Hum se ’Amr bin Khalid ne bayan kiya, kaha hum se Zubair ne, kaha hum se ’Amr bin Maimoon bin Mihraan ne, unhon ne Sulaiman bin Yasaar se, woh Aisha Radhiallahu Anha se riwayat karte hain ke woh Rasoolullah Sallallahu Alaihi Wasallam ke kapde se mani ko dho daalti thein (woh farmaati hain ke) phir (kabhi) main ek dhabba ya kayi dhabbe dekhti thi.

Hum se Abdan ne bayan kiya, kaha mujhe Abdullah Ibn-e-Mubarak ne khabar di, kaha mujhe ’Amr bin Maimoon Al-Jazari ne batlaaya, woh Sulaiman bin Yasaar se, woh Aisha Radhiallahu Anha se. Aap farmaati hain ke main Rasoolullah Sallallahu Alaihi Wasallam ke kapde se janabat ko dhooti thi. Phir (us ko pahan kar) Aap Sallallahu Alaihi Wasallam Namaz ke liye tashreef le jaate aur paani ke dhabbe Aap Sallallahu Alaihi Wasallam ke kapde mein hote the.

Hum se Qutaibah ne bayan kiya, kaha hum se Yazeed ne, kaha hum se ’Amr ne Sulaiman se riwayat kiya, unhon ne kaha ke main ne Aisha Radhiallahu Anha se suna (doosri sanad yeh hai) hum se Musaddad ne bayan kiya, kaha hum se Abdul Waahid ne, kaha hum se ’Amr bin Maimoon ne Sulaiman bin Yasaar ke waaste se naql kiya, woh kehte hain ke main ne Aisha Radhiallahu Anha se us mani ke baare mein poocha jo kapde ko lag jaaye. To unhon ne farmaaya ke main mani ko Rasoolullah Sallallahu Alaihi Wasallam ke kapde se dho daalti thi phir Aap Namaz ke liye bahar tashreef le jaate aur dhone ka nishaan (yani) paani ke dhabbe Aap Sallallahu Alaihi Wasallam ke kapde mein baaqi hote.

Hum se Musa bin Ismail ne bayan kiya, unhon ne kaha hum se Abdul Waahid ne bayan kiya, unhon ne kaha hum se ’Amr bin Maimoon ne, woh kehte hain ke main ne us kapde ke mutalliq jis mein janabat (na-paaki) ka asar aa gaya ho, Sulaiman bin Yasaar se suna woh kehte the ke Aisha Radhiallahu Anha ne farmaaya ke main Rasoolullah Sallallahu Alaihi Wasallam ke kapde se mani ko dho daalti thi phir Aap Sallallahu Alaihi Wasallam Namaz ke liye bahar nikalte aur dhone ka nishaan yani paani ke dhabbe kapde mein hote.