Hum se Musa Bin Ismail ne bayan kiya, kaha hum se Juwairiyah Bin Asma ne bayan kiya, un se Nafi ne aur un se Abdullah (Radi Allahu Anhu) ne ke Rasul Allah (Sallallahu Alaihi Wasallam) ne Khaibar ki zameen Yahudiyon ko is shart par de di thi ke wo is mein mehnat karein aur boein jotein. Paidawar ka aadha hissa unhein mila kare ga
.

Hum se Musa Bin Ismail ne bayan kiya, kaha ke hum se Juwairiyah Bin Asma ne bayan kiya, un se Nafi ne aur un se Abdullah (Radi Allahu Anhu) ne ke Rasul Allah (Sallallahu Alaihi Wasallam) ne (Yahoodiyon ko) Khaibar ki zameen day di thi ke is mein mehnat ke sath kasht karein aur paidawar ka aadha hissa khud lay liya karein. Ibn Umar (Radi Allahu Anhuma) ne Nafi se ye bayan kiya ke zameen kuch kiraya par di jati thi. Nafi ne is kiraya ki tayein bhi kar di thi lekin wo mujhe yaad nahi raha
.

Hum se Ibrahim Bin Munzir ne bayan kiya, kaha hum se Anas Bin Iyadh ne bayan kiya, un se Ubaidullah Umri ne, un se Nafi ne aur unhein Abdullah Bin Umar (Radi Allahu Anhuma) ne khabar di ke Rasul Allah (Sallallahu Alaihi Wasallam) ne (Khaibar ke Yahoodiyon se) wahan (ki zameen mein) phal kheti aur jo bhi paidawar ho is ke aadhe hisse par muamla kiya tha. Aap (Sallallahu Alaihi Wasallam) is mein se apni biwiyon ko sau wasaq dete thay. Jis mein assi wasaq khajoor hoti aur bees wasaq jau. Umar (Radi Allahu Anhu) ne (apne ahad-e-khilafat mein) jab Khaibar ki zameen taqseem ki to Azwaj-e-Mutahiraat ko Aap ne is ka ikhtiyar diya ke (agar wo chahein to) unhein bhi wahan ka pani aur qita-e-zameen day diya jaye. Ya wahi pehli surat baqi rakkhi jaye. Chunanche baaz ne zameen lena pasand kiya. Aur baaz ne (paidawar se) wasaq lena pasand kiya. Aisha (Radi Allahu Anha) ne zameen hi lena pasand kiya thi
.

Hum se Musaddad ne bayan kiya, kaha ke hum se Yahya Bin Saeed ne bayan kiya, un se Ubaidullah ne, un se Nafi ne, aur un se Abdullah Bin Umar (Radi Allahu Anhuma) ne ke Nabi Kareem (Sallallahu Alaihi Wasallam) ne Khaibar ke phal aur anaj ki aadhi paidawar par wahan ke rehne walon se muamla kiya tha
.

Hum se Muhammad Bin Muqatil ne bayan kiya, unhon ne kaha ke hum ko Abdullah Bin Mubarak ne khabar di, unhein Ubaidullah ne khabar di, unhein Nafi ne aur un se Abdullah Bin Umar (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne Khaibar ki zameen Yahoodiyon ko is shart par saunpi thi ke is mein mehnat karein aur jotein boyein aur is ki paidawar ka aadha hissa lein
.

Hum se Ahmad Bin Miqdam ne bayan kiya, unhon ne kaha ke hum se Fudail Bin Sulaiman ne bayan kiya, un se Musa Bin Uqbah ne bayan kiya ke unhein Nafi ne khabar di, aur un se Abdullah Bin Umar (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne (jab Khaibar par) fatah hasil ki thi (doosri sanad) aur Abdur Razzaq ne kaha ke hum ko Ibn Jurayj ne khabar di, kaha ke mujh se Musa Bin Uqbah ne bayan kiya, un se Nafi ne, un se Ibn Umar (Radi Allahu Anhuma) ne ke Umar Bin Khattab (Radi Allahu Anhu) ne Yahoodiyon aur Isaiyon ko sar-zameen-e-Hijaz se nikal diya tha aur jab Nabi Kareem (Sallallahu Alaihi Wasallam) ne Khaibar par fatah payi to Aap ne bhi Yahoodiyon ko wahan se nikalna chaha tha. Jab Aap ko wahan fatah hasil hui to is ki zameen Allah aur is ke Rasul (Sallallahu Alaihi Wasallam) aur Musalmanon ki ho gayi thi. Aap ka irada Yahoodiyon ko wahan se bahar karne ka tha, lekin Yahoodiyon ne Rasul Allah (Sallallahu Alaihi Wasallam) se darkhwast ki ke Aap humein yahin rehne dein. Hum (Khaibar ki arazi ka) saara kaam khud kareinge aur is ki paidawar ka nisf hissa lay leinge. Is par Rasul Allah (Sallallahu Alaihi Wasallam) ne farmaya ke accha jab tak hum chahein tumhe is shart par yahan rehne dein ge. Chunanche wo log wahin rahe aur phir Umar (Radi Allahu Anhu) ne unhein Taima aur Ariha ki taraf jala watan kar diya
.

Hum se Musa ne bayan kiya, kaha hum se Juwairiyah Bin Asma ne bayan kiya, un se Nafi ne aur un se Abdullah (Radi Allahu Anhu) ne ke Rasul Allah (Sallallahu Alaihi Wasallam) ne Khaibar ki zameen Yahoodiyon ko is shart par di thi ke is mein kaam karein aur ise boyein to adhi paidawar unhein di jaya karegi
.

Hum se Abu Ahmad Murar Bin Hamuyah ne bayan kiya ' kaha ke hum se Muhammad Bin Yahya Abu Ghassan Kanani ne bayan kiya ' kaha hum ko Imam Malik ne khabar di Nafi se aur un se Abdullah Bin Umar (Radi Allahu Anhuma) ne kaha ke jab un ke hath paon Khaibar walon ne tor dale to Umar (Radi Allahu Anhu) khutba dene ke liye kharay hue ' Aap (Radi Allahu Anhu) ne farmaya ke Rasul Allah (Sallallahu Alaihi Wasallam) ne jab Khaibar ke Yahoodiyon se un ki jaidad ka maamla kiya tha to Aap (Sallallahu Alaihi Wasallam) ne farmaya tha ke jab tak Allah Ta'ala tumhein qaim rakkhe hum bhi qaim rakkhein ge aur Abdullah Bin Umar (Radi Allahu Anhuma) wahan apne amwal ke silsile mein gaye to raat mein un ke sath maar peet ka maamla kiya gaya jis se un ke paon toot gaye. Khaibar mein un ke siwa aur koi hamara dushman nahi ' wahi hamare dushman hain aur unhi par humein shubha hai is liye mein unhein jila watan kar dena hi munasib janta hoon. Jab Umar (Radi Allahu Anhu) ne is ka pukhta irada kar liya to Banu Abi Haqeeq (ek Yahoodi khandan) ka ek shakhs tha ' aya aur kaha ya Ameer-ul-Momineen kya aap humein jila watan kar dein ge halankey Muhammad (Sallallahu Alaihi Wasallam) ne humein yahan baqi rakkha tha aur hum se jaidad ka ek maamla bhi kiya tha aur is ki humein Khaibar mein rehne dene ki shart bhi aap ne lagayi thi. Umar (Radi Allahu Anhu) ne is par farmaya kya tum ye samajhte ho ke mein Rasul Allah (Sallallahu Alaihi Wasallam) ka farman bhool gaya hoon. Jab Rasul Allah (Sallallahu Alaihi Wasallam) ne kaha tha ke tumhara kya haal hoga jab tum Khaibar se nikale jao ge aur tumhare oont tumhein raaton raat liye phirein ge. Us ne kaha ye Abul Qasim (Aap Sallallahu Alaihi Wasallam) ka ek mazaaq tha. Umar (Radi Allahu Anhu) ne farmaya: Allah ke dushman! Tum ne jhooti baat kahi. Chunancha Umar (Radi Allahu Anhu) ne unhein shehar badar kar diya aur un ke phalon ki kuch naqd qeemat kuch maal aur oont aur doosre saman yaani kajawe aur rasiyon ki surat mein ada kar di. Is ki riwayat Hammad Bin Salamah ne Ubaidullah se naqal ki hai jaisa ke mujhe yaqeen hai Nafi se aur unhon ne Ibn Umar (Radi Allahu Anhuma) se aur unhon ne Umar (Radi Allahu Anhu) se aur unhon ne Nabi Kareem (Sallallahu Alaihi Wasallam) se mukhtasar taur par
.

Mujh se Ahmad Bin Miqdam ne bayan kiya, kaha hum se Fazl Bin Sulaiman ne bayan kiya, kaha hum se Musa Bin Uqba ne bayan kiya, kaha ke mujhe Nafi ne khabar di, unhein Abdullah Bin Umar (Radi Allahu Anhuma) ne ke Umar ne Yahud-o-Nasara ko sarr zameen-e-Hijaz se nikal kar doosri jagah basa diya tha. Rasul Allah (Sallallahu Alaihi Wasallam) ne jab Khaibar fatah kiya to aap ka bhi irada hua tha ke Yahudiyon ko yahan se nikal diya jaye. Jab aap ne fatah payi to is waqt wahan ki kuch zameen Yahudiyon ke qabze mein hi thi. Aur aksar zameen Paighambar-e-Alaihis Salam aur Musalmanon ke qabze mein thi. Lekin phir Yahudiyon ne Aap (Sallallahu Alaihi Wasallam) se darkhwast ki, aap zameen unhi ke paas rehne dein. Wo (kheton aur baghon mein) kaam kiya kareinge. Aur aadhi paidayish leinge. Aap (Sallallahu Alaihi Wasallam) ne farmaya "Accha jab tak hum chaheinge is waqt tak ke liye tumhein is shart par yahan rehne dein ge. Chunanche ye log wahin rahe aur phir Umar Radi Allahu Anhu ne unhein apne daur-e-khilafat mein (Musalmanon ke khilaf un ke fitnon aur sazishon ki wajah se Yahud-e-Khaibar ko) Taima ya Ariha ki taraf nikal diya tha."
.

Hum se Musa Bin Ismail ne bayan kiya ‘ kaha hum se Juwairiya ne bayan kiya ‘ in se Nafi ne in se Abdullah ne bayan kiya ke Nabi Kareem Sallallahu Alaihi Wasallam ne Khaibar (ki zameen-o-baghat wahan ke) Yahoodiyon ke pas hi rehne diye thay ke wo in mein kaam karein aur boein jotein aur unhein in ki paidawar ka aadha hissa mile ga
.