Hum se Ismail Bin Abi Uwais ne bayan kiya, unhon ne kaha ke mujh se Imam Malik ne bayan kiya, un se Abdullah Bin Umar (Radi Allahu Anhuma) ke ghulam Abdullah Bin Dinar ne bayan kiya, aur un se Abdullah Bin Umar Bin Khattab (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne farmaya ke tumhari aur Yahood-o-Nasara ki misal aisi hai ke ek shakhs ne chand mazdoor kaam par lagaye aur kaha ke ek ek qiraat par aadhe din tak meri mazdoori kaun karega ? Pas Yahood ne ek qiraat par ye mazdoori ki. Phir Nasara ne bhi ek qiraat par kaam kiya. Phir tum logon ne asar se maghrib tak do do qiraat par kaam kiya. Is par Yahood-o-Nasara ghussa ho gaye ke hum ne to ziyada kaam kiya aur mazdoori hum ko kam mili. Is par us shakhs ne kaha ke kya mein ne tumhara haq zarra barabar bhi mara hai ? To unhon ne kaha ke nahi. Phir us shakhs ne kaha ke ye mera fazl hai jise chahoon ziyada deta hoon
.

Hum se Abdul Aziz bin Abdullah Uwaisi ne bayan kiya , kaha mujh se Ibrahim bin Saad ne Ibn Shihab se , unhon ne Salim bin Abdullah bin Umar raziyallahu anhuma se , unhon ne apne walid Abdullah bin Umar raziyallahu anhuma se ke unhon ne Rasool Allah salla Allahu alaihi wa sallam se suna aap salla Allahu alaihi wa sallam farma rahe thay ke tum se pehle ki ummaton ke muqable mein tumhari zindagi sirf itni hai jitna asr se sooraj doobne tak ka waqt hota hai . Torah walon ko Torah di gayi . To unhon ne is par subah se amal kiya . Aadhe din tak phir woh aajiz aa gaye , kaam poora na kar sake , un logon ko un ke amal ka badla ek ek qeerat diya gaya . Phir Injeel walon ko Injeel di gayi , unhon ne aadhe din se asr tak is par amal kiya , aur woh bhi aajiz aa gaye . Un ko bhi ek ek qeerat un ke amal ka badla diya gaya . Phir asr ke waqt hum ko Quran mila . Hum ne is par sooraj ke ghuroob hone tak amal kiya aur kaam poora kar diya humein do do qeerat sawab mila . Is par un dono kitab walon ne kaha . Aye hamare Parwardigar! inhein to aap ne do do qeerat diye aur humein sirf ek ek qeerat . Halanke amal hum ne in se zyada kiya . Allah azzawajal ne farmaya , to kya mein ne ajr dene mein tum par kuch zulm kiya . Unhon ne arz ki ke nahi . Allah Taala ne farmaya ke phir yeh zyada ajr dena mera fazl hai jisay mein chahun de sakta hun .

Hum se Abu Kuraib Muhammad bin Alaa ne bayan kiya , kaha hum se Abu Usama ne Buraid bin Abdullah ke wastay se bayan kiya , unhon ne Abu Burda Aamir bin Abdullah se , unhon ne apne walid Abu Moosa Ashari Abdullah bin Qais raziyallahu anhu se . Unhon ne Nabi Karim salla Allahu alaihi wa sallam se ke aap salla Allahu alaihi wa sallam ne farmaya ke musalmanon aur yahood wa nasara ki misal ek aise shakhs ki si hai ke jis ne kuch logon se mazdoori par raat tak kaam karne ke liye kaha . Unhon ne aadhe din kaam kiya . Phir jawab de diya ke humein tumhari ujrat ki zaroorat nahi , yeh yahood thay phir is shakhs ne doosre mazdoor bulaye aur un se kaha ke din ka jo hissa baqi bach gaya hai yani aadha din isi ko poora kar do . Shart ke mutabiq mazdoori tumhein mile gi . Unhon ne bhi kaam shuru kiya lekin asr tak woh bhi jawab de baithe . Yeh nasara thay pas is teesre giroh ne jo ahl e Islam hain pehle do girohon ke kaam ki poori mazdoori le li .

Hum se Sulaiman Bin Harb ne bayan kiya, un se Hammad Bin Zaid ne bayan kiya, un se Ayyub Sakhtiyani ne, un se Nafi ne, un se Ibn Umar (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya, tumhari aur Yahood-o-Nasara ki misal aisi hai ke kisi shakhs ne kai mazdoor kaam par lagaye aur kaha ke mera kaam ek qiraat par subah se dopahar tak kaun karega ? Is par Yahoodiyon ne (subah se dopahar tak) is ka kaam kiya. Phir us ne kaha ke aadhe din se asar tak ek qiraat par mera kaam kaun karega ? Chunanche ye kaam phir Nasara ne kiya, phir us shakhs ne kaha ke asar ke waqt se sooraj doobne tak mera kaam do qiraat par kaun karega ? Aur tum (Ummat-e-Muhammadiyah) hi wo log ho (jin ko ye darja hasil hua) is par Yahood-o-Nasara ne bura mana, wo kehne lage ke kaam to hum ziyada karein aur mazdoori humein kam milay, phir us shakhs ne kaha ke accha ye batao kya tumhara haq tumhe poora nahi mila ? Sab ne kaha ke humein to humara poora haq mil gaya. Is shakhs ne kaha ke phir ye mera fazl hai mein jise chahoon ziyada doon
.

Hum se Muhammad Bin Alaa ne bayan kiya, kaha ke hum se Abu Usama ne bayan kiya, un se Yazid Bin Abdullah ne, un se Abu Burdah ne aur un se Abu Musa Ashari (Radi Allahu Anhu) ne ke Nabi Kareem (Sallallahu Alaihi Wasallam) ne farmaya, Musalmanon ki aur Yahood-o-Nasara ki misal aisi hai ke ek shakhs ne chand aadmiyon ko mazdoor kiya ke ye sab is ka ek kaam subah se raat tak muqarrara ujrat par karein. Chunanche kuch logon ne ye kaam dopahar tak kiya. Phir kehne lage ke humein tumhari is mazdoori ki zaroorat nahi hai jo tum ne hum se taye ki hai balkay jo kaam hum ne kar diya wo bhi ghalat raha. Is par us shakhs ne kaha ke aisa na karo. Apna kaam poora kar lo aur apni poori mazdoori lay jao, lekin unhon ne inkar kar diya aur kaam chhor kar chale gaye. Aakhir us ne doosre mazdoor lagaye aur un se kaha ke baqi din poora kar lo to mein tumhe wahi mazdoori donga jo pehle mazdooron se taye ki thi. Chunanche unhon ne kaam shuru kiya, lekin asar ki namaz ka waqt aya to unhon ne bhi yahi kiya ke hum ne jo tumhara kaam kar diya hai wo bilkul bekar raha. Wo mazdoori bhi tum apne hi paas rakkho jo tum ne hum se taye ki thi. Is shakhs ne un ko samjhaya ke apna baqi kaam poora kar lo. Din bhi ab thora hi baqi reh gaya hai, lekin wo na mane, aakhir us shakhs ne doosre mazdoor lagaye ke ye din ka jo hissa baqi reh gaya hai is mein ye kaam kar dein. Chunanche in logon ne sooraj ghuroob hone tak din ke baqiya hissa mein kaam poora kiya aur pehle aur doosre mazdooron ki mazdoori bhi sab in hi ko mili. To Musalmanon ki aur is noor ki jis ko unhon ne qabool kiya, yahi misal hai
.