Mujh se Zuhair Bin Harb ne bayan kiya, unhon ne kaha ke hum se Yaqub ne bayan kiya, un se un ke walid ne bayan kiya, unhon ne kaha ke hum se Salih ne bayan kiya ke Ibn Shihab ne bayan kiya, unhein Ubaidullah ne khabar di, unhein Zaid Bin Khalid aur Abu Hurairah (Radi Allahu Anhuma) ne khabar di ke in donon ne Nabi Kareem (Sallallahu Alaihi Wasallam) se suna, Aap se ghair shadi shuda bandi ke mutalliq jo zina kar lay sawal kiya gaya, Aap (Sallallahu Alaihi Wasallam) ne farmaya ke ise kore lagao, phir agar wo zina kar lay to ise kore lagao. Aur phir ise bech do. (Aakhri jumla Aap ne) teesri ya chauthi martaba ke baad (farmaya tha)
.

Hum se Abdullah Bin Yusuf ne bayan kiya, kaha ke hum se Liath ne bayan kiya, kaha ke mujhe Saeed Maqbari ne khabar di, un se un ke baap ne, aur unhon ne Abu Hurairah (Radi Allahu Anhu) ko ye kehte suna ke Nabi Kareem (Sallallahu Alaihi Wasallam) ne farmaya jab koi bandi zina kare aur is ke zina ka saboot (sharaee) mil jaye to usay kore lagwaye, phir is ki lanat malamat na kare. Is ke baad agar phir wo zina kare to phir kore lagwaye magar phir lanat malamat na kare. Phir agar teesri martaba bhi zina kare to usay bech de chahe baal ki ek rasi ke badla hi mein kyun na ho
.