Aur tum par ek aisa dour bhi aane wala hai ke tum mein se koi apne sare ghar-bar aur mal-o-daulat se barh kar mujh ko dekh lena zyada pasand karega.

Hum se Abul Numan ne bayan kiya, un se Jarir Bin Hazim ne bayan kiya, kaha mein ne Hasan se suna, unhon ne kaha ke hum se Amr Bin Taghlib (Radi Allahu Anhu) ne bayan kiya, kaha ke Nabi Kareem (Sallallahu Alaihi Wasallam) ne farmaya ke qayamat ki nishaniyon mein se hai ke tum aaisi qaum se jung karo ge jo balon ki jootiyan pehne honge (ya un ke baal bahut lambe honge) aur qayamat ki ek nishani ye hai ke in logon se laro ge jin ke munh chore chore honge goya dhaalein hain chamra jami hui (yani bahut mote munh wale honge)
.

Hum se Saeed Bin Muhammad ne bayan kiya, kaha hum se Yaqub Bin Ibrahim ne bayan kiya, kaha mujh se mere baap Ibrahim Bin Saad ne bayan kiya, un se Salih Bin Kaisan ne, un se Aaraj ne bayan kiya aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Qayamat us waqt tak qaim nahi hogi jab tak tum Turkon se jung na kar lo ge, jin ki aankhein chhoti hongi, chehre surkh honge, naak moti phaili hui hogi, un ke chehre aise honge jaise teh-band chamra lagi hui hoti hai aur qayamat us waqt tak qaim na hogi jab tak tum ek aaisi qaum se jung na kar lo ge jin ke joote baal ke bane hue honge."
.

Hum se Ali Bin Abdullah ne bayan kiya, kaha hum se Sufyan Bin Uyainah ne bayan kiya, un se Zuhri ne bayan kiya, un se Saeed Bin Musayyib ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Qayamat us waqt tak qaim nahi hogi jab tak tum ek aaisi qaum se larayi na kar lo ge jin ke joote balon ke honge aur qayamat us waqt tak qaim nahi hogi jab tak tum ek aaisi qaum se jung na kar lo ge jin ke chehre teh-shuda dhaaloon jaise honge." Sufyan ne bayan kiya ke is mein Abul Zinad ne Aaraj se aur unhon ne Abu Hurairah (Radi Allahu Anhu) se ye ziyada naqal kiya ke un ki aankhein chhoti hongi, naak moti, chehre aise honge jaise teh-ba-teh chamra lagi dhaal hoti hai
.

Mujh se Yahya ne bayan kiya, kaha hum se Abdur Razzaq ne bayan kiya, un se Ma'mar ne aur un se Hammam ne aur un se Abu Hurairah Radi Allahu Anhu ne bayan kiya ke Nabi Kareem Sallallahu Alaihi Wa Sallam ne farmaya "Qiyamat is waqt tak qaim na hogi jab tak ke tum Iraniyon ke shehar Khuz aur Karman walon se jang na kar loge. Chehre un ke surkh honge. Naak chapti hogi. Aankhein chhoti hongi aur chehre aise honge jaise teh-ba-teh dhaal hoti hai aur un ke joote baalon wale honge. Yahya ke alawa is hadeeth ko auron ne bhi Abdur Razzaq se riwayat kiya hai.

Hum se Ali bin Abdullah Madini ne bayan kiya, kaha hum se Sufyan bin Uyainah ne bayan kiya, kaha ke Ismail ne bayan kiya ke mujh ko Qais ne khabar di, unhon ne kaha ke hum Abu Hurairah Radi Allahu Anhu ki khidmat mein hazir hue to unhon ne kaha ke mein Rasoolullah Sallallahu Alaihi Wa Sallam ki suhbat mein teen saal raha hun, apni poori umar mein mujhe hadeeth yaad karne ka itna shouq kabhi nahi hua jitna in teen saalon mein tha. Mein ne Nabi Kareem Sallallahu Alaihi Wa Sallam ko farmate suna, Aap ne apne hath se yun ishara kar ke farmaya ke Qiyamat ke qareeb tum log (Musalman) ek aisi qoum se jang karoge jin ke joote baalon ke honge (murad yahi Irani hain) Sufyan ne ek martaba "wa huwa haza al-bariz" ke bajaye alfaz "wa hum ahl al-bazir" naqal kiye (yani Irani, ya Kurdi, ya Deelam wale log murad hain).

Hum se Sulaiman bin Harb ne bayan kiya, kaha hum se Jarir bin Hazim ne bayan kiya, kaha mein ne Hasan se suna, unhon ne bayan kiya ke hum se Amr bin Taghlib Radi Allahu Anhu ne bayan kiya ke mein ne Rasoolullah Sallallahu Alaihi Wa Sallam se suna, Aap Sallallahu Alaihi Wa Sallam ne farmaya "Qiyamat ke qareeb tum ek aisi qoum se jang karoge jo baalon ka joota pehenti hogi aur ek aisi qoum se jang karoge jin ke munh teh-ba-teh dhaalon ki tarah honge."