Hum se Yahya bin Bukair ne bayan kiya, unhon ne kaha hum se Laith bin Saad ne Yunus ke wasita se bayan kiya, unhon ne Ibn Shihab se, unhon ne Anas bin Malik se, unhon ne farmaya ke Abu Zarr Ghifari Razi Allah Anhu yeh hadees bayan karte thay ke Nabi Kareem Sallallahu Alaihi Wasallam ne farmaya ke mere ghar ki chhat khol di gayi, is waqt main Makkah mein tha. Phir Jibrail Alaihis Salam utre aur unhon ne mera seena chaak kiya. Phir ise Zamzam ke pani se dhoya. Phir ek sone ka tasht laye jo hikmat aur iman se bhara hua tha. Is ko mere seene mein rakh diya, phir seene ko jod diya, phir mera hath pakda aur mujhe aasman ki taraf le kar chale. Jab main pehle aasman par pahuncha to Jibrail Alaihis Salam ne aasman ke darogha se kaha kholo. Us ne poocha, aap kaun hain? Jawab diya ke Jibrail, phir unhon ne poocha kya aap ke sath koi aur bhi hai? Jawab diya, haan mere sath Muhammad (Sallallahu Alaihi Wasallam) hain. Unhon ne poocha ke kya un ke bulane ke liye aap ko bheja gaya tha? Kaha, ji haan! Phir jab unhon ne darwaza khola to hum pehle aasman par chadh gaye, wahan hum ne ek shakhs ko baithe hue dekha. Un ke dahini taraf kuch logon ke jhand thay aur kuch jhand bayein taraf thay. Jab woh apni dahini taraf dekhte to muskura dete aur jab bayein taraf nazar karte to rote. Unhon ne mujhe dekh kar farmaya, aao acche aaye ho. Saleh Nabi aur saleh bete! Main ne Jibrail Alaihis Salam se poocha yeh kaun hain? Unhon ne kaha ke yeh Aadam Alaihis Salam hain aur un ke dayein bayein jo jhand hain yeh un ke beton ki roohein hain. Jo jhand dayein taraf hain woh jannati hain aur bayein taraf ke jhand dozakhi roohein hain. Is liye jab woh apne dayein taraf dekhte hain to khushi se muskurate hain aur jab bayein taraf dekhte hain to (ranj se) rote hain. Phir Jibrail mujhe le kar doosre aasman tak pahunche aur is ke darogha se kaha ke kholo. Is aasman ke darogha ne bhi pehle ki tarah poocha phir khol diya. Anas ne kaha ke Abu Zarr ne zikr kiya ke Aap Sallallahu Alaihi Wasallam yani Nabi Kareem Sallallahu Alaihi Wasallam ne aasman par Aadam, Idrees, Musa, Isa aur Ibrahim Alaihimus Salam ko maujood paya. Aur Abu Zarr Razi Allah Anhu ne har ek ka thikana nahi bayan kiya. Albatta itna bayan kiya ke Nabi Kareem Sallallahu Alaihi Wasallam ne Aadam ko pehle aasman par paya aur Ibrahim Alaihis Salam ko chhatay aasman par. Anas ne bayan kiya ke jab Jibrail Alaihis Salam Nabi Kareem Sallallahu Alaihi Wasallam ke sath Idrees Alaihis Salam par guzre. To unhon ne farmaya ke aao acche aaye ho saleh Nabi aur saleh bhai. Main ne poocha yeh kaun hain? Jawab diya ke yeh Idrees Alaihis Salam hain. Phir Musa Alaihis Salam tak pahuncha to unhon ne farmaya aao acche aaye ho saleh Nabi aur saleh bhai. Main ne poocha yeh kaun hain? Jibrail Alaihis Salam ne bataya ke Musa Alaihis Salam hain. Phir main Isa Alaihis Salam tak pahuncha, unhon ne kaha aao acche aaye ho saleh Nabi aur saleh bhai. Main ne poocha yeh kaun hain? Jibrail Alaihis Salam ne bataya ke yeh Isa Alaihis Salam hain. Phir main Ibrahim Alaihis Salam tak pahuncha. Unhon ne farmaya aao acche aaye ho saleh Nabi aur saleh bete. Main ne poocha yeh kaun hain? Jibrail Alaihis Salam ne bataya ke yeh Ibrahim Alaihis Salam hain. Ibn Shihab ne kaha ke mujhe Abu Bakr bin Hazm ne khabar di ke Abdullah bin Abbas aur Abu Habbah al-Ansari Razi Allah Anhum kaha karte thay ke Nabi Kareem Sallallahu Alaihi Wasallam ne farmaya, phir mujhe Jibrail Alaihis Salam le kar chadhe, ab main is buland maqam tak pahunch gaya jahan main ne qalam ki aawaz suni (jo likhne wale farishton ki qalamon ki aawaz thi) Ibn Hazm ne (apne sheikh se) aur Anas bin Malik ne Abu Zarr Razi Allah Anhu se naqal kiya ke Nabi Kareem Sallallahu Alaihi Wasallam ne farmaya. Pas Allah Ta’ala ne meri ummat par pachaas waqt ki namazin farz kin. Main yeh hukm le kar wapas lauta. Jab Musa Alaihis Salam tak pahuncha to unhon ne poocha ke aap ki ummat par Allah ne kya farz kiya hai? Main ne kaha ke pachaas waqt ki namazin farz ki hain. Unhon ne farmaya aap wapas apne Rabb ki bargah mein jaiye. Kyunke aap ki ummat itni namazon ko ada karne ki taqat nahi rakhti hai. Main wapas bargah-e-Rabb-ul-Izzat mein gaya to Allah ne is mein se ek hissa kam kar diya, phir Musa Alaihis Salam ke paas aaya aur kaha ke ek hissa kam kar diya gaya hai, unhon ne kaha ke dobara jaiye kyunke aap ki ummat mein is ke bardasht ki bhi taqat nahi hai. Phir main bargah-e-Rabb-ul-Izzat mein hazir hua. Phir ek hissa kam hua. Jab Musa Alaihis Salam ke paas pahuncha to unhon ne farmaya ke apne Rabb ki bargah mein phir jaiye, kyunke aap ki ummat is ko bhi bardasht na kar sake gi, phir main baar baar aaya gaya pas Allah Ta’ala ne farmaya ke yeh namazin (amal mein) paanch hain aur (sawab mein) pachaas (ke barabar) hain. Meri baat badli nahi jati. Ab main Musa Alaihis Salam ke paas aaya to unhon ne phir kaha ke apne Rabb ke paas jaiye. Lekin main ne kaha mujhe ab apne Rabb se sharam aati hai. Phir Jibrail mujhe Sidrat-ul-Muntaha tak le gaye jise kai tarah ke rangon ne dhaank rakkha tha. Jin ke mutaliq mujhe maloom nahi hua ke woh kya hain. Is ke baad mujhe jannat mein le jaya gaya, main ne dekha ke is mein motiyon ke haar hain aur is ki mitti mushk ki hai. 104687

Hum se Abdullah bin Muhammad Musnadi ne byaan kiya , kaha ke hum se Sufyan bin Uyaynah ne Zuhri se byaan kiya , un se Urwah ne aur un se Ayesha razi Allahu anha ne kaha ke pehle namaaz do rakat farz hui thi baad mein safar ki namaaz to apni isi halat par reh gayi albatta hazar ki namaaz poori (chaar rakat) kar di gayi . Zuhri ne byaan kiya ke main ne Urwah se poocha ke phir khud Ayesha razi Allahu anha ne kyun namaaz poori parhi thi unhon ne is ka jawab yeh diya ke Usman razi Allahu anhu ne is ki jo taweel ki thi wahi unhon ne bhi ki .

Hum se Musaddad ne bayan kiya, kaha hum se Yezid Bin Zurai ne bayan kiya, kaha hum se Ma'mar ne bayan kiya, un se Zuhri ne, un se Urwah ne aur un se Aisha Radi Allahu Anha ne bayan kiya ke (pehle) namaz sirf do rakat farz hui thi phir Nabi Kareem Sallallahu Alaihi Wasallam ne hijrat ki to wo farz rakaat char rakaat ho gayein. Albatta safar ki halat mein namaz apni halat mein baqi rakkhi gayi. Is riwayat ki mutabi'at Abdur Razzaq ne Ma'mar se ki hai
.