Hum se Muhammad Bin Amr ne bayan kiya, kaha ke hum se Makki Bin Ibrahim ne bayan kiya, unhein Ibn Juraij ne khabar di, kaha ke mujhe Ziyad ne khabar di ke Abdur Rahman Bin Zaid ke ghulam Thabit ne unhein khabar di, ke unhon ne Abu Hurairah (Radi Allahu Anhu) ko ye kehte suna ke Rasul Allah (Sallallahu Alaihi Wasallam) ne farmaya jis shakhs ne «musarrah» bakri khareedi aur usay doha. To agar wo is mamla par raazi hai to usay apne liye rok le aur agar raazi nahi hai to (wapas kar de aur) is ke doodh ke badle mein ek saa khajoor dede
.

Hum se Ali Bin Abdullah ne bayan kiya, kaha ke hum se Sufyan ne bayan kiya, un se Zuhri ne bayan kiya, un se Saeed Bin Musayyab ne bayan kiya, aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne is se mana farmaya ke koi shehri kisi dehati ka mal-o-asbab beche aur ye ke koi (saman khareedne ki niyat ke baghair doosre asal khareedaron se) barh kar boli na de. Isi tarah koi shakhs apne bhai ke saude mein madakhalat na kare. Koi shakhs (kisi aurat ko) doosre ke paigham-e-nikah hote hue apna paigham na bheje. Aur koi aurat apni kisi deeni behen ko is niyat se talaq na dilwaye ke is ke hissa ko khud hasil kar le
.

Hum se Yahya Bin Bukair ne bayan kiya, kaha ke hum se Liath Bin Saad ne bayan kiya, un se Jafar Bin Rabia ne, un se Abdur Rahman Bin Hurmuz Aaraj ne, un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya (bechne ke liye) ontni aur bakri ke thanon mein khoon ko rok kar na rakkho. Agar kisi ne (dhoka mein aa kar) koi aisa janwar khareed liya to usay doodh dohne ke baad donon ikhtiyarat hain chahe to janwar ko rakh le, aur chahe to wapas kar de. Aur ek saa khajoor is ke sath doodh ke badal dede. Abu Salih, Mujahid, Waleed Bin Rabah aur Musa Bin Yasar se ba-wasita Abu Hurairah (Radi Allahu Anhu) Nabi Kareem (Sallallahu Alaihi Wasallam) se riwayat ek saa khajoor hi ki hai. Baaz rawiyon ne Ibn Sireen se ek saa khajoor ki riwayat ki hai aur ye ke khareedar ko (soorat-e-madhkoora mein) teen din ka ikhtiyar ho ga. Agarchay baaz doosre rawiyon ne Ibn Sireen hi se ek saa khajoor ki bhi riwayat ki hai, lekin teen din ke ikhtiyar ka zikr nahi kiya aur (tawan mein) khajoor dene ki riwayat hi zyada hain
.

Hum se Musaddad ne bayan kiya, kaha hum se Mu'tamir ne bayan kiya, kaha ke mein ne apne baap se suna, wo kehte thay ke hum se Abu Usman ne bayan kiya aur un se Abdullah Bin Masood (Radi Allahu Anhu) ne kaha ke jo shakhs «musarrah» bakri khareede aur usay wapas karna chahe to (asal malik ko) is ke sath ek saa bhi de. Aur Nabi Kareem (Sallallahu Alaihi Wasallam) ne qafila walon se (jo mal bechne layein) aage barh kar khareedne se mana farmaya hai
.