Aqeel ne Zuhri se bayan kiya ' un se Urwah ne aur un se Aisha (Radi Allahu Anha) ne ke Rasul Allah (Sallallahu Alaihi Wasallam) aurton ka (jo Makkah se musalman hone ki wajah se hijrat kar ke Madinah aati theen) imtihan lete thay (Zuhri ne) bayan kiya ke hum tak ye riwayat pahunchi hai ke jab Allah Ta'ala ne ye ayat nazil farmayi ke musalman wo sab kuch in mushrikon ko wapas kar dein jo unhon ne apni in biwiyon par kharch kiya ho jo (ab musalman ho kar) hijrat kar aayi hain aur musalmano ko hukm diya ke kafir aurton ko apne nikah mein na rakkhein to Umar (Radi Allahu Anhu) ne apni do biwiyon Quraibah Bint-e-Abi Umayyah aur ek Jarwal Khuza'i ki larki ko talaq de di. Baad mein Quraibah se Muawiyah (Radi Allahu Anhu) ne shadi kar li thi (kyunke us waqt Muawiyah Radi Allahu Anhu musalman nahi hue thay) aur doosri biwi se Abu Jahm ne shadi kar li thi lekin jab kuffar ne musalmano ke in ikhrajat ko ada karne se inkar kiya jo unhon ne apni (kafira) biwiyon par kiye thay to Allah Ta'ala ne ye ayat nazil farmayi «Wa In Fatakum Shai'un Min Azwajikum ilal Kuffari Fa'aqabtum‏» "Aur tumhari biwiyon mein se koi kafiron ke haan chali gayi to wo muawazah tum khud hi le lo." Ye wo muawazah tha jo musalman kuffar mein se is shakhs ko dete jis ki biwi hijrat kar ke (musalman hone ke baad kisi musalman ke nikah mein aa gayi ho) pas Allah ne ab ye hukm diya ke jis musalman ki biwi murtad ho kar (kuffar ke yahan) chali jaye us ke (mahar-o-nafaqah ke) ikhrajat in kuffar ki aurton ke mahar se ada kar diye jayein jo hijrat kar ke aa gayi hain (aur kisi musalman ne un se nikah kar liya hai) agarchay hamare paas is ka koi saboot nahi ke koi muhajirah bhi iman ke baad murtad hui hon aur humein ye riwayat bhi maloom hui ke Abu Basir Bin Asid Saqafi (Radi Allahu Anhu) jab Nabi Kareem (Sallallahu Alaihi Wasallam) ki khidmat mein momin-o-muhajir ki haisiyat se muahida ki muddat ke andar hi hazir hue to Akhnas Bin Shuraiq ne Nabi Kareem (Sallallahu Alaihi Wasallam) ko ek tahreer likhi jis mein us ne (Abu Basir Radi Allahu Anhu ki wapsi ka) mutaliba Aap (Sallallahu Alaihi Wasallam) se kiya tha. Phir unhon ne hadees poori bayan ki
.

Urwah ne kaha ke mujhe Aisha (Radi Allahu Anha) ne khabar di ke Rasul Allah (Sallallahu Alaihi Wasallam) hijrat karne wali aurton ka is ayat ki wajah se imtihan liya karte thay «{‏ Ya Ayyuhallazina Amanu Izaja Akumul Mu'minatu Muhajiratin Famta'hinuhunna ‏}‏ ila ‏ {‏ Ghafurun Rahim‏ }‏‏.» "Ae musalmano! Jab tumhare yahan musalman aurtein hijrat kar ke aayin to tum un ka imtihan le lo Ghafurun Rahim tak." Urwah ne kaha ke Aisha (Radi Allahu Anha) ne kaha ke in aurton mein se jo is shart ka iqrar kar letein to Rasul Allah (Sallallahu Alaihi Wasallam) farmate ke mein ne tum se bai'at ki, Aap (Sallallahu Alaihi Wasallam) sirf zaban se bai'at karte thay. Qasam Allah ki! Bai'at karte waqt Aap (Sallallahu Alaihi Wasallam) ke hath ne kisi bhi aurat ke hath ko kabhi nahi chhuwa, balki Aap (Sallallahu Alaihi Wasallam) sirf zaban se bai'at liya karte thay
.