Hum se Ali Bin Abdullah ne bayan kiya, un se Yazid Bin Zuraie ne bayan kiya, un se Khalid ne bayan kiya, un se Ikrima ne, un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) se Yaum-e-Nahr mein Mina mein masail pooche jate aur Aap (Sallallahu Alaihi Wasallam) farmate jate ke koi haraj nahi, ek shakhs ne poocha tha ke mein ne qurbani karne se pehle sar munda liya hai to Aap ne is ke jawab mein bhi yahi farmaya ke jao qurbani kar lo koi haraj nahi aur is ne ye bhi poocha ke mein ne kankariyan shaam hone ke baad hi maar li hain, to bhi Aap (Sallallahu Alaihi Wasallam) ne farmaya ke koi haraj nahi
.

Hum se Ismail ne bayan kiya, un se Malik ne Ibn-e-Shihaab ke waaste se bayan kiya, woh Esa bin Talha bin Ubaidullah se riwayat karte hain, woh Abdullah bin Amr bin Al-’Aas se naql karte hain ke Hajjat-ul-Wada’ mein Rasoolullah Sallallahu Alaihi Wasallam logon ke masaail daryaaft karne ki wajah se Minaa main thehar gaye. To ek shakhs aaya aur us ne kaha ke main ne bekhabri mein zabah karne se pehle sar munda liya. Aap Sallallahu Alaihi Wasallam ne farmaaya (ab) zabah kar le aur kuch harj nahi. Phir doosra aadmi aaya, us ne kaha ke main ne bekhabri mein Rami karne se pehle qurbani kar li. Aap Sallallahu Alaihi Wasallam ne farmaaya (ab) Rami kar le. (Aur pehle kar dene se) kuch harj nahi. Ibn-e-Amr kehte hain (us din) Aap Sallallahu Alaihi Wasallam se jis cheez ka bhi sawaal huwa, jo kisi ne aage aur peeche kar li thi. To Aap Sallallahu Alaihi Wasallam ne yahi farmaaya ke ab kar le aur kuch harj nahi.

Hum se Musa bin Ismail ne bayan kiya, un se Wuhaib ne, un se Ayyub ne ’Ikrimah ke waaste se naql kiya, woh Ibne-e-Abbas Radhiallahu Anhuma se riwayat karte hain ke Nabi Kareem Sallallahu Alaihi Wasallam se Aap ke (aakhiri) Hajj mein kisi ne poocha ke main ne rami karne (yani kankar phenkne) se pehle zabah kar liya, Aap Sallallahu Alaihi Wasallam ne haath se ishaara kiya (aur) farmaaya kuch harj nahi. Kisi ne kaha ke main ne zabah se pehle halq kara liya. Aap Sallallahu Alaihi Wasallam ne sar se ishaara farmaa diya ke kuch harj nahi.

Hum se Abu Nu’aim ne bayan kiya, unhon ne kaha ke hum se Abdul ’Aziz bin Abi Salamah ne Zohri ke waaste se riwayat kiya, unhon ne Esa bin Talha se, unhon ne Abdullah bin ’Amr se, woh kehte hain ke main ne Rasoolullah Sallallahu Alaihi Wasallam ko Rami-e-Jimaar ke waqt dekha Aap Sallallahu Alaihi Wasallam se poocha jaa raha tha to ek shakhs ne arz kiya, ya RasoolAllah! Main ne Rami se qabl qurbani kar li? Aap Sallallahu Alaihi Wasallam ne farmaaya (ab) Rami kar lo kuch harj nahi huwa. Doosre ne kaha, ya RasoolAllah! Main ne qurbani se pehle sar munda liya? Aap Sallallahu Alaihi Wasallam ne farmaaya (ab) qurbani kar lo kuch harj nahi. (Us waqt) jis cheez ke baare mein jo aage peeche ho gayi thi, Aap se poocha gaya, Aap Sallallahu Alaihi Wasallam ne yahi jawaab diya (ab) kar lo kuch harj nahi.

Hum se Muhammad Bin Abdullah Bin Haushab ne bayan kiya, un se Hushaim Bin Bashir ne bayan kiya, unhein Mansoor Bin Zazan ne khabar di, unhein Ata Bin Abi Rabah ne aur un se Ibn Abbas (Radi Allahu Anhuma) ne bayan kiya ke Rasul Allah (Sallallahu Alaihi Wasallam) se is shakhs ke bare mein poocha gaya jo qurbani ka janwar zabah karne se pehle hi sar mundwa le, to Aap (Sallallahu Alaihi Wasallam) ne farmaya koi qabahat nahi, koi qabahat nahi
.

Hum se Ahmad Bin Yunus ne bayan kiya, kaha hum ko Abu Bakr Bin Ayash ne khabar di, unhein Abdul Aziz Bin Rafiee ne, unhein Ata Bin Abi Rabah ne aur unhein Ibn Abbas (Radi Allahu Anhuma) ne ke ek aadmi ne Nabi Kareem (Sallallahu Alaihi Wasallam) se poocha ke Ya Rasul Allah! Rami se pehle mein ne tawaf-e-ziyarat kar liya, Nabi Kareem (Sallallahu Alaihi Wasallam) ne farmaya ke koi haraj nahi, phir is ne kaha aur Ya Rasul Allah! Qurbani karne se pehle mein ne sar mundwa liya, Aap (Sallallahu Alaihi Wasallam) ne farmaya koi haraj nahi, phir is ne kaha aur qurbani ko rami se bhi pehle kar liya Nabi Kareem (Sallallahu Alaihi Wasallam) ne phir bhi yahi farmaya ke koi haraj nahi. Aur Abdul Raheem Razi ne Ibn Khushaim se bayan kiya, kaha ke Ata ne khabar di aur unhein Ibn Abbas (Radi Allahu Anhuma) ne Nabi Kareem (Sallallahu Alaihi Wasallam) se aur Qasim Bin Yahya ne kaha ke mujh se Ibn Khushaim ne bayan kiya, un se Ata ne, un se Ibn Abbas (Radi Allahu Anhuma) ne Nabi Kareem (Sallallahu Alaihi Wasallam) se. Affan Bin Muslim Sighar ne kaha ke mera khayal hai ke Wuhaib Bin Khalid se riwayat hai ke Ibn Khushaim ne bayan kiya, un se Saeed Bin Jubair ne, un se Ibn Abbas (Radi Allahu Anhuma) ne Nabi Kareem (Sallallahu Alaihi Wasallam) se. Aur Hammad ne Qais Bin Saad aur Abbad Bin Mansoor se bayan kiya, un se Ata ne aur un se Jabir (Radi Allahu Anhu) ne unhon ne Nabi Kareem (Sallallahu Alaihi Wasallam) se riwayat kiya
.

Hum se Muhammad Bin Musanna ne bayan kiya, kaha hum se Abdul Ala ne bayan kiya, kaha hum se Khalid ne bayan kiya, un se Ikrima ne aur un se Ibn Abbas (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) se ek aadmi ne masla poocha ke shaam hone ke baad mein ne rami ki hai. Aap (Sallallahu Alaihi Wasallam) ne farmaya ke koi haraj nahi. Sa'il ne kaha ke qurbani karne se pehle mein ne sar munda liya, Nabi Kareem (Sallallahu Alaihi Wasallam) ne farmaya ke koi haraj nahi
.

Hum se Musa Bin Ismail ne bayan kiya, un se Wuhaib ne bayan kiya, un se Ibn Taoos ne bayan kiya, un se un ke baap ne aur un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) se qurbani karne, sar mundane, rami jamar karne aur un se aage peeche karne ke bare mein daryaft kiya gaya to Aap (Sallallahu Alaihi Wasallam) ne farmaya ke koi haraj nahi
.

Hum se Abdullah Bin Yusuf ne bayan kiya, kaha hum ko Imam Malik ne khabar di, unhein Ibn Shihab ne, unhein Isa Bin Talha ne, unhein Abdullah Bin Amr (Radi Allahu Anhuma) ne ke Nabi Kareem (Sallallahu Alaihi Wasallam) Hajjat-ul-Wida ke moqa par (apni sawari) par baithe hue thay aur log Aap (Sallallahu Alaihi Wasallam) se masail maloom kiye ja rahe thay. Ek shakhs ne kaha: Ya Rasul Allah! Mujh ko maloom na tha aur mein ne qurbani karne se pehle hi sar munda liya, Aap (Sallallahu Alaihi Wasallam) ne farmaya ab qurbani kar lo koi haraj nahi, doosra shakhs aaya aur bola: Ya Rasul Allah! Mujhe khayal na raha aur rami jamar se pehle hi mein ne qurbani kar di, Aap (Sallallahu Alaihi Wasallam) ne farmaya ab rami kar lo koi haraj nahi, is din Aap (Sallallahu Alaihi Wasallam) se jis cheez ke aage peeche karne ke mutaliq sawal hua Aap (Sallallahu Alaihi Wasallam) ne yahi farmaya ab kar lo koi haraj nahi
.

Hum se Ishaq ne bayan kiya, kaha ke humein Yaqub Bin Ibrahim ne khabar di, un se mere walid ne bayan kiya, un se Salih ne, un se Ibn Shihab ne aur un se Isa Bin Talha Bin Ubaidullah ne bayan kiya, unhon ne Abdullah Bin Amr Bin Aas (Radi Allahu Anhuma) se suna unhon ne batlaya ke Rasul Allah (Sallallahu Alaihi Wasallam) apne sawari par sawa raho kar thehre rahe phir poori hadees bayan ki. Is ki mutabiat Ma'mar ne Zuhri se riwayat kar ke ki hai
.

Hum se Usman bin al-Haysam ne bayan kiya ya hamase Muhammad bin Yahya Zhuhli ne Usman bin al-Haysam se bayan kiya , in se Ibn Jurayj ne kaha ke main ne Ibn Shihab se suna , kaha ke mujh se Esa bin Talha ne bayan kiya , in se Abdullah bin Amr bin al-Aas ne bayan kiya ke Nabi Karim salla Allahu alaihi wasallam (Hajjat-ul-Wada mein) qurbani ke din khutba de rahe thay ke ek sahabi khare huay aur arz kiya , ya Rasool Allah! Main falan falan arkan ko falan falan arkan se pehle khayal karta thu (is ghalati se un ko aage peeche ada kiya) is ke baad doosre sahab khare huay aur arz kiya: ya Rasool Allah! Main falan falan arkan e Hajj ke mutalliq yunhi khayal karta tha in ka isharah (halq , rami aur nahr) ki taraf thu . Nabi Karim salla Allahu alaihi wasallam ne farmaya ke yunhi kar lo (taqdeem wa takheer karne mein) aaj in mein se kisi kaam mein koi haraj nahi hai . Chunanche is din Nabi Karim salla Allahu alaihi wasallam se jis masla mein bhi poochha gaya to Aap salla Allahu alaihi wasallam ne yahi farmaya ke kar lo koi haraj nahi .

Hum se Ahmad bin Yunus ne bayan kiya , unhon ne kaha hum se Abu Bakr bin Ay-yash ne bayan kiya , in se Abd-ul-Aziz bin Rafee ne bayan kiya , in se Ata bin Abi Rabah ne bayan kiya aur in se Abdullah bin Abbas razi Allahu anhuma ne bayan kiya ke ek sahabi ne Nabi Karim salla Allahu alaihi wasallam se kaha , main ne rami karne se pehle tawaf e zhiyarat kar liya hai . Nabi Karim salla Allahu alaihi wasallam ne farmaya ke koi haraj nahi . Teesre ne kaha ke main ne rami karne se pehle hi zibah kar liya . Nabi Karim salla Allahu alaihi wasallam ne farmaya koi haraj nahi .