Mujh se Abu Abdullah Ahmad Bin Said ne bayan kiya, hum se Wahb Bin Jareer ne bayan kiya, un se un ke walid Jareer Bin Hazim ne bayan kiya, un se Ayub Sakhtiyani ne, un se Abdullah Bin Said Bin Jubair ne, un se un ke walid Said Bin Jubair ne aur un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya "Allah Ta'ala Ismail Alaihis Salam ki walida (Hajra Alaihi-as-Salam) par reham kare, agar unhon ne jaldi na ki hoti (aur zamzam ke pani ke gird mandair na banateen) to aaj wo ek behta hua chashma hota."
.

Hum se Abdullah Bin Muhammad ne bayan kiya, kaha ke hum ko Abdur Razzaq ne khabar di kaha ke hum ko Maamar ne khabar di, unhein Ayyub aur Kaseer Bin Kaseer ne, donon ki riwayaton mein ek doosre ki ba-nisbat kami aur ziyadati hai, aur un se Saeed Bin Jubair ne ke Ibn Abbas (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya, Ismail (Alaihis Salam) ki walidah (Hajira Alaihas Salam) par Allah reham farmaye ke agar unhon ne Zamzam ko chhor diya hota, ya yun farmaya ke agar wo Zamzam se chuloo bhar bhar kar na letin to wo ek behta chashma hota. Phir jab qabeela-e-Jurhum ke log aaye aur (Hajira Alaihas Salam se) kaha ke aap humein apne paros mein qayam ki ijazat dein to unhon ne ise qabool kar liya is shart par ke pani par un ka koi haq na hoga. Qabeela walon ne ye shart maan li thi
.