Hum se Abu Nuaim ne bayan kiya, kaha ke hum se Shaiban ne bayan kiya, un se Yahya ne, un se Abu Salma ne, un se Abu Saeed (Radi Allahu Anhu) ne bayan kiya ke humein (Nabi Kareem Sallallahu Alaihi Wasallam ki taraf se) mukhtalif qism ki khajoorein ek sath mila karti theen aur hum do saa khajoor ek saa ke badle mein bech diya karte thay. Is par Nabi Kareem (Sallallahu Alaihi Wasallam) ne farmaya ke do saa ek saa ke badla mein na bechi jaye aur na do dirham ek dirham ke badle beche jayein
.

Hum se Qutaiba ne bayan kiya, unhon ne kaha hum se Imam Malik ne bayan kiya, un se Abdul Majeed Bin Sahl Bin Abdur Rahman ne, un se Saeed Bin Musayyab ne, un se Abu Saeed Khudri (Radi Allahu Anhu) ne un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne Khaibar mein ek shakhs ko tehseel-dar banaya. Wo sahab ek umda qism ki khajoor laye. Rasul Allah (Sallallahu Alaihi Wasallam) ne daryaft farmaya ke kya Khaibar ki tamam khajoor isi tarah ki hoti hain. Unhon ne jawab diya ke nahi Allah ki qasam, ya Rasul Allah! hum to isi tarah ek saa khajoor (is se ghatiya khajooron ke) do saa de kar khareedte hain. Aur do saa teen saa ke badle mein lete hain. Aap (Sallallahu Alaihi Wasallam) ne farmaya ke aisa na karo. Albatta ghatiya khajoor ko pehle bech kar in paison se achi qism ki khajoor khareed sakte ho
.

Hum se Abdullah Bin Yusuf ne bayan kiya, unhon ne kaha ke hum ko Imam Malik ne khabar di, unhein Abdul Majeed Bin Sahl Bin Abdur Rahman Bin Auf ne, unhein Saeed Bin Musayyib ne aur unhein Abu Saeed Khudri aur Abu Hurairah (Radi Allahu Anhuma) ne ke Rasul Allah (Sallallahu Alaihi Wasallam) ne ek shakhs ko Khaibar ka tehseel-dar banaya. Wo umdah qism ki khajoor laye to Aap (Sallallahu Alaihi Wasallam) ne un se daryaft farmaya ke kya Khaibar ki tamam khajoorein isi qism ki hain. Unhon ne kaha ke hum is tarah ki ek saa khajoor (is se ghatiya qism ki) do saa khajoor ke badal mein aur do saa, teen saa ke badle mein khareedte hain. Aap (Sallallahu Alaihi Wasallam) ne unhein hidayat farmayi ke aisa na kar, albatta ghatiya khajooron ko paison ke badle bech kar un se acchi qism ki khajoor khareed sakte ho. Aur tole jane ki cheezon mein bhi Aap (Sallallahu Alaihi Wasallam) ne yahi hukum farmaya
.

Aur Abdul Aziz Bin Muhammad ne bayan kiya ‘ in se Abdul Majeed ne bayan kiya ‘ in se Saeed ne bayan kiya aur in se Abu Saeed aur Abu Huraira Radi Allahu Anhuma ne bayan kiya ke Nabi Kareem Sallallahu Alaihi Wasallam ne Ansar ke khandan Bani Adi ke bhai ko Khaibar bheja aur unhein wahan ka aamil muqarrar kiya aur Abdul Majeed se riwayat hai ke in se Abu Salih Samman ne aur in se Abu Huraira Radi Allahu Anhu aur Abu Saeed Radi Allahu Anhu ne isi tarah naqal kiya hai
.