Hum se Abdullah Bin Maslama ne bayan kiya, kaha hum se Hatim Bin Ismail ne bayan kiya, un se Yazid Bin Abi Ubaid ne bayan kiya, unhon ne Salama Bin Akwa (Radi Allahu Anhu) se suna, unhon ne bayan kiya ke Nabi Kareem (Sallallahu Alaihi Wasallam) ka qabila Banu Aslam ke chand logon par guzar hua jo teer andazi ki mashq kar rahe thay. Aap (Sallallahu Alaihi Wasallam) ne farmaya: Ismail (Alaihis Salam) ke beto! Teer andazi karo ke tumhare buzurg dada Ismail (Alaihis Salam) bhi teer-andaz thay. Haan! Teer andazi karo, mein bani falan (Ibn-ul-Aura Radi Allahu Anhu) ki taraf hoon. Bayan kiya, jab aap (Sallallahu Alaihi Wasallam) ek fareeq ke sath ho gaye to (muqable mein hissa lene wale) doosre ek fareeq ne hath rok liye. Aap (Sallallahu Alaihi Wasallam) ne farmaya kya baat pesh aayi, tum logon ne teer andazi band kyun kar di? Doosre fareeq ne arz kiya jab aap (Sallallahu Alaihi Wasallam) ek fareeq ke sath ho gaye to bhala hum kis tarah muqabla kar sakte hain. Is par Nabi Kareem (Sallallahu Alaihi Wasallam) ne farmaya accha teer andazi jari rakho mein tum sab ke sath hoon
.

Hum se Qutaiba Bin Said ne bayan kiya kaha hum se Hatim Bin Ismail ne bayan kiya un se Yazid Bin Abi Ubaid ne aur un se Salama Bin Akwa (Radi Allahu Anhu) ne bayan kiya ke Nabi Kareem (Sallallahu Alaihi Wasallam) qabile Aslam ki ek jamaat se guzre jo teer-andazi mein muqabala kar rahi thi. Rasul Allah (Sallallahu Alaihi Wasallam) ne farmaya "Ae Banu Ismail! Teer-andazi kiye jao kyunke tumhare buzurg dada bhi teer-andaz thay aur mein banu falan ke sath hoon." Rawi ne bayan kiya ke ye sunte hi doosre fareeq ne teer-andazi band kar di. Rasul Allah (Sallallahu Alaihi Wasallam) ne farmaya "Kya baat hui tum log teer kyun nahi chalate?" Unhon ne arz kiya: Ya Rasul Allah! Jab Aap fareeq-e-muqabil ke sath ho gaye to ab hum kis tarah teer chala sakte hain. Is par Rasul Allah (Sallallahu Alaihi Wasallam) ne farmaya "Muqabala jari rakho mein tum sab ke sath hoon."
.

Hum se Musaddad ne bayan kiya, kaha hum se Yahya ne bayan kiya, un se Yazid Bin Abi Ubaid ne aur un se Salamah Bin Akwa (Radi Allahu Anhu) ne bayan kiya ke Nabi Kareem (Sallallahu Alaihi Wasallam) qabila Aslam ke Sahaba ki taraf se guzre jo bazar mein teer andazi kar rahe thay to Aap (Sallallahu Alaihi Wasallam) ne farmaya: Ae aulad-e-Ismail! Khoob teer andazi karo ke tumhare baap Ismail (Alaihis Salam) bhi teer-andaz thay aur Aap (Sallallahu Alaihi Wasallam) ne farmaya mein falan jamaat ke sath hoon, ye sun kar doosri jamaat walon ne hath rok liye to Aap (Sallallahu Alaihi Wasallam) ne daryaft farmaya ke kya baat hui? Unhon ne arz kiya ke jab aap doosre fareeq ke sath ho gaye to phir hum kaise teer andazi karein? Aap (Sallallahu Alaihi Wasallam) ne farmaya ke tum teer andazi jari rakkho. Mein tum sab ke sath hoon
.