Hum se Saeed Bin Ufair ne bayan kiya, kaha hum se Yaqub Bin Abdur Rahman ne bayan kiya, un se Abu Hazim ne aur un se Sahl Bin Saad Saidi (Radi Allahu Anhu) ne bayan kiya ke jab Uhud ki larai mein Nabi Kareem (Sallallahu Alaihi Wasallam) ka khud aap (Sallallahu Alaihi Wasallam) ke sar mubarak par tora gaya aur chehra mubarak khoon-aalood ho gaya aur aap (Sallallahu Alaihi Wasallam) ke aage ke dant shaheed ho gaye to Ali (Radi Allahu Anhu) dhaal mein bhar-bhar kar pani bar-bar la rahe thay aur Fatima (Radi Allahu Anha) zakhm ko dho rahi thiin. Jab unhon ne dekha ke khoon pani se aur ziyada nikal raha hai to unhon ne ek chataayi jalayi aur us ki raakh ko aap (Sallallahu Alaihi Wasallam) ke zakhmon par laga diya, jis se khoon aana band ho gaya
.

Hum se Muhammed ne bayan kiya, kaha hum se Sufyan bin ’Uyainah ne Ibn-e-Abi Hazim ke waaste se naql kiya, unhon ne Sahl bin Sa’d As-Sa’idi se suna ke logon ne un se poocha, aur (main us waqt Sahl ke itna qareeb tha ke) mere aur un ke darmiyaan koi doosra haail na tha ke Rasoolullah Sallallahu Alaihi Wasallam ke (Uhud ke) zakhm ka ilaaj kis dawa se kiya gaya tha. Unhon ne kaha ke is baat ka jaanne waala (ab) mujh se ziyada koi nahi raha. ’Ali Radhiallahu Anhu apni dhaal mein paani laate aur Fatima Radhiallahu Anha Aap Sallallahu Alaihi Wasallam ke munh se khoon dhootien phir ek boriya ka tukda jalaya gaya aur Aap Sallallahu Alaihi Wasallam ke zakhm mein bhar diya gaya.

Hum se Abdullah Bin Maslama ne bayan kiya, kaha hum se Abdul Aziz Bin Abi Hazim ne bayan kiya, un se un ke walid ne aur un se Sahl Bin Saad Saidi (Radi Allahu Anhu) ne ke un se Uhud ki larai mein Nabi Kareem (Sallallahu Alaihi Wasallam) ke zakhmi hone ke mutalliq poocha gaya to unhon ne batlaya aap (Sallallahu Alaihi Wasallam) ke chehra mubarak par zakhm aaye aur aap (Sallallahu Alaihi Wasallam) ke aage ke dant toot gaye thay aur khud aap (Sallallahu Alaihi Wasallam) ke sar mubarak par toot gayi thi. (jis se sar par zakhm aaye thay) Fatima (Radi Allahu Anha) khoon dho rahi thiin aur Ali (Radi Allahu Anhu) pani daal rahe thay. Jab Fatima (Radi Allahu Anha) ne dekha ke khoon barabar barhta hi ja raha hai to unhon ne ek chataayi jalayi aur us ki raakh ko aap (Sallallahu Alaihi Wasallam) ke zakhmon par laga diya jis se khoon behna band ho gaya
.