Hum se Ibrahim Bin Hamza ne bayan kiya, kaha ke hum se Ibrahim Bin Saad ne bayan kiya, un se Salih Bin Kaisan ne, un se Ibn Shihab ne, un se Ubaidullah Bin Abdullah Bin Utba ne aur unhein Abdullah Bin Abbas (Radi Allahu Anhuma) ne khabar di ke Rasul Allah (Sallallahu Alaihi Wasallam) ne Qaisar ko ek khat likha jis mein aap (Sallallahu Alaihi Wasallam) ne ise Islam ki dawat di thi. Dahiya Kalbi (Radi Allahu Anhu) ko aap (Sallallahu Alaihi Wasallam) ne maktub de kar bheja aur unhein hukm diya ke maktub Busra ke governor ke hawala kar dein wo ise Qaisar tak pahuncha de ga. Jab Faris ki fauj (is ke muqable mein) shikast kha kar peeche hat gayi thi (aur is ke mulk ke maqbooda ilaqe wapas mil gaye thay) to is inam ke shukrana ke taur par jo Allah Ta'ala ne (is ka mulk ise wapas de kar) is par kiya tha abhi Qaisar Hims se Ailia (Bait-ul-Muqaddas) tak paidal chal kar aaya tha. Jab is ke paas Rasul Allah (Sallallahu Alaihi Wasallam) ka nama-e-mubarak pahuncha aur is ke samne parha gaya to us ne kaha ke agar in ki (Nabi Kareem Sallallahu Alaihi Wasallam ki) qaum ka koi shakhs yahan ho to ise talash kar ke lao taake mein is Rasul ke mutalliq is se kuch sawalat karun
.

Hum se Ishaq Bin Mansur ne bayan kiya, kaha hum ko Yaqub Bin Ibrahim ne khabar di, kaha mujhe mere bhatije Ibn Shihab ne khabar di, un se un ke chacha ne bayan kiya, unhein Abdullah Bin Abbas (Radi Allahu Anhuma) ne khabar di ke Rasul Allah (Sallallahu Alaihi Wasallam) ne (Room ke badshah) Qaisar ko (khat) likha jis mein aap (Sallallahu Alaihi Wasallam) ne ye bhi likha tha ke agar tum ne (Islam ki dawat se) munh mora to (apne gunah ke sath) in kasht-kaaron ka bhi gunah tum par pare ga (jin par tum hukm-rani kar rahe ho)
.