Hum se Muhammad Bin Miskeen Abu-ul-Hasan ne bayan kiya unhon ne kaha hum se Yahya Bin Hassan Bin Hayyan Abu Zakariya ne bayan kiya unhon ne kaha hum se Sulaiman ne bayan kiya un se Abdullah Bin Dinar ne aur un se Abdullah Bin Umar (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne jab Hijr (Samood ki basti) mein ghazwa-e-Tabuk ke liye jate hue padao kiya to Aap (Sallallahu Alaihi Wasallam) ne sahaba (Radi Allahu Anhum) ko hukm farmaya ke yahan ke kunwo ka pani na peena aur na apne bartanon mein sath lena. Sahaba (Radi Allahu Anhum) ne arz kiya ke hum ne to is se apna aata bhi goondh liya hai aur pani apne bartanon mein bhi rakh liya hai. Nabi Kareem (Sallallahu Alaihi Wasallam) ne unhein hukm diya ke goondha hua aata phaink diya jaye aur Abu Zarr (Radi Allahu Anhu) ne Nabi Kareem (Sallallahu Alaihi Wasallam) se naql kiya hai ke jis ne aata is pani se goondh liya ho (wo ise phaink de)
.

Hum se Ibrahim Bin-ul-Munzir ne bayan kiya unhon ne kaha hum se Anas Bin Iyaz ne bayan kiya un se Ubaidullah ne un se Nafi ne aur aur unhein Abdullah Bin Umar (Radi Allahu Anhuma) ne khabar di ke sahaba (Radi Allahu Anhum) ne Nabi Kareem (Sallallahu Alaihi Wasallam) ke sath Samood ki basti Hijr mein padao kiya to wahan ke kunwo ka pani apne bartanon mein bhar liya aur aata bhi is pani se goondh liya. Lekin Nabi Kareem (Sallallahu Alaihi Wasallam) ne unhein hukm diya ke jo pani unhon ne apne bartanon mein bhar liya hai ise undail dein aur goondha hua aata janwaron ko khila dein. Is ke bajaye Nabi Kareem (Sallallahu Alaihi Wasallam) ne unhein ye hukm diya ke is kunwe se pani lein jis se Salih Alaihis Salam ki ontni pani piya karti thi
.