Hum se Ishaq ne bayan kiya, unhon ne kaha hum se Abdus Samad ne bayan kiya, unhon ne kaha hum se Shuba ne bayan kiya ke hum se Qatadah ne bayan kiya, unhon ne kaha mein ne Anas Bin Malik Radi Allahu Anhu se suna ke Abu Usaid Radi Allahu Anhu ne bayan kiya ke Nabi Kareem Sallallahu Alaihi Wasallam ne farmaya " Ansar ka behtareen gharana Banu Najjar ka gharana hai, phir Banu Abdul Ashhal ka, phir Banu Abdul Haris ka, phir Banu Saidah ka aur khair Ansar ke tamam gharanon mein hai. Saad Bin Ubadah Radi Allahu Anhu ne kaha aur wo Islam qabool karne mein bari qadamat rakhte thay ke mera khayal hai, Nabi Kareem Sallallahu Alaihi Wasallam ne hum par doosron ko fazilat de di hai, un se kaha gaya ke Nabi Kareem Sallallahu Alaihi Wasallam ne tum ko bhi to bahut se logon par fazilat di hai (itiraz ki kya baat hai)
.

Mujh se Muhammad Bin Bashar ne bayan kiya, kaha hum se Ghundar ne bayan kiya, kaha hum se Shuba ne bayan kiya, kaha ke mein ne Qatadah se suna, un se Anas Bin Malik Radi Allahu Anhu ne bayan kiya aur un se Abu Usaid Radi Allahu Anhu ne bayan kiya ke Nabi Kareem Sallallahu Alaihi Wasallam ne farmaya " Banu Najjar ka gharana Ansar mein se sab se behtar gharana hai phir Banu Abdul Ashhal ka, phir Banu-al-Haris Bin Khazraj ka, phir Banu Saidah Bin Ka'b Bin Khazraj Akbar ka, jo Aus ka bhai tha, Khazraj Akbar aur Aus dono Harisah ke bete thay aur Ansar ka har gharana umdah hi hai. Saad Bin Ubadah Radi Allahu Anhu ne kaha ke mera khayal hai ke Nabi Kareem Sallallahu Alaihi Wasallam ne Ansar ke kai qabailon ko hum par fazilat di hai, un se kisi ne kaha tujh ko bhi to bahut se qabailon par aap Sallallahu Alaihi Wasallam ne fazilat di hai aur Abdus Samad ne kaha ke hum se Shuba ne bayan kiya, un se Qatadah ne bayan kiya: Mein ne Anas Radi Allahu Anhu se suna aur un se Abu Usaid Radi Allahu Anhu ne Nabi Kareem Sallallahu Alaihi Wasallam se yahi hadees bayan ki, is riwayat mein Saad ke baap ka naam Ubadah mazkoor hai
.

Hum se Saad Bin Hafs Talhi ne bayan kiya, kaha hum se Shaiban ne bayan kiya, un se Yahya ne ke Abu Salama ne bayan kiya ke mujhe Abu Usaid Radi Allahu Anhu ne khabar di aur unhon ne Nabi Kareem Sallallahu Alaihi Wasallam ko ye farmate suna ke Ansar mein sab se behtar ya Ansar ke gharanon mein sab se behtar Banu Najjar, Banu Abdul Ashhal, Banu Haris aur Banu Saidah ke gharane hain
.

Hum se Khalid Bin Makhlad ne bayan kiya, kaha hum se Sulaiman ne bayan kiya, kaha mujh se Amr Bin Yahya ne bayan kiya, un se Abbas Bin Sahl ne aur un se Abu Humaid Saidi ne ke Nabi Kareem Sallallahu Alaihi Wasallam ne farmaya " Ansar ka sab se behtareen gharana Banu Najjar ka gharana hai phir Banu Abdul Ashhal ka phir Bani Haris ka, phir Bani Saidah ka aur Ansar ke tamam gharanon mein khair hai. Phir hamari mulaqat Saad Bin Ubadah Radi Allahu Anhu se hui to wo Abu Usaid Radi Allahu Anhu se kehne lage tumhein maloom nahi Aap Sallallahu Alaihi Wasallam ne Ansar ke behtareen gharanon ki tareef ki aur humein (Banu Saidah) ko sab se akheer mein rakha to Saad Bin Ubadah Radi Allahu Anhu Aap Sallallahu Alaihi Wasallam ki khidmat mein hazir hue aur unhon ne arz kiya: Ya Rasul Allah! Ansar ke sab se behtareen khandanon ka bayan hua aur hum sab se akheer mein kar diye gaye. Aap Sallallahu Alaihi Wasallam ne farmaya kya tumhare liye kafi nahi ke tumhara khandan bhi behtareen khandan hai
.

Hum se Qutaybah bin Saeed ne byaan kiya , kaha hum se Layth bin Saad ne byaan kiya , in se Yahya bin Saeed Ansari ne aur unhon ne Anas bin Malik Ansari razi Allahu anhu se suna , byaan kiya ke Rasool Allah salla Allahu alaihi wasallam ne farmaya ke tumhein bataoon ke qabila Ansar ka sab se behtar gharana kaun sa hai ? Sahabah ne arz kiya ke zaroor bataiye ya Rasool Allah! Aap salla Allahu alaihi wasallam ne farmaya ke Banu Najjar ka . Is ke baad un ka martaba hai jo in se qareeb hain yani Banu Abd-ul-Ash-hal ka , in ke baad woh hain jo in se qareeb hain , Bani al-Haris bin Khazraj ka . Is ke baad woh hain jo in se qareeb hain , Banu Sa'dah ka . Phir Nabi Karim salla Allahu alaihi wasallam ne apne hath se isharah kiya aur apni mutthi band ki , phir usay is tarah khola jaise koi apne hath ki cheez ko phenkta hai phir farmaya ke Ansar ke har gharane mein khair hai .

Hum se Qubaysah bin Uqbah ne bayan kiya , kaha hum se Sufyan bin Uyaynah ne bayan kiya , in se Abu al-Zinad ne , in se Abu Salamah ne aur in se Abu Usayd Saadi razi Allahu anhu ne bayan kiya ke Nabi Karim salla Allahu alaihi wasallam ne farmaya ”qabila Ansar mein sab se behtar gharana Banu Najjar ka gharana hai .“