Hum se Qutaiba ne bayan kiya, kaha ke hum se Laith Bin Saad ne bayan kiya, un se Ibn Shihab ne, un se Urwah aur Umrah Bint Abdur Rahman ne ke Nabi Kareem (Sallallahu Alaihi Wasallam) ki zaujah-e-mutahira Aisha (Radi Allahu Anha) ne bayan kiya Nabi Kareem (Sallallahu Alaihi Wasallam) masjid se (aitikaf ki halat mein) sar-e-mubarak meri taraf hujra ke andar kar dete, aur mein is mein kangha kar deti, Nabi Kareem (Sallallahu Alaihi Wasallam) jab m'utakif hote to bila hajat ghar mein tashreef nahi late thay
.

Hum se Humaidi ne bayan kiya, unhon ne kaha hum se Sufyan bin Uyainah ne bayan kiya, kaha hum se Amr bin Dinar ne, kaha hum ne Abdullah bin Umar Razi Allah Anhuma se ek aise shakhs ke baare mein poocha jis ne Baitullah ka tawaf Umrah ke liye kiya lekin Safa aur Marwah ki sayi nahi ki, kya aisa shakhs (Baitullah ke tawaf ke baad) apni biwi se suhbat kar sakta hai? Aap ne jawab diya ke Nabi Kareem Sallallahu Alaihi Wasallam tashreef laye aap ne saat martaba Baitullah ka tawaf kiya aur Maqam-e-Ibrahim ke paas do rakat namaz padhi, phir Safa aur Marwah ki sayi ki aur tumhare liye Nabi Kareem Sallallahu Alaihi Wasallam ki zindagi behtareen namuna hai.“ (Al-Ahzab: 21)

Amr bin Dinar ne kaha, hum ne Jabir bin Abdullah Razi Allah Anhu se bhi yeh masla poocha to Aap ne bhi yehi farmaya ke woh biwi ke qareeb bhi is waqt tak na jaye jab tak Safa aur Marwah ki sayi na kar le.

Hum se Muhammad Bin Muthanna ne bayan kiya, kaha ke hum se Yahya Bin Saeed Qattan ne bayan kiya, un se Hisham Bin Urwah ne bayan kiya, kaha ke mujhe mere baap ne khabar di aur un se Aisha (Radi Allahu Anha) ne bayan kiya ke Nabi Kareem (Sallallahu Alaihi Wasallam) masjid mein m'utakif hote aur sar-e-mubarak meri taraf jhuka dete phir mein is mein kangha kar deti, halankay mein is waqt haiz se hua karti thi
.

Hum se Abu-al-Numan Muhammad Bin Fazal Dosi ne bayan kiya, kaha ke hum se Hammad Bin Zaid ne bayan kiya, un se Yahya Qattan ne, un se Umrah ne aur un se Aisha (Radi Allahu Anha) ne bayan kiya ke Nabi Kareem (Sallallahu Alaihi Wasallam) Ramzan ke aakhri asharay mein aitikaf kiya karte thay. Mein Aap (Sallallahu Alaihi Wasallam) ke liye (masjid mein) ek khaima laga deti. Aur Aap (Sallallahu Alaihi Wasallam) subah ki namaz parh ke is mein chale jate thay. Phir Hafsa (Radi Allahu Anha) ne bhi Aisha (Radi Allahu Anha) se khaima khara karne ki (apne aitikaf liye) ijazat chahi. Aisha (Radi Allahu Anha) ne ijazat de di aur unhon ne ek khaima khara kar liya jab Zainab Bint Jahsh (Radi Allahu Anha) ne dekha to unhon ne bhi (apne liye) ek khaima khara kar liya. Subah hui to Rasul Allah (Sallallahu Alaihi Wasallam) ne kai khaime dekhe to farmaya, ye kya hai ? Aap ko un ki haqeeqat ki khabar di gayi. Aap (Sallallahu Alaihi Wasallam) ne farmaya, kya tum samajhte ho ye khaime sawab ki niyat se khara kiye gaye hain. Pas Aap (Sallallahu Alaihi Wasallam) ne is mahina (Ramzan) ka aitikaf chor diya aur Shawwal ke asharay ka aitikaf kiya
.

Hum se Abdullah Bin Yusuf ne bayan kiya, unhon ne kaha ke hum ko Imam Malik ne khabar di, unhein Yahya Bin Saeed ne, unhein Umrah Bint Abdur Rahman ne aur unhein Umm-ul-Momineen Aisha Siddiqa (Radi Allahu Anha) ne ke Nabi Kareem (Sallallahu Alaihi Wasallam) ne aitikaf ka irada kiya. Jab Aap (Sallallahu Alaihi Wasallam) is jagah tashreef laye (yaani masjid mein) jahan Aap (Sallallahu Alaihi Wasallam) ne aitikaf ka irada kiya tha. To wahan kai khaime maujood thay. Aisha (Radi Allahu Anha) ka bhi, Hafsa (Radi Allahu Anha) ka bhi aur Zainab (Radi Allahu Anha) ka bhi, is par Aap (Sallallahu Alaihi Wasallam) ne farmaya kya tum ye samajhte ho ke unhon ne sawab ki niyat se aisa kiya hai, phir Aap (Sallallahu Alaihi Wasallam) wapas tashreef le gaye aur aitikaf nahi kiya balkay Shawwal ke asharay mein aitikaf kiya
.

Hum se Muhammad Bin Salam ne bayan kiya, kaha ke hum ko Muhammad Bin Fazail Bin Ghazwan ne khabar di, unhein Yahya Bin Saeed ne, unhein Amro Bint Abdur Rahman ne aur un se Aisha (Radi Allahu Anha) ne ke Rasul Allah (Sallallahu Alaihi Wasallam) har Ramzan mein aitikaf kiya karte. Aap subah ki namaz parhne ke baad is jagah jate jahan aap ko aitikaf ke liye baithna hota. Rawi ne kaha ke Aisha (Radi Allahu Anha) ne bhi aap se aitikaf karne ki ijazat chahi. Aap ne unhein ijazat de di, is liye unhon ne (apne liye bhi masjid mein) ek khaima laga liya. Hafsa (Radi Allahu Anha) (zaujah-e-mutahira Nabi Kareem Sallallahu Alaihi Wasallam) ne suna to unhon ne bhi ek khaima laga liya. Zainab (Radi Allahu Anha) (zaujah-e-mutahira Nabi Kareem Sallallahu Alaihi Wasallam) ne suna to unhon ne bhi ek khaima laga liya. Subah ko jab Nabi Kareem (Sallallahu Alaihi Wasallam) namaz parh kar laute to char khaime dekhe. Aap (Sallallahu Alaihi Wasallam) ne daryaft farmaya, ye kya hai ? Aap (Sallallahu Alaihi Wasallam) ko haqeeqat-e-haal ki ittela di gayi. Aap (Sallallahu Alaihi Wasallam) ne farmaya unhon ne sawab ki niyat se ye nahi kiya, (balkay sirf ek doosri ki rees se ye kiya hai) unhein ukhar do. Mein unhein accha nahi samajhta, chunanche wo ukhar diye gaye aur aap ne bhi (is saal) Ramzan mein aitikaf nahi kiya. Balkay Shawwal ke aakhri asharay mein aitikaf kiya
.

Hum se Muhammad Bin Muqatil Abu-al-Hasan ne bayan kiya, unhon ne kaha ke hum ko Abdullah Bin Mubarak ne khabar di, unhein Auzai ne khabar di, kaha ke mujh se Yahya Bin Saeed ne bayan kiya, kaha ke mujh se Amro Bint Abdur Rahman ne bayan kiya, un se Aisha (Radi Allahu Anha) ne ke Rasul Allah (Sallallahu Alaihi Wasallam) ne Ramzan ke aakhri asharay mein aitikaf ke liye zikr kiya. Aisha (Radi Allahu Anha) ne bhi Aap (Sallallahu Alaihi Wasallam) se ijazat mangi. Aap ne unhein ijazat de di, phir Hafsa (Radi Allahu Anha) ne Aisha (Radi Allahu Anha) se kaha ke un ke liye bhi ijazat le dein chunanche unhon ne aisa kar diya. Jab Zainab Bint Hujash (Radi Allahu Anha) ne dekha to unhon ne bhi khaima lagane ke liye kaha, aur un ke liye bhi khaima laga diya gaya. Unhon ne zikr kiya ke Rasul Allah (Sallallahu Alaihi Wasallam) subah ki namaz ke baad apne khaima mein tashreef le jate aaj aap ko bahut khaime dikhayi diye. Aap (Sallallahu Alaihi Wasallam) ne farmaya ke ye kya hai ? logon ne bataya ke Aisha, Hafsa, aur Zainab (Radi Allahu Annhun) ke khaime hain. Is par Aap (Sallallahu Alaihi Wasallam) ne farmaya ke, bhala kya un ki sawab ki niyat hai ab mein bhi aitikaf nahi karoon ga. Phir jab mah-e-Ramzan khatam ho gaya to Aap (Sallallahu Alaihi Wasallam) ne Shawwal mein aitikaf kiya
.

Hum se Abdullah Bin Muhammad Musnadi ne bayan kiya, un se Hisham ne bayan kiya, unhein Mamar ne khabar di, unhein Zuhri ne, unhein Urwah ne aur unhein Aisha (Radi Allahu Anha) ne ke wo haiza hoti theen aur Rasul Allah (Sallallahu Alaihi Wasallam) masjid mein aitikaf mein hote thay, phir bhi wo aap ke sar mein apne hujra hi mein kangha karti theen. Aap apna sar-e-mubarak un ki taraf barha dete
.

Hum se Abdullah bin Yusuf Taneesi ne bayan kiya, unhon ne kaha hum ko Imam Malik ne khabar di, unhein Ibn Shihab ne khabar di, unhein Urwah bin Zubayr ne aur in se Umm al-Momineen Aisha razi Allahu anha ne bayan kiya ke main halat e haiz ke bawajood Nabi Karim salla Allahu alaihi wasallam ke sar mein kangha karti thi. Hum se Abdullah bin Yusuf ne bayan kiya, kaha hum ko Imam Malik ne khabar di, unhein Hisham ne, in se un ke walid ne aur in se Aisha razi Allahu anha ne isi tarah yeh hadees bayan ki.