Hum se Abdullah bin Muneer ne bayan kiya, unhon ne Abdullah bin Bakr se suna, kaha hum ko Humaid ne yeh Hadees bayan ki. Unhon ne Anas se naql kiya. Woh kehte hain ke (ek martaba) Namaz ka waqt aa gaya, to jis shakhs ka makaan qareeb hi tha woh Wuzu karne apne ghar chala gaya aur kuch log (jin ke makaan door the) reh gaye. To Rasoolullah Sallallahu Alaihi Wasallam ke paas paththar ka ek lagan laaya gaya. Jis mein kuch paani tha aur woh itna chhota tha ke Aap us mein apni hatheli nahi phaila sakte the. (Magar) sab ne us bartan ke paani se Wuzu kar liya, hum ne Anas Radhiallahu Anhu se poocha ke tum kitne nafar the? Kaha assi (80) se kuch ziyada hi the.

Hum se Abdullah bin Yousuf ne bayan kiya, unhon ne kaha ke hum ko Malik ne Ishaaq bin Abdullah bin Abi Talha se khabar di, woh Anas bin Malik Radhiallahu Anhu se naql karte hain, woh farmaate hain ke main ne Rasoolullah Sallallahu Alaihi Wasallam ko dekha ke Namaz-e-Asr ka waqt aa gaya, logon ne paani talaash kiya, jab unhein paani na mila, to Rasoolullah Sallallahu Alaihi Wasallam ke paas (ek bartan mein) Wuzu ke liye paani laaya gaya. Rasoolullah Sallallahu Alaihi Wasallam ne us mein apna haath daal diya aur logon ko hukm diya ke usi (bartan) se Wuzu karen. Anas Radhiallahu Anhu kehte hain ke main ne dekha Aap ki ungliyon ke neeche se paani (chashme ki tarah) ubal raha tha. Yahan tak ke (qaafile ke) aakhiri aadmi ne bhi Wuzu kar liya.

Hum se Musaddad ne bayan kiya, kaha hum se Hammad ne, woh saabit se, woh Anas Radhiallahu Anhu se riwayat karte hain ke Rasoolullah Sallallahu Alaihi Wasallam ne paani ka ek bartan talab farmaaya. To Aap Sallallahu Alaihi Wasallam ke liye ek chawde munh ka pyaala laaya gaya jis mein kuch thoda paani tha, Aap Sallallahu Alaihi Wasallam ne apni ungliyaan us mein daal dein. Anas kehte hain ke main paani ki taraf dekhne laga. Paani Aap Sallallahu Alaihi Wasallam ki ungliyon ke darmiyaan se phoot raha tha. Anas Radhiallahu Anhu kehte hain ke us (ek pyaale) paani se jin logon ne Wuzu kiya, woh sattar (70) se assi (80) tak the.

Mujh se Muhammad bin Bashar ne bayan kiya, kaha hum se Ibn Abi Adi ne bayan kiya, un se Sa'id bin Abi Arubah ne, un se Qatadah ne aur un se Anas bin Malik Radi Allahu Anhu ne bayan kiya ke Rasoolullah Sallallahu Alaihi Wa Sallam ki khidmat mein ek bartan hazir kiya gaya (pani ka) Nabi Kareem Sallallahu Alaihi Wa Sallam is waqt (Madinah ke nazdeek) Maqam-e-Zaura mein tashreef rakhte thay, Aap Sallallahu Alaihi Wa Sallam ne is bartan mein hath rakha to is mein se pani Aap Sallallahu Alaihi Wa Sallam ki ungliyon ke darmiyan se phootne laga aur isi pani se poori jama'at ne wudhu kiya. Qatadah ne kaha ke mein ne Anas Radi Allahu Anhu se poocha: Aap log kitni tadad mein thay? Unhon ne farmaya ke teen so rahe honge ya teen so ke qareeb rahe honge.

Hum se Abdullah bin Maslamah ne bayan kiya, unhon ne kaha ke hum se Imam Malik ne bayan kiya, un se Ishaq bin Abdullah bin Abi Talhah ne bayan kiya aur un se Anas bin Malik Radi Allahu Anhu ne bayan kiya ke mein ne Rasoolullah Sallallahu Alaihi Wa Sallam ko dekha. Asr ki namaz ka waqt ho gaya tha, aur log wudhu ka pani talash kar rahe thay lekin pani ka kahin pata nahi tha, phir Rasoolullah Sallallahu Alaihi Wa Sallam ki khidmat mein (ek bartan ke andar) wudhu ka pani laya gaya. Aap Sallallahu Alaihi Wa Sallam ne apna hath is bartan mein rakha aur logon se farmaya ke isi pani se wudhu karein. Mein ne dekha ke pani Aap Sallallahu Alaihi Wa Sallam ki ungliyon ke neeche se ubal raha tha chunanche logon ne wudhu kiya yahan tak ke har shakhs ne wudhu kar liya.

Hum se Abdur Rahman bin Mubarak ne bayan kiya, unhon ne kaha hum se Hazm bin Mehran ne bayan kiya, unhon ne kaha ke mein ne Imam Hasan Basri se suna, unhon ne kaha ke hum se Anas bin Malik Radi Allahu Anhu ne bayan kiya ke Nabi Kareem Sallallahu Alaihi Wa Sallam kisi safar mein thay aur Aap ke sath kuch Sahaba Kiram bhi thay, chalte chalte namaz ka waqt ho gaya to wudhu ke liye kahin pani nahi mila. Aakhir jama'at mein se ek sahib uthe aur ek bade se piyale mein thoda sa pani le kar hazir-e-khidmat hue. Nabi Kareem Sallallahu Alaihi Wa Sallam ne use liya aur us ke pani se wudhu kiya. Phir Aap Sallallahu Alaihi Wa Sallam ne apna hath piyale par rakha aur farmaya ke ao wudhu karo, poori jama'at ne wudhu kiya aur tamam aadab-o-sunan ke sath poori tarah kar liya. Hum tadad mein sattar ya assi ke lag bhag thay.

Hum se Abdullah bin Munir ne bayan kiya, unhon ne Yazid bin Haroon se suna, kaha ke mujh ko Humaid ne khabar di aur un se Anas bin Malik Radi Allahu Anhu ne bayan kiya ke namaz ka waqt ho chuka tha, Masjid-e-Nabwi se jin ke ghar qareeb thay unhon ne to wudhu kar liya lekin bahut se log baqi reh gaye. Is ke baad Nabi Kareem Sallallahu Alaihi Wa Sallam ki khidmat mein patthar ki bani hui ek lagan layi gayi. Is mein pani tha, Aap Sallallahu Alaihi Wa Sallam ne apna hath is par rakha lekin us ka munh itna tang tha ke Aap Sallallahu Alaihi Wa Sallam us ke andar apna hath phaila kar nahi rakh sakte thay, chunanche Aap ne ungliyan mila lein aur lagan ke andar hath ko daal diya phir (isi pani se) jitne log baqi reh gaye thay sab ne wudhu kiya. Mein ne poocha ke Aap hazrat ki tadad kya thi? Anas Radi Allahu Anhu ne bataya ke assi aadmi thay.

Mujh se Muhammad bin Muthanna ne bayan kiya, kaha hum se Abu Ahmad Zubairi ne bayan kiya, kaha hum se Israil ne bayan kiya, un se Mansoor ne, un se Ibrahim ne un se Alqamah ne aur un se Abdullah bin Mas'ud Radi Allahu Anhu ne bayan kiya ke moajizat ko hum to ba-is-e-barkat samajhte thay aur tum log un se darte ho. Ek martaba hum Rasoolullah Sallallahu Alaihi Wa Sallam ke sath ek safar mein thay aur pani taqreeban khatam ho gaya. Nabi Kareem Sallallahu Alaihi Wa Sallam ne farmaya ke jo kuch bhi pani bach gaya ho use talash karo. Chunanche log ek bartan mein thoda sa pani laye. Aap Sallallahu Alaihi Wa Sallam ne apna hath bartan mein daal diya aur farmaya: Barkat wala pani lo aur barkat to Allah Ta'ala hi ki taraf se hoti hai, mein ne dekha ke Rasoolullah Sallallahu Alaihi Wa Sallam ki ungliyon ke darmiyan mein se pani faware ki tarah phoot raha tha aur hum to Nabi Kareem Sallallahu Alaihi Wa Sallam ke zamane mein khate waqt khane ki tasbeeh sunte thay.

Hum se Qutaybah bin Saeed ne bayan kiya, kaha hum se Jareer ne bayan kiya, in se Aamash ne bayan kiya, in se Salim bin Abi al-Jad ne aur in se Jabir bin Abdullah ne bayan kiya ke main Nabi Karim salla Allahu alaihi wasallam ke saath tha aur Asr ki namaz ka waqt ho gaya thode se bache huay pani ke siwa hamare paas aur koi pani nahi tha usay ek bartan mein rakh kar Nabi Karim salla Allahu alaihi wasallam ki khidmat mein laya gaya Nabi Karim salla Allahu alaihi wasallam ne is mein apna hath dala aur apni ungliyaan phaila dein phir farmaya aao wuzu kar lo yeh Allah ki taraf se barkat hai. Main ne dekha ke pani Nabi Karim salla Allahu alaihi wasallam ki ungliyon ke darmiyan se phoot phoot kar nikal raha tha chunanche sab logon ne is se wuzu kiya aur piya bhi. Main ne is ki parwah kiye baghair ke pait mein kitna pani ja raha hai khoob pani piya kyunke mujhe maloom ho gaya tha ke barkat ka pani hai. Main ne Jabir razi Allahu anhu se poochha Aap log is waqt kitni tadaad mein thay? Batlaya ke ek hazar char sau. Is riwayat ki mutabia-t Amr ne Jabir razi Allahu anhu se ki hai aur Husain aur Amr bin Murrah ne Salim se bayan kiya aur in se Jabir razi Allahu anhu ne ke sahabah ki is waqt tadaad pandrah sau ku. Is ki mutabia-t Saeed bin al-Musayyab ne Jabir razi Allahu anhu se ki hai.