Hum se Musa Bin Ismail ne bayan kiya, kaha hum se Juwairiyah ne bayan kiya un se Nafi ne ke Abdullah (Radi Allahu Anhu) ke kisi bete ne un se kaha tha kash aap is saal ruk jate (to accha hota isi oopar wale waqiyah ki taraf ishara hai)
.

Hum se Yaqub Bin Ibrahim ne bayan kiya, kaha ke hum se Ismail Bin Aliyyah ne bayan kiya, un se Ayub Sakhtiyani ne, un se Nafi ne ke Ibn Umar (Radi Allahu Anhuma) ke larke Abdullah Bin Abdullah un ke yahan gaye. Haj ke liye sawari ghar mein khari hui thi. Unhon ne kaha ke mujhe khatra hai ke is saal Musalmanon mein aapas mein larayi ho jaye gi aur aap ko wo Bait Allah se rok dein ge. Is liye agar aap na jate to behtar hota. Ibn Umar (Radi Allahu Anhuma) ne jawab diya ke Rasul Allah (Sallallahu Alaihi Wasallam) bhi tashreef le gaye thay (Umrah karne Sulah Hudaibiyah ke moqa par) aur kuffar-e-Quraish ne aap ko Bait Allah tak pohanchne se rok diya tha. Is liye agar mujhe bhi rok diya gaya to mein bhi wahi kaam karoon ga jo Rasul Allah (Sallallahu Alaihi Wasallam) ne kiya tha aur tumhare liye Rasul Allah (Sallallahu Alaihi Wasallam) ki zindagi behtareen namuna hai. Phir aap ne farmaya ke mein tumhein gawah banata hoon ke mein ne apne Umrah ke sath Haj (apne oopar) wajib kar liya hai. Unhon ne bayan kiya ke phir aap Makkah aaye aur dono Umrah aur Haj ke liye ek hi tawaf kiya
.

Hum se Abul Numan ne bayan kiya, kaha hum se Hammad ne bayan kiya, un se Ayub ne, un se Nafi ne bayan kiya ke Ubaidullah Bin Abdullah Bin Umar (Radi Allahu Anhuma) ne apne walid se kaha (jab wo Haj ke liye nikal rahe thay) ke aap na jaiye kyun ke mera khayal hai ke (bad-amni ki wajah se) aap ko Bait Allah tak pohanchne se rok diya jaye ga. Unhon ne farmaya ke phir mein bhi wahi kaam karoon ga jo (aise moqa par) Rasul Allah (Sallallahu Alaihi Wasallam) ne kiya tha Allah Ta'ala ne farmaya hai ke ”Tumhare liye Rasul Allah (Sallallahu Alaihi Wasallam) ki zindagi behtareen namuna hai“ mein ab tumhein gawah banata hoon ke mein ne apne oopar Umrah wajib kar liya hai, chunancha aap ne Umrah ka ihram bandha, unhon ne bayan kiya ke phir aap nikle aur jab Baida pohanche to Haj aur Umrah dono ka ihram bandh liya aur farmaya ke Haj aur Umrah dono to ek hi hain is ke baad Qudaid pohanch kar hadyi khareedi phir Makkah aa kar dono ke liye tawaf kiya aur darmiyan mein nahi balkey dono se ek hi sath halal hue
.

Hum se Ismail ne bayan kiya, unhon ne kaha ke mujh se Imam Malik ne bayan kiya, un se Nafi ne bayan kiya ke fitna ke zamana mein jab Abdullah Bin Umar (Radi Allahu Anhuma) Makkah ke irade se chale to farmaya ke agar mujhe Baitullah tak pohanche se rok diya gaya to mein bhi wahi kaam karoon ga jo (Hudaibiyah ke saal) mein ne Rasul Allah (Sallallahu Alaihi Wasallam) ke sath kiya tha. Aap ne Umrah ka ihram bandha kyunke Rasul Allah (Sallallahu Alaihi Wasallam) ne bhi Hudaibiyah ke saal Umrah hi ka ihram bandha tha. Phir Aap ne kuch ghaur kar ke farmaya ke Umrah aur Hajj to ek hi hai, is ke baad apne sathiyon se bhi yehi farmaya ke ye donon to ek hi hain. Mein tumhein gawah banata hoon ke Umrah ke sath ab Hajj bhi apne liye mein ne wajib qarar diye liya hai phir (Makkah pohanch kar) Aap ne donon ke liye ek hi tawaf kiya. Aap ka khayal tha ke ye kafi hai aur Aap qurbani ka janwar bhi sath le gaye thay
.