Hum se Yahya Bin Bukair ne bayan kiya, kaha hum se Laith ne bayan kiya, un se Aqeel ne, un se Ibn Shihab ne bayan kiya, unhein Urwah Bin Zubair ne khabar di, unhon ne Khalifa Marwan aur Miswar Bin Makhramah (Radi Allahu Anhu) se suna, ye dono hazrat ashaab Rasul Allah (Sallallahu Alaihi Wasallam) se khabar dete thay ke jab Suhail Bin Amr ne (Hudaibiyah mein kuffar-e-Quraish ki taraf se muahida-e-sulh) likhwaya to jo sharait Nabi Kareem (Sallallahu Alaihi Wasallam) ke samne Suhail ne rakhi theen, un mein ye shart bhi theen ke hum mein se koi bhi shakhs agar aap ke yahan (farar ho kar) chala jaye khwah wo aap ke deen par hi kyun na ho to aap ko use hamare hawala karna hoga. Musalman ye shart pasand nahi kar rahe thay aur is par unhein dukh hua tha. Lekin Suhail ne is shart ke baghair sulh qabool na ki. Aakhir Aap (Sallallahu Alaihi Wasallam) ne isi shart par sulh namah likhwa liya. Ittifaq se isi din Abu Jandal (Radi Allahu Anhu) ko jo musalman ho kar aya tha (muahida ke tehat badil-e-nakhwasta) un ke walid Suhail Bin Amr ke hawale kar diya gaya. Isi tarah muddat-e-sulh mein jo mard bhi Aap (Sallallahu Alaihi Wasallam) ki khidmat mein (Makkah se bhag kar aya) Aap (Sallallahu Alaihi Wasallam) ne ise un ke hawale kar diya. Khwah wo musalman hi kyun na raha ho. Lekin chand iman wali aurtein bhi hijrat kar ke aa gayi theen, Umm Kulsum Bint-e-Uqbah Bin Abi Muait (Radi Allahu Anha) bhi un mein shamil theen jo isi din (Makkah se nikal kar) Aap (Sallallahu Alaihi Wasallam) ki khidmat mein aayi theen, wo jawan theen aur jab un ke ghar wale aaye aur Rasul Allah (Sallallahu Alaihi Wasallam) se un ki wapsi ka mutaliba kiya, to Aap (Sallallahu Alaihi Wasallam) ne unhein un ke hawale nahi farmaya, balki aurton ke mutaliq Allah Ta'ala (Surat-ul-Mumtahina mein) irshad farma chuka tha «{‏ Izaja Akumul Mu'minatu Muhajiratin Famta'hinuhunna Allahu A'lamu Bi'imanihinna‏ }‏ ila qaulihi ‏ {‏ Wala Hum Ya'hilluna Lahunna‏ }‏‏.» "Jab musalman aurtein tumhare yahan hijrat kar ke pahuchein to pehle tum un ka imtihan le lo, yun to un ke iman ke mutaliq janne wala Allah Ta'ala hi hai. Allah Ta'ala ke is irshad tak ke "Kuffar-o-Mushrikeen un ke liye halal nahi hain alkh."
.

Hum se Ahmad Bin Muhammad ne bayan kiya, unhon ne kaha hum ko Abdullah ne khabar di, unhon ne kaha ke hum ko Ma'mar ne khabar di, unhein Zuhri ne, unhein Urwah Bin Zubair ne, aur un se Miswar Bin Makhramah (Radi Allahu Anhuma) aur Marwan ne bayan kiya ke Nabi Kareem (Sallallahu Alaihi Wasallam) Madinah se taqreeban apne ek hazar sathiyon ke sath (Haj ke liye nikle) jab Zi Al-Hulaifah pohanche to Nabi Kareem (Sallallahu Alaihi Wasallam) ne hadyi ko haar pehnaya aur ishaar kiya phir Umrah ka ihram bandha
.

Hum se Ahmad Bin Muhammad ne bayan kiya, unhon ne kaha hum ko Abdullah ne khabar di, unhon ne kaha ke hum ko Ma'mar ne khabar di, unhein Zuhri ne, unhein Urwah Bin Zubair ne, aur un se Miswar Bin Makhramah (Radi Allahu Anhuma) aur Marwan ne bayan kiya ke Nabi Kareem (Sallallahu Alaihi Wasallam) Madinah se taqreeban apne ek hazar sathiyon ke sath (Haj ke liye nikle) jab Zi Al-Hulaifah pohanche to Nabi Kareem (Sallallahu Alaihi Wasallam) ne hadyi ko haar pehnaya aur ishaar kiya phir Umrah ka ihram bandha
.