Hum se Musaddad ne bayan kiya, unhon ne kaha hum se Yahya ne bayan kiya, in se Sa'id ne, in se Qatadah ne aur in se Anas Radi Allahu Anhu ne bayan kiya ke Nabi Kareem Sallallahu Alaihi Wa Sallam jab Uhud pahar par charhe aur Aap ke sath Abu Bakr, Umar aur Uthman Radi Allahu Anhum bhi thay to pahar kanpne laga. Aap Sallallahu Alaihi Wa Sallam ne is par farmaya "Uhud thehar ja." Mera khayal hai ke Nabi Kareem Sallallahu Alaihi Wa Sallam ne ise apne paon se maara bhi tha ke tujh par ek nabi, ek siddiq aur do shaheed hi to hain.

Hum se Abdul Aziz bin Abdullah ne bayan kiya, kaha hum se Sulaiman ne bayan kiya, un se Yahya bin Sa'id ne, un se Nafi ne aur un se Abdullah bin Umar Radi Allahu Anhuma ne bayan kiya ke Nabi Kareem Sallallahu Alaihi Wa Sallam ke zamana hi mein jab humein Sahaba ke darmiyan intikhab ke liye kaha jata to sab mein afzal aur behtar hum Abu Bakr Radi Allahu Anhu ko qarar dete, phir Umar bin Khattab Radi Allahu Anhu ko phir Uthman bin Affan Radi Allahu Anhu ko.

Mujh se Muhammad bin Bashar ne bayan kiya, kaha ke mujh se Yahya bin Sa'id Qattan ne bayan kiya, in se Sa'id ne, in se Qatadah ne aur in se Anas bin Malik Radi Allahu Anhu ne bayan kiya ke jab Nabi Kareem Sallallahu Alaihi Wa Sallam, Abu Bakr, Umar aur Uthman Radi Allahu Anhum ko sath le kar Uhud pahar par charhe to Uhud kanp utha, Aap Sallallahu Alaihi Wa Sallam ne farmaya "Uhud! Qarar pakar ke tujh par ek nabi, ek siddiq aur do shaheed hain."