Hum se Ali Bin Abdullah ne bayan kiya, kaha hum se Sufyan Bin Uyainah ne bayan kiya, ke Amr Bin Dinar ne kaha ke mein ne Tawus se arz kiya, kaash! aap batayi ka muamla chhor dete, kyunke in logon (Rafi Bin Khadij aur Jabir Bin Abdullah Radi Allahu Anhum waghairah) ka kehna hai ke Nabi Kareem (Sallallahu Alaihi Wasallam) ne is se mana farmaya hai. Is par Tawus ne kaha ke mein to logon ko zameen deta hoon aur in ka faida karta hoon. Aur Sahaba mein jo bade aalim thay unhon ne mujhe khabar di hai. Aap ki murad Ibn Abbas (Radi Allahu Anhuma) se thi ke Nabi Kareem (Sallallahu Alaihi Wasallam) ne is se nahi roka. Balkay Aap ne sirf ye farmaya tha ke agar koi shakhs apne bhai ko (apni zameen) muft de-day to ye is se behtar hai ke is ka mahsool lay
.

Hum se Muhammad Bin Muqatil ne bayan kiya, kaha ke hum ko Abdullah Bin Mubarak ne khabar di, unhein Imam Awzai ne khabar di, unhein Rafi Bin Khadij (Radi Allahu Anhu) ke ghulam Abu Najashi ne, unhon ne Rafi Bin Khadij Bin Rafi (Radi Allahu Anhu) se suna, aur unhon ne apne chacha Zuhair Bin Rafi (Radi Allahu Anhu) se, Zuhair (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne humein ek aise kaam se mana kiya tha jis mein humara (bظahir zati) faida tha. Is par mein ne kaha ke Rasul Allah (Sallallahu Alaihi Wasallam) ne jo kuch bhi farmaya wo haq hai. Zuhair (Radi Allahu Anhu) ne bayan kiya ke mujhe Rasul Allah (Sallallahu Alaihi Wasallam) ne bulaya aur daryaft farmaya ke tum log apne kheton ka muamla kis tarah karte ho ? Mein ne kaha ke hum apne kheton ko (bone ke liye) nehar ke qareeb ki zameen ki shart par day dete hain. Isi tarah khajoor aur jau ke chand wasaq par. Ye sun kar Aap (Sallallahu Alaihi Wasallam) ne farmaya ke aisa na karo. Ya khud is mein kheti kiya karo ya doosron se karao. Warna ise yun khali hi chhor do. Rafi (Radi Allahu Anhu) ne bayan kiya ke mein ne kaha (Aap (Sallallahu Alaihi Wasallam) ka ye farman) mein ne suna aur maan liya
.

Aur Rabi Bin Nafi Abu Tauba ne kaha ke hum se Muawiyah Bin Salam ne bayan kiya, un se Yahya Bin Abi Kaseer ne, un se Abu Salama ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya, jis ke paas zameen ho to wo khud boye warna apne kisi (Musalman) bhai ko bakhsh day, aur agar ye nahi kar sakta to ise yun hi khali chhor day
.

Hum se Qabisah ne bayan kiya, kaha ke hum se Sufyan Sawri ne bayan kiya, un se Amr Bin Dinar ne bayan kiya ke mein ne is ka (yani Rafi Bin Khadij (Radi Allahu Anhu) ki mazkoora hadees ka) zikar Tawus se kiya to unhon ne kaha ke (batayi waghairah par) kasht kara sakta hai Ibn Abbas (Radi Allahu Anhuma) ne farmaya tha ke Nabi Kareem (Sallallahu Alaihi Wasallam) ne is se mana nahi kiya tha. Albatta Aap (Sallallahu Alaihi Wasallam) ne ye farmaya tha ke apne kisi bhai ko zameen bakhshish ke taur par day dena is se behtar hai ke is par koi mahsool lay. (Ye is surat mein ke zameendar ke paas faltu zameen bekar pari ho)
.

Aur Muhammad Bin Yusuf ne bayan kiya, un se Awza'i ne bayan kiya, un se Zuhri ne bayan kiya, un se Ata Bin Yazid ne bayan kiya aur un se Abu Saeed Khudri (Radi Allahu Anhu) ne bayan kiya ke ek dehati Nabi Kareem (Sallallahu Alaihi Wasallam) ki khidmat mein hazir hua aur Aap (Sallallahu Alaihi Wasallam) se hijrat ke liye poocha. Aap (Sallallahu Alaihi Wasallam) ne farmaya "Allah tum par raham kare. Hijrat ka to bara hi dushwar mamla hai. Tumhare paas ont bhi hai?" Unhon ne kaha ji han! Aap (Sallallahu Alaihi Wasallam) ne daryaft farmaya "Aur is ka sadqa (zakat) bhi ada karte ho?" Unhon ne kaha ji han! Aap (Sallallahu Alaihi Wasallam) ne daryaft farmaya "Is mein se kuch hadiya bhi dete ho?" Unhon ne kaha ji han! Aap (Sallallahu Alaihi Wasallam) ne daryaft farmaya "To tum ise pani pilane ke liye ghat par le jane wale din dohte ho ge?" Unhon ne kaha ji han! phir Aap (Sallallahu Alaihi Wasallam) ne farmaya "Samandaron ke paar bhi agar tum amal karo ge to Allah Ta'ala tumhare amal mein se koi cheez kam nahi kare ga."
.

Hum se Muhammad Bin Bashar ne bayan kiya, kaha hum se Abdul Wahhab ne bayan kiya, kaha hum se Ayub ne bayan kiya, un se Amr ne, un se Taus ne bayan kiya ke mujh se un mein sab se zyada is (mukhabara) ke janne wale ne bayan kiya, un ki murad Ibn Abbas (Radi Allahu Anhuma) se thi ke Nabi Kareem (Sallallahu Alaihi Wasallam) ek martaba aaisi khet ki taraf tashreef le gaye jis ki kheti leh-laha rahi thi, Aap (Sallallahu Alaihi Wasallam) ne daryaft farmaya "Ye kis ka hai?" Sahaba (Radi Allahu Anhum) ne batlaya ke falan ne ise kiraya par liya hai. Is par Aap (Sallallahu Alaihi Wasallam) ne farmaya "Agar wo hadiyatan de deta to is se behtar tha ke is par ek muqarrara ujrat wasool karta."
.