Hum se Abu Asim ne bayan kiya Amr Bin Saeed se, wo Ibn Abi Mulaika se, un se Uqbah Bin Haris (Radi Allahu Anhu) ne bayan kiya ke mein ne ek aurat se shadi ki thi. Phir ek aurat aayi aur kehne lagi ke mein ne tum donon ko doodh pilaya tha. Is liye mein Nabi Kareem (Sallallahu Alaihi Wasallam) ki khidmat mein hazir hua. Aap (Sallallahu Alaihi Wasallam) ne farmaya "Jab tumhein bata diya gaya (ke ek hi aurat tum donon ki doodh ki maan hai) to phir ab aur kya soorat ho sakti hai apni biwi ko apne se juda kar de." Ya isi tarah ke alfaz Aap (Sallallahu Alaihi Wasallam) ne farmaye
.

Hum se Abul Hasan Muhammed bin Muqaatil ne bayan kiya, unhein Abdullah ne khabar di, unhein Umar bin Sa’eed bin Abi Husain ne khabar di, un se Abdullah bin Abi Mulaikah ne ’Uqbah Ibn-ul-Harith ke waaste se naql kiya ke ’Uqbah ne Abu Ihaab bin Aziz ki ladki se nikah kiya to un ke paas ek aurat aayi aur kehne lagi ke main ne ’Uqbah ko aur jis se us ka nikah huwa hai, us ko doodh pilaaya hai. (Yeh sun kar) ’Uqbah ne kaha, mujhe nahi ma’loom ke tu ne mujhe doodh pilaaya hai aur na tu ne kabhi mujhe bataaya hai. Tab ’Uqbah sawaar ho kar Rasoolullah Sallallahu Alaihi Wasallam ki khidmat mein Madinah Munawwarah haazir huwe aur Aap se us ke mutalliq daryaaft kiya, to Aap Sallallahu Alaihi Wasallam ne farmaaya, kis tarah (tum us ladki se rishta rakhoge) halaanke (us ke mutalliq yeh) kaha gaya tab ’Uqbah bin Harith ne us ladki ko chor diya aur us ne doosra khaawind kar liya.

Hum se Muhammad Bin Kathir ne bayan kiya, kaha ke hum ko Sufyan Thauri ne khabar di, unhein Abdullah Bin Abdur Rahman Bin Abi Husain ne khabar di, un se Abdullah Bin Abi Mulaika ne bayan kiya, un se Uqba Bin Harith (Radi Allahu Anhu) ne ke ek siyah faam khatoon aayiein aur dawa kiya ke unhon ne in donon (Uqba aur un ki biwi) ko doodh pilaya hai. Uqba ne is amr ka zikr Rasul Allah (Sallallahu Alaihi Wasallam) se kiya to Aap (Sallallahu Alaihi Wasallam) ne apna chehra mubarak pher liya aur muskura kar farmaya. Ab jab ke ek baat keh di gayi to tum donon ek sath kis tarah reh sakte ho. Un ke nikah mein Abu Ihab Tamimi ki sahab zadi theen
.

Hum se Habban ne bayan kiya, kaha ke hum ko Abdullah ne khabar di, kaha hum ko Amr Bin Saeed Bin Abi Hussain ne khabar di, kaha ke mujhe Abdullah Bin Abi Mulaika ne khabar di aur unhein Uqbah Bin Haris (Radi Allahu Anhu) ne ke unhon ne Abu Ihab Bin Aziz ki larki se shadi ki thi. Ek khatoon aaein aur kehne lagein ke Uqbah ko bhi mein ne doodh pilaya hai aur ise bhi jis se us ne shadi ki hai. Uqbah (Radi Allahu Anhu) ne kaha ke mujhe to maloom nahi ke aap ne mujhe doodh pilaya hai aur aap ne mujhe pehle is silsile mein kuch bataya bhi nahi tha. Phir unhon ne Aal-e-Abu Ihab ke yahan aadmi bheja ke un se is ke mutalliq pooche. Unhon ne bhi yahi jawab diya ke hamein maloom nahi ke unhon ne doodh pilaya hai. Uqbah (Radi Allahu Anhu) ab Rasul Allah (Sallallahu Alaihi Wasallam) ki khidmat mein Madinah hazir hue aur Aap (Sallallahu Alaihi Wasallam) se masla poocha. Aap (Sallallahu Alaihi Wasallam) ne farmaya, ab kya ho sakta hai jab ke kaha ja chuka. Chunanchay Aap (Sallallahu Alaihi Wasallam) ne donon mein judayi kara di aur is ka nikah doosre shaks se kara diya
.

Hum se Abu Asim ne bayan kiya, kaha hum se Ibn Juraij ne, wo Ibn Abi Mulaika se, un se Uqbah Bin Haris (Radi Allahu Anhu) ne (doosri sanad) Imam Bukhari (Rahimahullah) ne kaha aur hum se Ali Bin Abdullah ne bayan kiya, kaha hum se Yahya Bin Saeed ne bayan kiya, un se Ibn Juraij ne bayan kiya ke mein ne Ibn Abi Mulaika se suna, kaha ke mujh se Uqbah Bin Haris (Radi Allahu Anhu) ne bayan kiya, ya (ye kaha ke) mein ne ye hadees un se suni ke unhon ne Umm-e-Yahya Bint Abi Ihab se shadi ki thi. Unhon ne bayan kiya ke phir ek siyah rang wali bandi aayi aur kehne lagi ke mein ne tum donon ko doodh pilaya hai. Mein ne is ka zikar Rasul Allah (Sallallahu Alaihi Wasallam) se kiya, to Aap (Sallallahu Alaihi Wasallam) ne meri taraf se munh pher liya pas mein juda ho gaya. Mein ne phir Aap (Sallallahu Alaihi Wasallam) ke samne ja kar is ka zikar kiya, to Aap (Sallallahu Alaihi Wasallam) ne farmaya, ab (nikah) kaise (baqi reh sakta hai) jabke tumhein is aurat ne bata diya hai ke is ne tum donon ko doodh pilaya tha. Chunanchay Aap (Sallallahu Alaihi Wasallam) ne unhein Umm-e-Yahya ko apne sath rakhne se mana farma diya
.

Aur Imam Ahmad bin Hanbal ne mujh se kaha ke hum se Yahya bin Saeed Qattan ne byaan kiya , unhon ne Sufyan Sawri se , kaha mujh se Habib bin Abi Sabit ne byaan kiya , unhon ne Saeed bin Jubayr se , unhon ne Ibn Abbas razi Allahu anhuma se , unhon ne kaha khoon ki roo se tum par saat rishte haram hain aur shadi ki wajah se (yani sasural ki taraf se) saat rishte bhi . Unhon ne yeh aayat parhi «hurrimat alaykum ummahatukum» aakhir tak . Aur Abdullah bin Jafar bin Abi Talib ne Ali razi Allahu anhu ki sahibzadi Zaynub aur Ali ki bi bi (Laila bint Masood) donon se nikah kiya , un ko jama kiya aur Ibn Sireen ne kaha is mein koi qabahat nahi hai aur Imam Hasan Basri ne ek baar to usay makrooh kaha phir kehne lage is mein koi qabahat nahi hai aur Hasan bin Hasan bin Ali bin Abi Talib ne apne donon chachaon (yani Muhammad bin Ali aur Amr bin Ali) ki betiyon ko ek saath mein nikah mein le liya aur Jabir bin Zayd tabiy ne is ko makrooh jaana , is khayal se ke behnon mein jalapa na paida ho magar yeh kuch haram nahi hai kyunke Allah Ta'ala ne farmaya «wa uhilla lakum ma wara'a zhaalikum» ke in ke siwa aur sab auratein tum ko halal hain . Aur Ikrimah ne Ibn Abbas razi Allahu anhuma se riwayat kiya ke agar kisi ne apni saali se zina kiya to is ki biwi (saali ki behen) is par haram na ho gi . Aur Yahya bin Qays Kindi se riwayat hai , unhon ne Shabi aur Jafar se , donon ne kaha agar koi shakhs liwaatat kare aur kisi launde ke dukhool kar de to ab is ki maan se nikah na kare . Aur Yahya rawi mashhoor shakhs nahi hai aur na kisi aur ne is ke saath ho kar yeh riwayat ki hai aur Ikrimah ne Ibn Abbas razi Allahu anhuma se riwayat ki ke agar kisi ne apni saas se zina kiya to is ki biwi is par haram na ho gi . Aur Abu Nasr ne Ibn Abbas razi Allahu anhuma se riwayat ki ke haram ho jaye gi aur is rawi Abu Nasr ka haal maloom nahi . Is ne Ibn Abbas razi Allahu anhuma se suna hai ya nahi (lekin Abu Zurah ne isay siqa kaha hai) aur Imran bin Husain aur Jabir bin Zayd aur Hasan Basri aur baaz Iraq walon (Imam Sawri aur Imam Abu Hanifa rahmahullah) ka yahi qaul hai ke haram ho jaye gi . Aur Abu Hurairah razi Allahu anhu ne kaha haram na ho gi jab tak is ki maan (apni khush-daman) ko zameen se na laga de (yani is se jima na kare) aur Saeed bin Musayyab aur Urwah aur Zuhri ne is ke mutalliq kaha hai ke agar koi saas se zina kare tab bhi is ki beti yani zina karne wale ki biwi is par haram na ho gi (us ko rakh sakta hai) aur Zuhri ne kaha Ali razi Allahu anhu ne farmaya ke is ki joru is par haram na ho gi aur yeh riwayat munqata hai .