Hum se Abu Muammar ne bayan kiya, kaha hum se Abdul Waris ne bayan kiya, kaha ke mujh se Yahya Bin Abi Ishaq ne bayan kiya, aur un se Anas Bin Malik (Radi Allahu Anhu) ne bayan kiya ke (Ghazwa Banu Lihyan mein jo 6 Hijri mein hua) Usfan se wapas hote hue hum Rasul Allah (Sallallahu Alaihi Wasallam) ke sath thay. Aap apni ontni par sawar thay aur Aap ne sawari par peechhe (Umm-ul-Momineen) Safiya Bint Huyai (Radi Allahu Anha) ko bithaya tha. Ittefaq se Aap ki ontni phisal gayi aur Aap dono gir gaye. Ye haal dekh kar Abu Talha (Radi Allahu Anhu) bhi fauran apni sawari se kood pade aur kaha, Ya Rasul Allah! Allah mujhe Aap par qurban kare, kuch chot to nahi lagi? Aap (Sallallahu Alaihi Wasallam) ne farmaya: "Pehle aurat ki khabar lo." Abu Talha (Radi Allahu Anhu) ne ek kapda apne chehre par daal liya, phir Safiya (Radi Allahu Anha) ke qareeb aaye aur wahi kapda un ke upar daal diya. Is ke baad dono ki sawari durust ki, jab Aap sawar ho gaye to hum Aap (Sallallahu Alaihi Wasallam) ke charon taraf jama ho gaye. Phir jab Madinah dikhayi dene laga to Aap (Sallallahu Alaihi Wasallam) ne ye dua parhi "Aaibuna taibuna abiduna lirabbina hamiduna." "Hum Allah ki taraf wapas hone wale hain. Tauba karne wale, apne Rabb ki ibadat karne wale aur us ki hamd parhne wale hain." Aap (Sallallahu Alaihi Wasallam) ye dua barabar parhte rahe yahan tak ke Madinah mein dakhil ho gaye
.

Hum se Yaqub bin Ibrahim ne bayan kiya, kaha hum se Ismail bin Aliyyah ne ke kaha humein Abdul Aziz bin Suhaib ne Anas bin Malik Razi Allah Anhu se riwayat kar ke ke Nabi Kareem Sallallahu Alaihi Wasallam Ghazwa-e-Khaibar mein tashreef le gaye. Hum ne wahan fajr ki namaz andhere hi mein padhi. Phir Nabi Kareem Sallallahu Alaihi Wasallam sawar hue. Aur Abu Talhah bhi sawar hue. Main Abu Talhah ke peeche baitha hua tha. Nabi Kareem Sallallahu Alaihi Wasallam ne apni sawari ka rukh Khaibar ki galiyon ki taraf kar diya. Mera ghutna Nabi Kareem Sallallahu Alaihi Wasallam ki raan se chhoo jata tha. Phir Nabi Kareem Sallallahu Alaihi Wasallam ne apni raan se tehband ko hataya. Yahan tak ke main Nabi Kareem Sallallahu Alaihi Wasallam ki shaffaf aur safaid raanon ki safaidi aur chamak dekhne laga. Jab Aap Khaibar ki basti mein dakhil hue, to Aap Sallallahu Alaihi Wasallam ne farmaya «Allahu Akbar» Allah sab se bada hai, Khaibar barbad ho gaya, jab hum kisi qaum ke aangan mein utar jayen to draye hue logon ki subah manhoos ho jati hai. Aap ne yeh teen martaba farmaya, us ne kaha ke Khaibar ke Yahudi log apne kaamon ke liye bahar nikle hi thay ke woh chilla uthe Muhammad (Sallallahu Alaihi Wasallam) aan pahunche. Aur Abdul Aziz rawi ne kaha ke baaz Anas Razi Allah Anhu se riwayat karne wale hamare saathiyon ne «wal-khamees» ka lafz bhi naqal kiya hai (yani woh chilla uthe ke Muhammad Sallallahu Alaihi Wasallam lashkar le kar pahunch gaye) pas hum ne Khaibar lad kar fatah kar liya aur qaidi jama kiye gaye. Phir Dihyah Razi Allah Anhu aaye aur arz ki ke Ya Rasool Allah! Qaidiyon mein se koi baandi mujhe inayat kijiye, Aap Sallallahu Alaihi Wasallam ne farmaya ke jao koi baandi le lo. Unhon ne Safiyyah bint Huyai ko le liya. Phir ek shakhs Nabi Kareem Sallallahu Alaihi Wasallam ki khidmat mein hazir hua aur arz ki Ya Rasool Allah! Safiyyah jo Quraizah aur Nazeer ke sardar ki beti hain, unhein Aap ne Dihyah ko de diya. Woh to sirf Aap hi ke liye munasib thin. Is par Aap Sallallahu Alaihi Wasallam ne farmaya ke Dihyah ko Safiyyah ke sath bulao, woh laye gaye. Jab Nabi Kareem Sallallahu Alaihi Wasallam ne unhein dekha to farmaya ke qaidiyon mein se koi aur baandi le lo. Rawi ne kaha ke phir Nabi Kareem Sallallahu Alaihi Wasallam ne Safiyyah ko aazad kar diya aur unhein apne nikah mein le liya. Sabit Bunani ne Anas Razi Allah Anhu se poocha ke Abu Hamzah! Un ka mahr Nabi Kareem Sallallahu Alaihi Wasallam ne kya rakkha tha? Anas Razi Allah Anhu ne farmaya ke khud unhein ki aazadi un ka mahr tha aur isi par Aap ne nikah kiya. Phir raste hi mein Umm-e-Sulaim Razi Allah Anha (Anas Razi Allah Anhu ki walda) ne unhein dulhan banaya aur Nabi Kareem Sallallahu Alaihi Wasallam ke paas raat ke waqt bheja. Ab Nabi Kareem Sallallahu Alaihi Wasallam dulha thay, is liye Aap Sallallahu Alaihi Wasallam ne farmaya ke jis ke paas bhi kuch khane ki cheez ho to yahan laye. Aap ne ek chamre ka dastar khwan bichaya. Baaz sahaba khajur laye, baaz ghee, Abdul Aziz ne kaha ke mera khayal hai Anas Razi Allah Anhu ne sattu ka bhi zikr kiya. Phir logon ne un ka halwa bana liya. Yeh Rasool Allah Sallallahu Alaihi Wasallam ka walima tha.

Hum se Abul Yamaan ne byaan kiya , kaha ke hamein Shuayb ne Zuhri se khabar di , unhon ne Zuhri se poocha kya Nabi Karim salla Allahu alaihi wasallam ne Salat al-Khawf parhi thi? Is par unhon ne farmaya ke hamein Salim ne khabar di ke Abdullah bin Umar razi Allahu anhuma ne batlaya ke main Najd ki taraf Nabi Karim salla Allahu alaihi wasallam ke sath Ghazwa (Zaat ur-Riqa) mein shareek tha . Dushman se muqabla ke waqt hum ne safein bandhein . Is ke baad Rasool Allah salla Allahu alaihi wasallam ne hamein Khauf ki namaaz parhayi (to hum mein se) aik jamaat Aap salla Allahu alaihi wasallam ke sath namaaz parhne mein shareek ho gayi aur doosra giroh dushman ke muqabla mein khara raha . Phir Rasool Allah salla Allahu alaihi wasallam ne apni iqtada mein namaaz parhne walon ke sath aik ruku aur do sajde kiye . Phir yeh log laut kar is jamaat ki jagah aa gaye jis ne abhi namaaz nahi parhi thi . Ab doosri jamaat aayi . Un ke sath bhi Aap salla Allahu alaihi wasallam ne aik ruku aur do sajde kiye . Phir Aap salla Allahu alaihi wasallam ne salam pher diya . Is giroh mein se har shakhs khara hua aur us ne akele akele aik ruku aur do sajde ada kiye .

Hum se Haywah bin Shurayh ne byaan kiya , unhon ne kaha ke hum se Muhammad bin Harb ne Zubaidi se byaan kiya , un se Zuhri ne , un se Ubaidullah bin Abdullah bin Utbah bin Masood ne , un se Abdullah bin Abbas razi Allahu anhuma ne ke Nabi Karim salla Allahu alaihi wasallam kharay hue aur doosre log bhi Aap salla Allahu alaihi wasallam ki iqtada mein kharay hue . Nabi Karim salla Allahu alaihi wasallam ne takbeer kahi to logon ne bhi takbeer kahi . Aap salla Allahu alaihi wasallam ne ruku kiya to logon ne Aap salla Allahu alaihi wasallam ke sath ruku aur sajda kar liya tha woh kharay kharay apne bhaiyon ki nigrani karte rahe . Aur doosra giroh aaya . (jo ab tak hifazat ke liye dushman ke muqabla mein khara raha baad mein) us ne bhi ruku aur sajde kiye . Sab log namaaz mein thay lekin log aik doosre ki hifazat kar rahe thay .

Aur Ibn Ishaq ne bayan kiya ‘ unhon ne Wahb Bin Kaisan se suna ‘ unhon ne Jabir Radi Allahu Anhu se suna ke Nabi Kareem Sallallahu Alaihi Wasallam Ghazwa Zat-ur-Riqa ke liye maqam-e-Nakhl se ravana hue thay. Wahan Aap ka qabila-e-Ghatafan ki ek jamaat se samna hua lekin koi jung nahi hui aur kyunke musalmanon par kuffar ke (achanak hamle ka) khatra tha. Is liye Nabi Kareem Sallallahu Alaihi Wasallam ne do rakat namaz-e-khauf parhayi. Aur Yazid ne Salama Bin Al-Akwa Radi Allahu Anhu ke waste se bayan kiya ke mein Nabi Kareem Sallallahu Alaihi Wasallam ke sath Ghazwa Zu Qarad mein shareek tha
.

Aur Muaz ne bayan kiya ‘ in se Hisham ne bayan kiya ‘ in se Abu Zubair ne aur in se Jabir Radi Allahu Anhu ne bayan kiya ke hum Nabi Kareem Sallallahu Alaihi Wasallam ke sath maqam-e-Nakhl mein thay. Phir unhon ne namaz-e-khauf ka zikr kiya. Imam Malik ne bayan kiya ke namaz-e-khauf ke silsile mein jitni riwayaat mein ne suni hain ye riwayat in sab mein zyada behtar hai. Muaz Bin Hisham ke sath is hadees ko Laith Bin Saad ne bhi Hisham Bin Saad Madni se ‘ unhon ne Zaid Bin Aslam se riwayat kiya aur in se Qasim Bin Muhammad ne bayan kiya ke Nabi Kareem Sallallahu Alaihi Wasallam ne Ghazwa Banu Anmar mein (namaz-e-khauf) parhi thi
.

Hum se Abul Yaman ne bayan kiya ‘ kaha hum ko Shuaib ne khabar di ‘ in se Zuhri ne bayan kiya ‘ kaha ke mujhe Salim ne khabar di aur in se Ibn Umar (Radi Allahu Anhuma) ne ke mein Najd ki taraf Nabi Kareem Sallallahu Alaihi Wasallam ke sath ghazwa ke liye gaya tha. Wahan hum dushman ke aamne samne hue aur in ke muqable mein saff bandi ki
.

Hum se Abul Yaman ne bayan kiya ‘ kaha hum se Shuaib ne bayan kiya ‘ in se Zuhri ne bayan kiya ‘ in se Sinan aur Abu Salama ne bayan kiya aur unhein Jabir Radi Allahu Anhu ne khabar di ke wo Nabi Kareem Sallallahu Alaihi Wasallam ke sath atraf-e-Najd mein larayi ke liye gaye thay
.

Hum se Abdullah bin Yusuf ne byaan kiya , kaha hum se Imam Malik ne byaan kiya , un se Nafi ne ke jab Abdullah bin Umar razi Allahu anhuma se namaz e khauf ke mutalliq poocha jata to woh farmate ke Imam Musalmanon ki ek jama'at ko le kar khud aage barhe aur unhein ek rakat namaz parhaye . Is dauran mein Musalmanon ki doosri jama'at un ke aur dushman ke darmiyan mein rahe . Yeh log namaz mein abhi shareek na hon , phir jab Imam in logon ko ek rakat parha chuke jo pehle is ke saath thay to ab yeh log peeche hat jayein aur un ki jagah le lein , jinon ne ab tak namaz nahi parhi hai , lekin yeh log salam na pherein . Ab woh log aage barhein jinon ne namaz nahi parhi hai aur Imam unhein bhi ek rakat namaz parhaye , ab Imam do rakat parh chukne ke baad namaz se farigh ho chuka . Phir donon jama'atein (jinon ne alag alag Imam ke saath ek ek rakat namaz parhi thi) apni baqi ek ek rakat ada kar lein . Jabke Imam apni namaz se farigh ho chuka hai . Is tarah donon jama'aton ki do do rakat poori ho jayein gi . Lekin agar khauf is se bhi zyada hai to har shakhs tanha namaz parh le , paidal ho ya sawar , qibla ki taraf rukh ho ya na ho . Imam Malik ne byaan kiya , un se Nafi ne ke mujh ko yaqeen hai ke Abdullah bin Umar razi Allahu anhuma ne yeh baatein Rasool Allah salla Allahu alaihi wasallam se sun kar hi byaan ki hain .