Hum se Ismail Bin Abi Uwais ne bayan kiya, kaha ke mujh se Imam Malik ne bayan kiya, un se Abu Bakr Bin Abdur Rahman Bin Harith Bin Hisham Bin Mugheera ke ghulam Sumi ne, unhon ne Abu Bakr Bin Abdur Rahman se suna, unhon ne bayan kiya ke mere baap Abdur Rahman mujhe sath le kar Aisha (Radi Allahu Anha) ki khidmat mein hazir hue, Aisha (Radi Allahu Anha) ne kaha ke Nabi Kareem (Sallallahu Alaihi Wasallam) subah junbi hone ki halat mein karte ihtilam ki wajah se nahi balkay jima ki wajah se! Phir aap roze se rehte (yani ghusl fajr ki namaz se pehle sahari ka waqt nikal jane ke baad karte)
.

Hum se Abdullah Bin Muslimah ne bayan kiya, kaha hum se Imam Malik ne, un se Abu Bakr Bin Abdur Rahman Bin Harith Bin Hisham Bin Mugheera ke ghulam Sumi ne bayan kiya, unhon ne Abu Bakr Bin Abdur Rahman se suna, unhon ne bayan kiya ke mein apne baap ke sath Aisha aur Umm-e-Salma (Radi Allahu Anha) ki khidmat mein hazir hua (doosri sanad Imam Bukhari Rahimahullah ne kaha ke) aur hum se Abu-al-Yaman ne bayan kiya, kaha ke hum ko Shuaib ne khabar di, unhein Zuhri ne, unhon ne bayan kiya ke mujhe Abu Bakr Bin Abdur Rahman Bin Harith Bin Hisham ne khabar di, unhein un ke walid Abdur Rahman ne khabar di, unhein Marwan ne khabar di aur unhein Aisha aur Umm-e-Salma (Radi Allahu Anha) ne khabar di ke (baaz martaba) fajr hoti to Rasul Allah (Sallallahu Alaihi Wasallam) apne ahl ke sath junbi hote thay, phir aap (Sallallahu Alaihi Wasallam) ghusl karte aur aap (Sallallahu Alaihi Wasallam) roze se hote thay, aur Marwan Bin Hakam ne Abdur Rahman Bin Harith se kaha mein tumhein Allah ki qasam deta hoon Abu Hurairah (Radi Allahu Anhu) ko tum ye hadees saaf saaf suna do. (Kyunke Abu Hurairah Radi Allahu Anhu ka fatwa is ke khilaf tha) in dinon Marwan, Ameer Muawiyah (Radi Allahu Anhu) ki taraf se Madinah ka hakim tha, Abu Bakr ne kaha ke Abdur Rahman ne is baat ko pasand nahi kiya. Ittefaq se hum sab ek martaba Zhu-al-Hulaifah mein jama ho gaye. Abu Hurairah (Radi Allahu Anhu) ki wahan koi zameen thi, Abdur Rahman ne un se kaha ke aap se ek baat kahoon ga aur agar Marwan ne is ki mujhe qasam na di hoti to mein kabhi aap ke samne usay na chherta. Phir unhon ne Aisha aur Umm-e-Salma (Radi Allahu Anha) ki hadees zikr ki. Abu Hurairah (Radi Allahu Anhu) ne kaha (mein kya karoon) kaha ke Fazl Bin Abbas (Radi Allahu Anhuma) ne ye hadees bayan ki thi (aur wo zyada janne wale hain) ke humein Hammam aur Abdullah Bin Umar (Radi Allahu Anhuma) ke sahabzade ne Abu Hurairah (Radi Allahu Anhu) se bayan kiya ke Nabi Kareem (Sallallahu Alaihi Wasallam) aise shakhs ko jo subah ke waqt junbi hone ki halat mein utha ho iftar ka hukm dete thay lekin Aisha (Radi Allahu Anha) aur Umm-e-Salma (Radi Allahu Anha) ki ye riwayat zyada muatabar hai
.