Hum se Bishr bin Khalid ne bayan kiya, kaha mujh ko Muhammad ne khabar di jo Ghundar ke naam se mashhoor hain, Shuba ke wasita se, woh Sulaiman se naqal karte hain aur woh Abu Wail se ke Abu Musa ne Abdullah bin Masood se kaha ke agar (ghusl ki hajat ho aur) pani na mile to kya namaz na padhi jaye. Abdullah ne farmaya, haan! Agar mujhe ek mahina tak bhi pani na mile to main namaz na padhoon ga. Agar is mein logon ko ijazat de di jaye to sardi maloom kar ke bhi log tayammum se namaz padh lein ge. Abu Musa kehte hain ke main ne kaha ke phir Umar Razi Allah Anhu ke samne Ammar Razi Allah Anhu ke qaul ka kya jawab ho ga. Bole ke mujhe to nahi maloom hai ke Umar Razi Allah Anhu Ammar Razi Allah Anhu ki baat se mutmain ho gaye thay. 104682

Hum se Adam bin Abi Iyas ne bayan kiya, unhon ne kaha hum se Shuba ne bayan kiya, unhon ne kaha hum se Hakam bin Uyainah ne bayan kiya, unhon ne Zarr bin Abdullah se, unhon ne Saeed bin Abdur Rahman bin Abza se, woh apne baap se, unhon ne bayan kiya ke ek shakhs Umar bin Khattab Razi Allah Anhu ke paas aaya aur arz ki ke mujhe ghusl ki hajat ho gayi aur pani nahi mila (to main ab kya karoon) is par Ammar bin Yasir Razi Allah Anhuma ne Umar bin Khattab Razi Allah Anhu se kaha, kya aap ko yaad nahi jab main aur aap safar mein thay, hum donon junbi ho gaye. Aap ne to namaz nahi padhi lekin main ne zameen par loot poat liya, aur namaz padh li. Phir main ne Nabi Kareem Sallallahu Alaihi Wasallam se is ka zikr kiya to Aap Sallallahu Alaihi Wasallam ne farmaya ke tujhe bas itna hi kafi tha aur aap ne apne donon hath zameen par mare phir unhein phoonka aur donon se chehre aur pahonchon ka masah kiya. 104673