Hum se Humaidi ne bayan kiya kaha hum se Sufyan ne bayan kiya kaha ke mein ne Zuhri se suna wo bayan karte thay ke mujhe Ubaidullah Bin Abdullah ne khabar di aur unhein Ibn Abbas (Radi Allahu Anhuma) ne unhon ne Umar (Radi Allahu Anhu) ko minbar par ye kehte suna tha ke mein ne Nabi Kareem (Sallallahu Alaihi Wasallam) se suna Aap (Sallallahu Alaihi Wasallam) ne farmaya "Mujhe mere martabe se zyada na barhao jaise Isa Ibn Maryam (Alaihimas Salam) ko Nasara ne un ke rutbe se zyada barha diya hai. Mein to sirf Allah ka banda hoon is liye yehi kaha karo (mere mutaliq) ke mein Allah ka banda aur is ka Rasul hoon."

Hum se Yahya Bin Sulaiman ne bayan kiya, unhon ne kaha ke mujh se Ibn Wahb ne bayan kiya, unhon ne kaha ke mujh se Imam Malik ne bayan kiya (doosri sanad) aur mujh ko Yunus ne khabar di ke Ibn Shihab ne kaha, mujh ko khabar di Ubaidullah Bin Abdullah Bin Utbah ne, unhein Abdullah Bin Abbas (Radi Allahu Anhuma) ne khabar di ke Umar (Radi Allahu Anhu) ne kaha, jab apne Nabi (Sallallahu Alaihi Wasallam) ko Allah Ta'ala ne wafat day di to Ansar Banu Saida ke «سقيفة» chopal mein jama hue. Mein ne Abu Bakr (Radi Allahu Anhu) se kaha ke Aap humein bhi wahin lay chaliye. Chunanche hum Ansar ke yahan Saqeefah Banu Saida mein pahunche
.