Hum se Abdul Ghaffar Bin Dawood ne bayan kiya, unhon ne kaha ke hum se Yaqub Bin Abdur Rahman ne bayan kiya, un se Amr Bin Abi Amr ne aur un se Anas Bin Malik (Radi Allahu Anhu) ne bayan kiya ke jab Nabi Kareem (Sallallahu Alaihi Wasallam) Khaibar tashreef laye aur Allah Ta'ala ne qila fatah kara diya to Aap (Sallallahu Alaihi Wasallam) ke samne Safiyyah Bint Huyai Bin Akhtab (Radi Allahu Anha) ke husan ki tareef ki gayi. Un ka shohar qatal ho gaya tha. Wo khud abhi dulhan theen. Pas Rasul Allah (Sallallahu Alaihi Wasallam) ne unhein apne liye pasand kar liya. Phir rawangi hui. Jab Aap Sadd-ur-Rawha pahunche to parao hua. Aur Aap (Sallallahu Alaihi Wasallam) ne wahin un ke sath khalwat ki. Phir ek chhote dastar khwan par hais tayyar kar ke rakhwaya. Aur Rasul Allah (Sallallahu Alaihi Wasallam) ne Sahaba se farmaya ke apne qareeb ke logon ko walimah ki khabar kar do. Safiyyah (Radi Allahu Anha) ke sath nikah ka yahi walimah Rasul Allah (Sallallahu Alaihi Wasallam) ne kiya tha. Phir jab hum Madinah ki taraf chale to mein ne dekha ke Rasul Allah (Sallallahu Alaihi Wasallam) ne abaa se Safiyyah (Radi Allahu Anha) ke liye parda karaya. Aur apne oont ko paas bitha kar apna takhna bichha diya. Safiyyah (Radi Allahu Anha) apna paon Aap (Sallallahu Alaihi Wasallam) ke takhne par rakh kar sawar ho gayeen
.

Hum se Yaqub bin Ibrahim ne bayan kiya, kaha hum se Ismail bin Aliyyah ne ke kaha humein Abdul Aziz bin Suhaib ne Anas bin Malik Razi Allah Anhu se riwayat kar ke ke Nabi Kareem Sallallahu Alaihi Wasallam Ghazwa-e-Khaibar mein tashreef le gaye. Hum ne wahan fajr ki namaz andhere hi mein padhi. Phir Nabi Kareem Sallallahu Alaihi Wasallam sawar hue. Aur Abu Talhah bhi sawar hue. Main Abu Talhah ke peeche baitha hua tha. Nabi Kareem Sallallahu Alaihi Wasallam ne apni sawari ka rukh Khaibar ki galiyon ki taraf kar diya. Mera ghutna Nabi Kareem Sallallahu Alaihi Wasallam ki raan se chhoo jata tha. Phir Nabi Kareem Sallallahu Alaihi Wasallam ne apni raan se tehband ko hataya. Yahan tak ke main Nabi Kareem Sallallahu Alaihi Wasallam ki shaffaf aur safaid raanon ki safaidi aur chamak dekhne laga. Jab Aap Khaibar ki basti mein dakhil hue, to Aap Sallallahu Alaihi Wasallam ne farmaya «Allahu Akbar» Allah sab se bada hai, Khaibar barbad ho gaya, jab hum kisi qaum ke aangan mein utar jayen to draye hue logon ki subah manhoos ho jati hai. Aap ne yeh teen martaba farmaya, us ne kaha ke Khaibar ke Yahudi log apne kaamon ke liye bahar nikle hi thay ke woh chilla uthe Muhammad (Sallallahu Alaihi Wasallam) aan pahunche. Aur Abdul Aziz rawi ne kaha ke baaz Anas Razi Allah Anhu se riwayat karne wale hamare saathiyon ne «wal-khamees» ka lafz bhi naqal kiya hai (yani woh chilla uthe ke Muhammad Sallallahu Alaihi Wasallam lashkar le kar pahunch gaye) pas hum ne Khaibar lad kar fatah kar liya aur qaidi jama kiye gaye. Phir Dihyah Razi Allah Anhu aaye aur arz ki ke Ya Rasool Allah! Qaidiyon mein se koi baandi mujhe inayat kijiye, Aap Sallallahu Alaihi Wasallam ne farmaya ke jao koi baandi le lo. Unhon ne Safiyyah bint Huyai ko le liya. Phir ek shakhs Nabi Kareem Sallallahu Alaihi Wasallam ki khidmat mein hazir hua aur arz ki Ya Rasool Allah! Safiyyah jo Quraizah aur Nazeer ke sardar ki beti hain, unhein Aap ne Dihyah ko de diya. Woh to sirf Aap hi ke liye munasib thin. Is par Aap Sallallahu Alaihi Wasallam ne farmaya ke Dihyah ko Safiyyah ke sath bulao, woh laye gaye. Jab Nabi Kareem Sallallahu Alaihi Wasallam ne unhein dekha to farmaya ke qaidiyon mein se koi aur baandi le lo. Rawi ne kaha ke phir Nabi Kareem Sallallahu Alaihi Wasallam ne Safiyyah ko aazad kar diya aur unhein apne nikah mein le liya. Sabit Bunani ne Anas Razi Allah Anhu se poocha ke Abu Hamzah! Un ka mahr Nabi Kareem Sallallahu Alaihi Wasallam ne kya rakkha tha? Anas Razi Allah Anhu ne farmaya ke khud unhein ki aazadi un ka mahr tha aur isi par Aap ne nikah kiya. Phir raste hi mein Umm-e-Sulaim Razi Allah Anha (Anas Razi Allah Anhu ki walda) ne unhein dulhan banaya aur Nabi Kareem Sallallahu Alaihi Wasallam ke paas raat ke waqt bheja. Ab Nabi Kareem Sallallahu Alaihi Wasallam dulha thay, is liye Aap Sallallahu Alaihi Wasallam ne farmaya ke jis ke paas bhi kuch khane ki cheez ho to yahan laye. Aap ne ek chamre ka dastar khwan bichaya. Baaz sahaba khajur laye, baaz ghee, Abdul Aziz ne kaha ke mera khayal hai Anas Razi Allah Anhu ne sattu ka bhi zikr kiya. Phir logon ne un ka halwa bana liya. Yeh Rasool Allah Sallallahu Alaihi Wasallam ka walima tha.

Hum se Abdul Ghaffar Bin Dawood ne bayan kiya ‘ kaha hum se Yaqub Bin Abdur Rahman ne bayan kiya (dusri sanad) aur mujh se Ahmad ne bayan kiya ‘ kaha hum se Ibn Wahb ne bayan kiya ‘ kaha ke mujhe Yaqub Bin Abdur Rahman Zuhri ne khabar di ‘ unhein Muttalib ke Maula Amr ne aur in se Anas Bin Malik Radi Allahu Anhu ne bayan kiya ke hum Khaibar aaye phir jab Allah Ta'ala ne Nabi Kareem Sallallahu Alaihi Wasallam ko Khaibar ki fatah inayait farmai to Aap ke samne Safiya Bint-e-Huyay Bin Akhtab Radi Allahu Anha ki khoobsurati ka kisi ne zikr kiya ‘ in ke shohar qatl ho gaye thay aur in ki shadi abhi nayi hui thi. Is liye Aap Sallallahu Alaihi Wasallam ne unhein apne liye le liya aur unhein sath le kar Aap Sallallahu Alaihi Wasallam ravana hue. Aakhir jab hum maqam-e-Sadd-us-Sahba mein pahunche to Umm-ul-Momineen Safiya Radi Allahu Anha haiz se pak huin aur Nabi Kareem Sallallahu Alaihi Wasallam ne in ke sath khalwat farmai phir Aap ne hais banaya. (Jo khajoor ke sath ghee aur paneer waghaira mila kar banaya jata hai) aur ise chhote se ek dastar khwan par rakh kar mujh ko hukm farmaya ke jo log tumhare qareeb hain unhein bula lo. Umm-ul-Momineen Safiya Radi Allahu Anha ka Nabi Kareem Sallallahu Alaihi Wasallam ki taraf se yahi walima tha. Phir hum Madina ke liye ravana hue to mein ne dekha ke Nabi Kareem Sallallahu Alaihi Wasallam ne Safiya Radi Allahu Anha ke liye uba oont ki kohan mein baandh di taake peeche se wo ise pakre rahein aur apne oont ke pas baith kar apna ghutna is par rakha aur Safiya Radi Allahu Anha apna paon Aap Sallallahu Alaihi Wasallam ke ghutne par rakh kar sawar huin
.