Hum se Abul Yaman ne bayan kiya ' kaha hum ko Shuaib ne khabar di ' unhon ne Zuhri se ' kaha mujh ko Saeed Bin Musayyib aur Abu Salamah Bin Abdur Rahman ne khabar di ke Abu Hurairah (Radi Allahu Anhu) ne kaha jab (Surat-ush-Shu'ara ki) ye ayat Allah Ta'ala ne utari «Wa Anzir Ashiratakal Aqrabina‏» aur apne nazdeek naate walon ko Allah ke azab se dara to Rasul Allah (Sallallahu Alaihi Wasallam) ne farmaya Quraish ke logo! Ya aisa hi koi aur kalma tum log apni apni janon ko (naik amaal ke badal) mol le lo (bacha lo) mein Allah ke samne tumhare kuch kaam nahi aoon ga (yaani is ki marzi ke khilaf mein kuch nahi kar sakoon ga) Abd Manaf ke beto! Mein Allah ke samne tumhare kuch kaam nahi aoon ga. Abbas Abdul Muttalib ke bete! Mein Allah ke samne tumhare kuch kaam nahi aoon ga. Safiyah meri phuphi! Allah ke samne tumhare kuch kaam nahi aoon ga. Fatima! Beti tu chahe mera maal mang le lekin Allah ke samne tere kuch kaam nahi aoon ga. Abul Yaman ke sath hadees ko Asbagh ne bhi Abdullah Bin Wahab se ' unhon ne Yunus se ' unhon ne Ibn Shihab se riwayat kiya
.

Hum se Umar bin Hafs ne byaan kiya ‘ unhon ne kaha ke mujh se mere baap ne byaan kiya Aamash se ‘ unhon ne kaha ke mujh se Amru bin Murrah ne byaan kiya ‘ un se Saeed bin Jubair ne aur un se Ibn Abbas razi Allahu anhuma ne byaan kiya ke Abu Lahab ne Nabi Karim salla Allahu alaihi wasallam se kaha ke saare din tujh par barbadi ho . Is par yeh aayat utri «tabbat yada abi lahabin wa tabb» yani toot gaye haath Abu Lahab ke aur woh khud hi barbad ho gaya .

(Imam Bukhari (Rahimahullah) ne) kaha ke hum se Qabisah ne bayan kiya, unhein Sufyan ne khabar di, unhein Habib Bin Abi Sabit ne, unhein Saeed Bin Jubair ne aur un se Ibn Abbas (Radi Allahu Anhuma) ne bayan kiya ke jab ye aayat «wa anzir asheera-takal aqrabina» ”And Aap apne qareebi rishtedaron ko daraiye.“ utri to Nabi Kareem (Sallallahu Alaihi Wasallam) ne alag alag qabail ko dawat di
.

Hum se Abu Al-Yaman ne bayan kiya, unhon ne kaha hum ko Shuaib ne khabar di, kaha hum ko Abu Az-Zinad ne khabar di, unhein Aaraj ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Ae Abde-Manaf ke beto! Apni jaanon ko Allah se khareed lo (yani naik kaam kar ke unhein Allah Ta'ala ke azab se bacha lo). Ae Abdul Muttalib ke beto! Apni jaanon ko Allah Ta'ala se khareed lo. Ae Zubair Bin Awwam ki walida! Rasul Allah ki phouphi, ae Fatima Bint-e-Muhammad! Tum dono apni jaanon ko Allah se bacha lo. Mein tumhare liye Allah ki bargah mein kuch ikhtiyar nahi rakhta. Tum dono mere maal mein jitna chaho maang sakti ho
."

Hum se Abu al-Yaman ne byaan kiya , kaha hum ko Shuayb ne khabar di , un se Zuhri ne byaan kiya , kaha mujh ko Saeed bin Musayyab aur Abu Salamah bin Abdur Rahman ne khabar di ke Abu Hurairah razi Allahu anhu ne byaan kiya , jab aayat «wa anzhir asheeratakal aqrabeena» ”aur apne khandan ke qarabati-daron ko dra“ nazil hui to Rasool Allah salla Allahu alaihi wasallam ne (Safa pahari par kharay ho kar) aawaz di ke Ae jama'at e Quraysh! Ya isi tarah ka aur koi kalma Aap salla Allahu alaihi wasallam ne farmaya ke Allah ki itaat ke zariye apni jaanon ko is ke azab se bachao (agar tum shirk o kufr se baaz na aaye to) Allah ke haan main tumhare kisi kaam nahi aaoon ga . Ae Bani Abd Manaf! Allah ke haan main tumhare liye bilkul kuch nahi kar sakoon ga . Ae Abbas bin Abdul Muttalib! Allah ki bargah mein main tumhare kuch kaam nahi aa sakoon ga . Ae Safiya , Rasool Allah ki phoopi! Main Allah ke yahan tumhein kuch faida na pahuncha sakoon ga . Ae Fatima! Muhammad (salla Allahu alaihi wasallam) ki beti! Mere maal mein se jo chaho mujh se le lo lekin Allah ki bargah mein , main tumhein koi faida na pahuncha sakoon ga . Is riwayat ki mutabia't Asbagh ne Ibn Wahb se , unhon ne Yunus se aur unhon ne Ibn Shihab se ki hai .