Hum se Ahmad bin Abi Bakr ne bayan kiya, kaha hum se Muhammad bin Ibrahim bin Dinar Abu Abdullah Juhani ne bayan kiya, in se Ibn Abi Dhib ne, in se Sa'id Maqburi ne aur in se Abu Hurairah Radi Allahu Anhu ne bayan kiya ke log kehte hain ke Abu Hurairah bahut ahadeeth bayan karta hai, halankay pait bharne ke baad mein Rasoolullah Sallallahu Alaihi Wa Sallam ke sath har waqt rehta tha, mein khameeri roti na khata aur na umdah libas pehenta tha (yani mera waqt ilm ke siwa kisi doosri cheez ke hasil karne mein na jata) aur na meri khidmat ke liye koi falan ya falani thi balkay mein bhook ki shiddat ki wajah se apne pait se patthar bandh liya karta. Baaz waqt mein kisi ko koi aayat is liye parh kar is ka matlab poochta tha ke woh apne ghar le ja kar mujhe khana khila de, halankay mujhe is aayat ka matlab maloom hota tha, miskeenon ke sath sab se behtar sulook karne wale Ja'far bin Abi Talib Radi Allahu Anhu thay, humein apne ghar le jate aur jo kuch bhi ghar mein maujood hota woh hum ko khilate. Baaz auqat to aisa hota ke sirf shehad ya ghee ki kuppi hi nikal kar late aur ise hum phaar kar is mein jo kuch hota ise hi chaat lete.

Hum se Qutaybah ne byaan kiya , kaha hum se Layth bin Saad ne byaan kiya , in se Nafi ne aur un se Ibn Umar bin Khattab razi Allahu anhuma ne ke unhon ne apni biwi ko ek talaq di to is waqt woh haiza thien . Rasool Allah salla Allahu alaihi wasallam ne un ko hukm diya ke ruju kar lein aur unhein is waqt tak apne saath rakhein jab tak woh is haiz se paak hone ke baad phir dobara haiza na hon . Is waqt bhi in se koi ta-arruz na karein aur jab woh is haiz se bhi paak ho jayein to agar is waqt unhein talaq dene ka irada ho to tuhr mein is se pehle ke in se hum-bistari karein , talaq dein . Pas yahi woh waqt hai jis ke mutalliq Allah Ta'ala ne hukm diya hai ke is mein auraton ko talaq di jaye aur Abdullah bin Umar razi Allahu anhuma se agar is ke (mutallaqa salasa ke) baare mein sawal kiya jata to sawal karne wale se woh kehte ke agar tum ne teen talaqein de di hain to phir tumhari biwi tum par haram hai . Yahan tak ke woh tumhare siwa doosre shohar se nikah kare . «ghayru Qutaybah» (Abu al-Jahm) ke is hadees mein Layth se yeh izafa kiya hai ke (unhon ne byaan kiya ke) mujh se Nafi ne byaan kiya aur in se Ibn Umar razi Allahu anhuma ne kaha ke agar tum ne apni biwi ko ek ya do talaq de di ho . (to tum usay dobara apne nikah mein la sakte ho) kyunke Nabi Karim salla Allahu alaihi wasallam ne mujhko is ka hukm diya tha .