Muhammad Bin Abdullah Ansari ne kaha ke hum se isi tarah ye hadees Ibn Juraij ne bayan kiya lekin Kaseer Bin Kaseer ne mujh se yun bayan kiya ke mein aur Usman Bin Abu Sulaiman dono Said Bin Jubair ke paas baithe hue thay, itne mein unhon ne kaha ke Ibn Abbas (Radi Allahu Anhuma) ne mujh se ye hadees is tarah bayan nahi ki balki yun kaha ke Ibrahim Alaihis Salam apne bete Ismail aur un ki walida Hajra Alaihi-as-Salam Ismail Alaihis Salam ko le kar Makkah ki sarr zameen ki taraf aaye. Hajra Alaihi-as-Salam Ismail Alaihis Salam ko doodh pilati theen. In ke sath ek purani mashk thi. Ibn Abbas ne is hadees ko marfoo nahi kiya
.

Hum se Abdullah Bin Muhammad ne bayan kiya, kaha ke hum ko Abdur Razzaq ne khabar di kaha ke hum ko Maamar ne khabar di, unhein Ayyub aur Kaseer Bin Kaseer ne, donon ki riwayaton mein ek doosre ki ba-nisbat kami aur ziyadati hai, aur un se Saeed Bin Jubair ne ke Ibn Abbas (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya, Ismail (Alaihis Salam) ki walidah (Hajira Alaihas Salam) par Allah reham farmaye ke agar unhon ne Zamzam ko chhor diya hota, ya yun farmaya ke agar wo Zamzam se chuloo bhar bhar kar na letin to wo ek behta chashma hota. Phir jab qabeela-e-Jurhum ke log aaye aur (Hajira Alaihas Salam se) kaha ke aap humein apne paros mein qayam ki ijazat dein to unhon ne ise qabool kar liya is shart par ke pani par un ka koi haq na hoga. Qabeela walon ne ye shart maan li thi
.