Hum se Abu Al-Yaman ne bayan kiya, kaha hum ko Shuaib ne khabar di, kaha hum se Abu Az-Zinad ne bayan kiya, un se Abdur Rahman ne bayan kiya, unhon ne Abu Hurairah (Radi Allahu Anhu) se suna aur unhon ne Rasul Allah (Sallallahu Alaihi Wasallam) se suna Aap (Sallallahu Alaihi Wasallam) ne farmaya ke ek aurat apne bacche ko doodh pila rahi thi ke ek sawar idhar se guzra, wo is waqt bhi bacche ko doodh pila rahi thi (sawar ki shan dekh kar) aurat ne dua ki: Ae Allah! Mere bacche ko is waqt tak mout na dena jab tak ke is sawar jaisa na ho jaye. Isi waqt (ba-qudrat-e-Ilahi) baccha bol para. Ae Allah! Mujhe is jaisa na karna. Aur phir wo doodh peene laga. Is ke baad ek aurat ko idhar se le jaya gaya, ise le jane wale ise ghasit rahe thay aur is ka mazaq ura rahe thay. Maan ne dua ki: Ae Allah! Mere bacche ko is aurat jaisa na karna, lekin bacche ne kaha ke ae Allah! Mujhe isi jaisa bana dena (phir to maan ne poocha, arey ye kya maamla hai? Is bacche ne bataya ke sawar to kafir-o-zalim tha aur aurat ke mutaliq log kehte thay ke tu zina karati hai to wo jawab deti «hasbi-Allahu» (Allah mere liye kafi hai, wo meri pak-damni janta hai) log kehte ke tu chori karti hai to wo jawab deti «hasbi-Allahu» (Allah mere liye kafi hai aur wo meri pak-damni janta hai)
.

Aur Layth bin Saad ne kaha ke mujh se Jafar bin Rabeeah ne byaan kiya , un se Abdur Rahman bin Hurmuz Aaraj ne ke Abu Hurairah razi Allahu anhu ne byaan kiya ke Nabi Karim salla Allahu alaihi wasallam ne farmaya , (Bani Israeel ki) ek aurat ne apne bete ko pukara , is waqt woh ibadat khane mein tha . Maan ne pukara ke ae Jurayj! Jurayj (pas o pesh mein par gaya aur dil mein) kehne laga ke ae Allah! main ab maan ko dekhoon ya namaaz ko . Phir maan ne pukara: ae Jurayj! (woh ab bhi is pas o pesh mein tha) ke ae Allah! meri maan aur meri namaaz! Maan ne phir pukara: ae Jurayj! (woh ab bhi yehi) soche ja raha tha . Ae Allah! meri maan aur meri namaaz! (aakhir) maan ne tang ho kar bad-dua ki ae Allah! Jurayj ko maut na aaye jab tak woh fahisha aurat ka chehra na dekh le . Jurayj ki ibadat gah ke qareeb ek charane wali aaya karti thi jo bakriyan charati thi . Ittefaq se us ke bacha paida hua . Logon ne poocha ke yeh kis ka bacha hai ? Us ne kaha ke Jurayj ka hai . Woh ek martaba apni ibadat gah se nikal kar mere paas raha tha . Jurayj ne poocha ke woh aurat kaun hai ? Jis ne mujh par tohmat lagayi hai ke us ka bacha mujh se hai . (aurat bache ko le kar aayi to) unhon ne bache se poocha ke bache! tumhara baap kaun ? Bacha bol para ke ek bakri charane wala gadariya mera baap hai .