Hum se Ahmad bin Yunus ne bayan kiya, unhon ne kaha hum se Zuhair bin Muawiyah ne bayan kiya, unhon ne kaha hum se Hisham bin Urwah ne Aisha Razi Allah Anha se, unhon ne kaha ke Nabi Kareem Sallallahu Alaihi Wasallam ne farmaya ke jab haiz ka zamana aaye to namaz chhod de aur jab yeh zamana guzar jaye to khoon ko dho aur namaz padh. 104665

Hum se Muhammed bin Salaam ne bayan kiya, kaha mujh se Abu Mu’aawiyah ne, kaha hum se Hishaam bin ’Urwah ne apne baap (Urwah) ke waaste se, woh Aisha Radhiallahu Anha se naql karte hain, woh farmaati hain ke Abu Hubaish ki beti Fatima Rasoolullah Sallallahu Alaihi Wasallam ki khidmat mein haazir hue aur us ne kaha ke main ek aisi aurat hun jise istihaaza ki beemari hai. Is liye main paak nahi rehti to kya main Namaz chhod dun? Aap Sallallahu Alaihi Wasallam ne farmaaya nahi, yeh ek rag (ka khoon) hai haiz nahi hai. To jab tujhe haiz aaye to Namaz chhod de aur jab yeh din guzar jaayen to apne (badan aur kapde) se khoon ko dho daal phir Namaz padh. Hishaam kehte hain ke mere baap Urwah ne kaha ke Nabi Kareem Sallallahu Alaihi Wasallam ne yeh (bhi) farmaaya ke phir har Namaz ke liye Wuzu kar yahan tak ke wahi (haiz ka) waqt phir aa jaaye.

Hum se Abdullah bin Yousuf ne bayan kiya, unhon ne kaha hum se Imam Malik ne Hishaam bin ’Urwah ke waaste se bayan kiya, unhon ne apne waalid se, unhon ne Aisha Radhiallahu Anha se, aap ne bayan kiya ke Fatima Abi Hubaish ki beti ne Rasoolullah Sallallahu Alaihi Wasallam se kaha ke ya Rasoolallah! Main to paak hi nahi hoti, to kya main Namaz bilkul chhod dun. Nabi-e-Kareem Sallallahu Alaihi Wasallam ne farmaaya ke yeh rag ka khoon hai haiz nahi is liye jab haiz ke din (jin mein kabhi pehle tumhein aadatan aaya karta tha) aayein to Namaz chhod de aur jab andaze ke mutabiq woh din guzar jaayen, to khoon dho daal aur Namaz padh.

Hum se Abdullah bin Muhammed Musnadi ne bayan kiya, kaha hum se Sufyan bin ’Uyainah ne Hishaam bin ’Urwah se, woh apne baap se, woh Aisha se ke Fatima Bint-e-Abi Hubaish ko istihaaza ka khoon aaya karta tha. To unhon ne Nabi-e-Kareem Sallallahu Alaihi Wasallam se us ke mutalliq poocha. Aap Sallallahu Alaihi Wasallam ne farmaaya ke yeh rag ka khoon hai aur haiz nahi hai. Is liye jab haiz ke din aayen to Namaz chhod diya kar aur jab haiz ke din guzar jaayen to ghusl kar ke Namaz padh liya kar.

Hum se Ahmad bin Abi Raja ne bayan kiya, unhon ne kaha humein Abu Usama ne khabar di, unhon ne kaha main ne Hisham bin Urwah se suna, kaha mujhe mere walid ne Aisha Razi Allah Anha ke wasita se khabar di ke Fatima bint Abi Hubaish Razi Allah Anha ne Nabi Kareem Sallallahu Alaihi Wasallam se poocha ke mujhe istihaza ka khoon aata hai aur main paak nahi ho pati, to kya main namaz chhod diya karoon? Aap Sallallahu Alaihi Wasallam ne farmaya nahi. Yeh to ek rag ka khoon hai, haan itne dinon mein namaz zaroor chhod diya kar jin mein is bemari se pehle tumhe haiz aaya karta tha. Phir ghusl kar ke namaz padha karo. 104658

Hum se Ibrahim bin al-Munzir Hizami ne bayan kiya, unhon ne kaha hum se Maan bin Isa ne bayan kiya, unhon ne Ayyub bin Abi Zaib se, unhon ne Ibn Shihab se, unhon ne Urwah aur Amrah se, unhon ne Aisha Razi Allah Anha se (jo Nabi Kareem Sallallahu Alaihi Wasallam ki biwi hain) ke Umm Habibah Razi Allah Anha saat saal tak mustahaza rahin. Unhon ne Nabi Kareem Sallallahu Alaihi Wasallam se is ke baare mein poocha to Aap Sallallahu Alaihi Wasallam ne unhein ghusl karne ka hukm diya aur farmaya ke yeh rag (ki wajah se bemari) hai. Pas Umm Habibah Razi Allah Anha har namaz ke liye ghusl karti thin. 104660