Hum se Malik Bin Ismail ne bayan kiya, kaha hum se Sufyan Bin Uyaina ne bayan kiya Zuhri se, un se Ubaidullah Bin Abdullah Bin Utba Bin Masood ne bayan kiya, kaha mein ne Abu Hurairah aur Zaid Bin Khalid (Radi Allahu Anhuma) se suna ke Nabi Kareem (Sallallahu Alaihi Wasallam) ne farmaya "Jab bandi zina karaye to ise (bataur-e-hadd-e-shari) kore lagao phir agar karaye to ise kore lagao teesri ya chauthi baar mein (Aap Sallallahu Alaihi Wasallam ne farmaya ke) phir ise bech do, khwah qeemat mein ek rassi hi mile."
.

Hum se Abdullah Bin Yusuf ne bayan kiya, kaha ke hum se Liath ne bayan kiya, kaha ke mujhe Saeed Maqbari ne khabar di, un se un ke baap ne, aur unhon ne Abu Hurairah (Radi Allahu Anhu) ko ye kehte suna ke Nabi Kareem (Sallallahu Alaihi Wasallam) ne farmaya jab koi bandi zina kare aur is ke zina ka saboot (sharaee) mil jaye to usay kore lagwaye, phir is ki lanat malamat na kare. Is ke baad agar phir wo zina kare to phir kore lagwaye magar phir lanat malamat na kare. Phir agar teesri martaba bhi zina kare to usay bech de chahe baal ki ek rasi ke badla hi mein kyun na ho
.

Hum se Qutaiba ne bayan kiya, kaha ke hum se Abdul Wahhab ne bayan kiya, un se Muhammad Bin Sireen ne, un se Abu Hurairah (Radi Allahu Anhu) ne bayan kiya ke do tarah ke libas pehn-ne mana hain. ke koi aadmi ek hi kapre mein got maar kar baithe, phir usay monde par utthakar daal le (aur sharmgah khuli rahe) aur do tarah ki bai se mana kiya ek bai-e-mulamasa se aur doosri bai-e-munabaza se
.