Hum se Musaddad ne bayan kiya, kaha hum se Yahya Bin Qattan ne bayan kiya, un se Ibn Jurayj ne, un se Ata Bin Abi Rabah ne bayan kiya ke mein ne Abdullah Bin Abbas (Radi Allahu Anhuma) se suna, unhon ne humein khabar di ke Rasul Allah (Sallallahu Alaihi Wasallam) ne ek Ansari khatoon (Umm-e-Sinan Radi Allahu Anha) se (Ibn Abbas Radi Allahu Anhuma ne un ka naam bataya tha lekin mujhe yaad na raha) poocha ke tu hamare sath Haj kyun nahi karti? Wo kehne lagi ke hamare paas ek ont tha, jis par Abu Falan (yani is ka khawand) aur is ka beta sawar ho kar Haj ke liye chal diye aur ek ont unhon ne chhora hai, jis se pani laya jata hai. Aap (Sallallahu Alaihi Wasallam) ne farmaya ke acha jab Ramzan aaye to Umrah kar lena kyunke Ramzan ka Umrah ek Haj ke barabar hota hai ya isi jaisi koi baat Aap (Sallallahu Alaihi Wasallam) ne farmayi
.

Hum se Abdan ne bayan kiya, kaha hum ko Yazid Bin Zuraie ne khabar di, kaha hum ko Habib Muallim ne khabar di, unhein Ata Bin Abi Rabah ne aur un se Ibn Abbas (Radi Allahu Anhuma) ne farmaya ke jab Rasul Allah (Sallallahu Alaihi Wasallam) Hajjat-ul-Wida se wapas hue to Aap (Sallallahu Alaihi Wasallam) ne Umm-e-Sinan Ansariya aurat (Radi Allahu Anha) se daryaft farmaya ke tu Hajj karne nahi gayi ? Unhon ne arz ki ke falan ke baap yani mere khawand ke paas do ont pani pilane ke thay ek par to khud Hajj ko chale gaye aur doosra hamari zameen seerab karta hai. Aap (Sallallahu Alaihi Wasallam) ne is par farmaya ke Ramzan mein Umrah karna mere sath Hajj karne ke barabar hai, is riwayat ko Ibn Juraij ne Ata se suna, kaha unhon ne Ibn Abbas (Radi Allahu Anhuma) se suna, unhon ne Nabi Kareem (Sallallahu Alaihi Wasallam) se, aur Ubaidullah ne Abdul Karim se riwayat kiya, un se Ata ne un se Jabir (Radi Allahu Anhu) ne aur un se Nabi Kareem (Sallallahu Alaihi Wasallam) ne
.