Hum se Qabisah ne bayan kiya, kaha hum se Sufyan Sauri ne bayan kiya aur un se Muawiyah ne yahi hadees aur Abu Sufyan ne Habib Bin Abi Umrah se yahi riwayat ki jo Aisha Bint Talha se Umm-ul-Momineen Aisha (Radi Allahu Anha) ke wasta se hai (is mein hai ke) Nabi Kareem (Sallallahu Alaihi Wasallam) se Aap ki azwaj-e-mutahharat ne jihad ki ijazat mangi to Aap (Sallallahu Alaihi Wasallam) ne farmaya ke hajj bahut hi umdah jihad hai
.

Hum se Abdul Rahman bin Mubarak ne byaan kiya , unhon ne kaha ke hum se Khalid bin Abdullah Tahhan ne byaan kiya , unhon ne kaha ke humein Habeeb bin Abi Umrah ne khabar di , unhein Aisha bint Talhah ne aur unhein Umm-ul-Moomineen Aisha Siddiqa razi Allahu anha ne kaha ke unhon ne poocha Ya Rasool Allah! Hum dekhte hain ke jihad sab naik kaamon se barh kar hai . Phir hum bhi kyun na jihad karein ? Nabi Karim salla Allahu alaihi wasallam ne farmaya ke nahi balke sab se afzal jihad Hajj hai jo mabroor ho .

Hum se Muhammad Bin Kaseer ne bayan kiya, kaha hum ko Sufyan Sauri ne khabar di, unhein Muawiyah Ibn Ishaq ne, unhein Aisha Bint Talha ne aur un se Umm-ul-Momineen Aisha (Radi Allahu Anha) ne bayan kiya ke mein ne Nabi Kareem (Sallallahu Alaihi Wasallam) se jihad ki ijazat chahi to Aap (Sallallahu Alaihi Wasallam) ne farmaya ke tumhara jihad hajj hai. Aur Abdullah Bin Waleed ne bayan kiya ke hum se Sufyan Sauri ne bayan kiya aur un se Muawiyah ne yahi hadees naqal ki
.