Hum se Muhammad Bin Muthanna ne bayan kiya, kaha ke hum se Maaz Bin Maaz Anbari ne bayan kiya, kaha ke hum ko Abdullah Bin Aun ne khabar di, un se Ziyad Bin Jubair ne bayan kiya ke ek shakhs Ibn Umar (Radi Allahu Anhuma) ki khidmat mein hazir hua aur arz ki ke ek shakhs ne ek din ke roze ke nazar mani. Phir kaha ke mera khayal hai ke wo peer ka din hai aur ittefaq se wahi eid ka din par gaya. Ibn Umar (Radi Allahu Anhuma) ne kaha ke Allah Ta'ala ne to nazar poori karne ka hukm diya hai aur Nabi Kareem (Sallallahu Alaihi Wasallam) ne is din roza rakhne se (Allah ke hukm se) mana farmaya hai. (Goya Ibn Umar Radi Allahu Anhuma ne koi qatyee faisla nahi diya)
.

Hum se Muhammad bin Abu Bakr Muqad-dami ne bayan kiya, unhon ne kaha hum se Fuzhail bin Sulayman ne bayan kiya, unhon ne kaha hum se Musa bin Uqbah ne bayan kiya, kaha hamase Hakeem bin Abi Harra Aslami ne bayan kiya, unhon ne Abdullah bin Umar razi Allahu anhuma se suna, in se aise shakhs ke mutalliq poochha gaya jis ne nazr maani ho ke kuch makhsus dinon mein roze rakkhe ga. Phir ittifaq se unhi dinon mein Baqr-Eid ya Eid ke din par gaye hon? Abdullah bin Umar razi Allahu anhuma ne kaha ke tumhare liye Rasool Allahsalla Allahu alaihi wasallam ki zindagi behtareen namoona hai. Nabi Karim salla Allahu alaihi wasallam Baqr-Eid aur Eid ke din roze nahi rakhte thay aur na in dinon mein roze ko jaiz samajhte thay.

Hum se Abdullah bin Maslamah ne bayan kiya, kaha hum se Yazid bin Zhari ne bayan kiya, in se Yunus ne, in se Ziyada bin Jubayr ne bayan kiya ke main Ibn Umar razi Allahu anhuma ke saath thu ek shakhs ne in se poochha ke main ne nazr maani hai ke har mangal ya budh ke din roza rakhoon ga. Ittifaq se isi din ki Baqr-Eid par gayi hai? Ibn Umar razi Allahu anhuma ne kaha ke Allah Ta'ala ne nazr poori karne ka hukm diya hai aur hamain Baqr-Eid ke din roza rakhne ki mamanat ki gayi hai. Is shakhs ne dobara apna sawal doharaya to Aap ne phir is se sirf itni hi baat kahi is par koi zyadi nahi ki.