Hum se Muhammad Bin Mahboob ne bayan kiya, kaha hum se Hammad Bin Zaid ne bayan kiya, un se Ayub ne, un se Muhammad ne aur un se Abu Hurairah (Radi Allahu Anhu) ne bayan kiya ke Ibrahim Alaihis Salam ne teen martaba jhoot bola tha, do in mein se khalis Allah Azza wa Jalla ki raza ke liye thay. Ek to un ka farmana (ba-taur tawriya ke) ke "mein bimar hoon" aur doosra un ka ye farmana ke "balki ye kaam to in ke bade (butt) ne kiya hai." Aur bayan kiya ke ek martaba Ibrahim Alaihis Salam aur Sarah Alaihi-as-Salam ek zhulim badshah ki hudood-e-saltanat se guzar rahe thay. Badshah ko khabar mili ke yahan ek shakhs aaya hua hai aur is ke sath dunya ki ek khubsoorat tareen aurat hai. Badshah ne Ibrahim Alaihis Salam ke paas apna aadmi bhej kar unhein bulwaya aur Sarah Alaihi-as-Salam ke mutalliq pucha ke ye kaun hain? Ibrahim Alaihis Salam ne farmaya ke ye meri behen hain. Phir aap Sarah Alaihi-as-Salam ke paas aaye aur farmaya ke Ae Sarah! Yahan mere aur tumhare siwa aur koi bhi momin nahi hai aur is badshah ne mujh se pucha to mein ne is se keh diya ke tum meri (deeni aitibar se) behen ho. Is liye ab tum koi aisi baat na kehna jis se mein jhoota banoon. Phir is zhulim ne Sarah ko bulwaya aur jab wo is ke paas gayeen to us ne un ki taraf hath badhana chaha lekin fauran hi pakad liya gaya. Phir wo kehne laga ke mere liye Allah se dua karo (ke is musibat se najat de) mein ab tumhein koi nuqsan nahi pahunchaoon ga. Chunanche unhon ne Allah se dua ki aur wo chhod diya gaya. Lekin phir doosri martaba us ne hath badhaya aur is martaba bhi isi tarah pakad liya gaya, balki is se bhi zyada sakht aur phir kehne laga ke Allah se mere liye dua karo, mein ab tumhein koi nuqsan nahi pahunchaoon ga. Sarah Alaihi-as-Salam ne dua ki aur wo chhod diya gaya. Is ke baad us ne apne kisi khidmat-gaar ko bula kar kaha ke tum log mere paas kisi insan ko nahi laye ho, ye to koi sarkash jinn hai (jate hue) Sarah Alaihis Salam ke liye us ne Hajra Alaihi-as-Salam ko khidmat ke liye diya. Jab Sarah aieen to Ibrahim Alaihis Salam khade namaz parh rahe thay. Aap ne hath ke isharah se un ka haal pucha. Unhon ne kaha ke Allah Ta'ala ne kafir ya (ye kaha ke) fajir ke fareeb ko usi ke munh par de mara aur Hajra Alaihi-as-Salam ko khidmat ke liye diya. Abu Hurairah (Radi Allahu Anhu) ne kaha ke Ae 'banī mā-i-s-samā-i' (Ae aasmani pani ki aulad! yaani ahl-e-Arab) tumhari walida yahi (Hajra Alaihi-as-Salam) hain
.

Hum se Abu-al-Yaman ne bayan kiya, kaha ke hum ko Shuaib ne khabar di, un se Abu-al-Zinad ne bayan kiya, un se Aaraj ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya, Ibrahim (Alaihis Salam) ne Sarah (Radi Allahu Anha) ke sath (Namrud ke mulk se) hijrat ki to ek aise shehar mein pohanche jahan ek badshah rehta tha ya (ye farmaya ke) ek zalim badshah rehta tha. Is se Ibrahim (Alaihis Salam) ke mutaliq kisi ne keh diya ke wo ek nihayat hi khoobsurat aurat le kar yahan aaye hain. Badshah ne Aap (Alaihis Salam) se puchwaya bheja ke Ibrahim! ye aurat jo tumhare sath hai tumhari kya hoti hai ? Unhon ne farmaya ke ye meri behen hai. Phir jab Ibrahim (Alaihis Salam) Sarah (Radi Allahu Anha) ke yahan aaye to un se kaha ke meri baat na jhutlana, mein tumhein apni behen keh aaya hoon. Allah ki qasam! aaj roye zameen par mere aur tumhare siwa koi momin nahi hai. Chunanche Aap (Alaihis Salam) ne Sarah (Radi Allahu Anha) ko badshah ke yahan bheja, ya badshah Sarah (Radi Allahu Anha) ke paas gaya. Is waqt Sarah (Radi Allahu Anha) wuzu kar ke namaz parhne khari ho gayi theen. Unhon ne Allah ke huzoor mein ye dua ki ke ”Ae Allah! agar mein tujh par aur tere Rasul (Ibrahim Alaihis Salam) par iman rakhti hoon aur agar mein ne apne shohar ke siwa apni sharmgah ki hifazat ki hai, to tu mujh par ek kafar ko musallat na kar.“ Itne mein badshah thar-raya aur is ka paon zameen mein dhans gaya. Aaraj ne kaha ke Abu Salma Bin Abdur Rahman ne bayan kiya, un se Abu Hurairah (Radi Allahu Anhu) ne bayan kiya, ke Sarah (Radi Allahu Anha) ne Allah ke huzoor mein dua ki ke Ae Allah! agar ye mar gaya to log kahein ge ke isi ne mara hai. Chunanche wo phir choot gaya aur Sarah (Radi Allahu Anha) ki taraf barha. Sarah (Radi Allahu Anha) wuzu kar ke phir namaz parhne lagi theen aur ye dua karti jati theen ”Ae Allah! agar mein tujh par aur tere Rasul par iman rakhti hoon aur apne shohar (Ibrahim Alaihis Salam) ke siwa aur har mauqa par mein ne apni sharmgah ki hifazat ki hai to tu mujh par is kafir ko musallat na kar.“ Chunanche wo phir thar-raya, kanpa aur is ke paon zameen mein dhans gaye. Abdur Rahman ne bayan kiya ke Abu Salma ne bayan kiya Abu Hurairah (Radi Allahu Anhu) se ke Sarah (Radi Allahu Anha) ne phir wahi dua ki ke ”Ae Allah! agar ye mar gaya to log kahein ge ke isi ne mara hai.“ Ab doosri martaba ya teesri martaba bhi wo badshah chor diya gaya. Aakhir wo kehne laga ke tum logon ne mere yahan ek shaitan bhej diya. Usay Ibrahim (Alaihis Salam) ke paas le jao aur unhein Ajar (Hajira) ko bhi de do. Phir Sarah Ibrahim (Alaihis Salam) ke paas aayiein aur un se kaha ke dekhte nahi Allah ne kafir ko kis tarah dhaleel kiya aur sath mein ek larki bhi dilwa di
.