Mujh se Abdullah bin Muhammad Musnadi ne bayan kiya, unhon ne kaha hum se Yahya bin Adam ne bayan kiya, unhon ne kaha hum se Husain Jaf-ee ne bayan kiya, un se Abu Musa ne, un se Imam Hasan Basri ne aur un se Abu Bakrah Radi Allahu Anhu ne ke Nabi Kareem Sallallahu Alaihi Wa Sallam Hasan Radi Allahu Anhu ko ek din sath le kar bahar tashreef laye aur mimbar par in ko le kar charh gaye phir farmaya "Mera yeh beta sayyad hai aur umeed hai ke Allah Ta'ala is ke zariye Musalmanon ki do jama'aton mein milap kara dega."

Hum se Abdullah Bin Muhammad Musandi ne bayan kiya, kaha hum se Sufyan Bin Uyaina ne bayan kiya, un se Abu Musa ne bayan kiya ke mein ne Imam Hasan Basri se suna, wo bayan karte thay ke qasam Allah ki jab Hasan Bin Ali (Radi Allahu Anhuma) (Moawiya Radi Allahu Anhu ke muqable mein) paharon mein lashkar le kar pahunche, to Amr Bin Al-Aas (Radi Allahu Anhu) ne kaha (jo Ameer Moawiya Radi Allahu Anhu ke musheer-e-khass thay) ke mein aisa lashkar dekh raha hoon jo apne muqabil ko neist-o-nabood kiye baghair wapas na jaye ga. Moawiya (Radi Allahu Anhu) ne is par kaha aur qasam Allah ki, wo in donon ashaab mein zyada acche thay, ke Ae Amr! agar is lashkar ne is lashkar ko qatal kar diya, ya is ne is ko qatal kar diya, to (Allah Ta'ala ki bargah mein) logon ke umoor (ki jawab-dehi ke liye) mere sath kaun zimmedari le ga, logon ki bewa auraton ki khabar-giri ke silsile mein mere sath kaun zimmedar ho ga. Logon ki aal-aulad ke silsile mein mere sath kaun zimmedar ho ga. Aakhir Moawiya (Radi Allahu Anhu) ne Hasan (Radi Allahu Anhu) ke yahan Quraish ki shakh Banu Abd Shams ke do aadmi bheje. Abdur Rahman Bin Samurah aur Abdullah Bin Aamir Bin Kuraiz, Aap ne in donon se farmaya ke Hasan Bin Ali (Radi Allahu Anhu) ke yahan jao aur in ke samne sula pesh karo, in se is par guftagu karo aur faisla unhein ki marzi par chor do. Chunanchay ye log aaye aur Aap se guftagu ki aur faisla aap hi ki marzi par chor diya. Hasan Bin Ali (Radi Allahu Anhu) ne farmaya, hum Banu Abdul Muttalib ki aulad hain aur hum ko khilafat ki wajah se rupiya paisa kharch karne ki aadat ho gayi hai aur hamare sath ye log hain, ye khoon kharaba karne mein taaq hain, baghair rupiya diye manne wale nahi. Wo kehne lage Ameer Moawiya (Radi Allahu Anhu) aap ko itna itna rupiya dene par razi hain aur aap se sula chahte hain. Faisla aap ki marzi par chora hai aur aap se poocha hai. Hasan (Radi Allahu Anhu) ne farmaya ke is ki zimmedari kaun le ga? In donon qasidou ne kaha ke hum is ke zimmedar hain. Hasan ne jis cheez ke mutalliq bhi poocha, to unhon ne yahi kaha ke hum is ke zimmedar hain. Aakhir aap ne sula kar li, phir farmaya ke mein ne Abu Bakra (Radi Allahu Anhu) se suna tha, wo bayan karte thay ke mein ne Rasul Allah (Sallallahu Alaihi Wasallam) ko minbar par ye farmate suna hai aur Hasan Bin Ali (Radi Allahu Anhuma) Aap (Sallallahu Alaihi Wasallam) ke pehlu mein thay, Aap (Sallallahu Alaihi Wasallam) kabhi logon ki taraf mutawajja hote aur kabhi Hasan (Radi Allahu Anhu) ki taraf aur farmate ke mera ye beta sardar hai aur shayad is ke zariya Allah Ta'ala Musalmanon ke do azeem girohou mein sula karaye ga. Imam Bukhari (Rahimahullah) ne kaha mujh se Ali Bin Abdullah Madini ne bayan kiya ke hamare nazdeek is hadees se Hasan Basri ka Abu Bakra (Radi Allahu Anhu) se sunna sabit hua hai
.

Hum se Sadaqah ne bayan kiya, kaha hum se Ibn Uyainah ne bayan kiya, kaha hum se Abu Musa ne bayan kiya, un se Hasan ne, unhon ne Abu Bakrah Radi Allahu Anhu se suna aur unhon ne Nabi Kareem Sallallahu Alaihi Wasallam se suna Aap Sallallahu Alaihi Wasallam minbar par tashreef farma thay aur Hasan Radi Allahu Anhu Aap ke pehlu mein thay, Aap kabhi logon ki taraf mutawajje hote aur phir Hasan Radi Allahu Anhu ki taraf aur farmate: Mera ye beta sardar hai aur umeed hai ke Allah Ta'ala is ke zariya musalmanon ki do jamaaton mein sulah karaye ga
.

`Hum se Ali bin Abdullah ne bayan kiya, kaha hum se Sufyan ne bayan kiya, kaha hum se Israil Abu Musa ne bayan kiya aur meri in se mulaqat Kufa mein hui thi. Wo Ibn Shubruma ke paas aaye aur kaha ke mujhe Isa (Mansoor ke bhai aur Kufa ke wali) ke paas le chalo taake mein ise nasihat karoon. Galiban Ibn Shubruma ne khauf mahsoos kiya aur nahi le gaye. Unhon ne is par bayan kiya ke hum se Hasan Basri ne bayan kiya ke jab Hasan bin Ali, Ameer Muawiya Radi Allahu Anhum ke khilaf lashkar le kar nikle to Amr bin al-Aas ne Ameer Muawiya Radi Allahu Anhu se kaha ke mein aisa lashkar dekhta hoon jo is waqt tak wapas nahi ja sakta jab tak apne muqabil ko bhaga na le. Phir Ameer Muawiya Radi Allahu Anhu ne kaha ke musalmanon ke ahl o ayal ka kaun kafeel ho ga? Jawab diya ke mein, phir Abdullah bin Aamir aur Abdur Rahman bin Samura ne kaha ke hum Syedna Hasan Radi Allahu Anhu se milte hain (aur un se sulah ke liye kehte hain), Hasan Basri ne kaha ke mein ne Abu Bakra Radi Allahu Anhu se suna, unhon ne bayan kiya ke Nabi Kareem صلی اللہ علیہ وسلم khutba de rahe thay ke Hasan Radi Allahu Anhu aaye to Nabi Kareem صلی اللہ علیہ وسلم ne farmaya ke mera yeh beta syed hai aur umeed hai ke is ke zariya Allah musalmanon ki do jama'aton mein sulah kara de ga.