Hum se Yahya Bin Musa ne bayan kiya kaha hum se Abdur Razzaq ne bayan kiya kaha hum ko Maamar ne khabar di unhein Abdullah Bin Taoos ne aur un se Abu Hurairah (Radi Allahu Anhu) ne bayan kiya ke Allah Ta'ala ne Musa (Alaihis Salam) ke pas Malik-ul-Mout ko bheja. Jab Malik-ul-Mout Musa (Alaihis Salam) ke pas aaye to unhon ne unhein chanta mara (kyunke wo insan ki surat mein aya tha) Malik-ul-Mout Allah Rabb-ul-Izzat ki bargah mein wapas hue aur arz kiya ke tu ne apne ek aise bande ke pas mujhe bheja jo mout ke liye tayyar nahi hai. Allah Ta'ala ne farmaya ke dobara un ke pas jao aur kaho ke apna hath kisi bail ki peeth par rakhein, un ke hath mein jitne baal is ke aa jayein un mein se har baal ke badle ek saal ki umr unhein di jaye gi (Malik-ul-Mout dobara aaye aur Allah Ta'ala ka faisla sunaya) Musa (Alaihis Salam) bole: Ae Rabb! Phir is ke baad kya hoga? Allah Ta'ala ne farmaya ke phir mout hai. Musa (Alaihis Salam) ne arz kiya ke phir abhi kyun na aa jaye. Abu Hurairah (Radi Allahu Anhu) ne bayan kiya ke phir Musa (Alaihis Salam) ne Allah Ta'ala se dua ki ke Bait-ul-Muqaddas se mujhe itna qareeb kar diya jaye ke (jahan un ki qabar ho wahan se) agar koi patthar pheinke to wo Bait-ul-Muqaddas tak pahunch sake. Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya ke agar mein wahan maujood hota to Bait-ul-Muqaddas mein mein tumhein un ki qabar dikhata jo raste ke kinare par hai, rait ke surkh tile se neeche. Abdur Razzaq Bin Hammam ne bayan kiya ke humein Maamar ne khabar di unhein Hammam ne aur un ko Abu Hurairah (Radi Allahu Anhu) ne Nabi Kareem (Sallallahu Alaihi Wasallam) se isi tarah bayan kiya

Hum se Mahmood bin Ghaylan ne byaan kiya ‘ kaha ke hum se Abdur Razzaq ne byaan kiya ‘ kaha ke hum ko Mamar ne khabar di ‘ unhein Abdullah bin Tawoos ne ‘ unhein un ke waalid ne aur un se Abu Hurairah razi Allahu anhu ne byaan kiya ke Malik-ul-Maut (aadmi ki shakal mein) Musa alaihis salam ke paas bheje gaye . Woh jab aaye to Musa alaihis salam ne (na pehchan kar) unhein ek zor ka tamancha maara aur un ki aankh phore daali . Woh wapas apne Rab ke huzoor mein pahunche aur arz kiya ke ya Allah! tu ne mujhe aise bande ki taraf bheja jo marna nahin chahta . Allah Ta'ala ne un ki aankh pehle ki tarah kar di aur farmaya ke dobara ja aur un se keh ke Aap apna haath ek bail ki peeth par rakhiye aur peeth ke jitne baal Aap ke haath talle aa jayein un ke har baal ke badle ek saal ki zindagi di jaati hai . (Musa alaihis salam tak jab Allah Ta'ala ka yeh paigham pahuncha to) Aap ne kaha ke ae Allah! phir kya ho ga ? Allah Ta'ala ne farmaya ke phir bhi maut aani hai . Musa alaihis salam bole to abhi kyon na aa jaye . Phir unhon ne Allah se dua ki ke unhein ek patthar ki maar par Arz-e-Muqaddas se qareeb kar diya jaye . Abu Hurairah razi Allahu anhu ne byaan kiya ke Nabi Karim salla Allahu alaihi wasallam ne farmaya ke agar main wahan hota to tumhein un ki qabr dikhata ke laal teele ke paas raste ke qareeb hai .