Anhu se ke Nabi Kareem Sallallahu Alaihi Wasallam ne farmaya " (apne zamane mein) Maryam Alaihas Salam sab se afzal aurat theen aur (is ummat mein) Khadijah (Radi Allahu Anha) sab se afzal hain. "
.

Mujh se Ahmad Bin Abi Rajaa ne bayan kiya kaha hum se Nazr ne bayan kiya un se Hisham kaha ke mujhe mere walid ne khabar di kaha ke mein ne Abdullah Bin Jafar se suna kaha ke mein ne Ali (Radi Allahu Anhu) se suna aap ne bayan kiya ke mein ne Nabi Kareem (Sallallahu Alaihi Wasallam) se suna aap (Sallallahu Alaihi Wasallam) farma rahe thay ke Maryam Bint-e-Imran (apne zamana mein) sab se behtareen khatoon thien aur is ummat ki sab se behtareen khatoon Khadija hain (Radi Allahu Anha)