Hum se Abdullah Bin Yusuf ne bayan kiya, kaha hum ko Imam Malik ne khabar di, unhein Nafi ne, unhein Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne dua ki Aye Allah! Sar mundwane walon par raham farma! Sahaba (Radi Allahu Anhum) ne arz ki aur katarwane walon par? Nabi Kareem (Sallallahu Alaihi Wasallam) ne ab bhi dua ki Aye Allah sar mundwane walon par raham farma! Sahaba (Radi Allahu Anhum) ne phir arz ki aur katarwane walon par? Ab Aap (Sallallahu Alaihi Wasallam) ne farmaya aur katarwane walon par bhi, Laith ne kaha ke mujh se Nafi ne bayan kiya ke Nabi Kareem (Sallallahu Alaihi Wasallam) ne farmaya, Allah ne sar mundwane walon par raham kiya ek ya do martaba, unhon ne bayan kiya ke Ubaidullah ne kaha ke mujh se Nafi ne bayan kiya ke chauthi martaba Nabi Kareem (Sallallahu Alaihi Wasallam) ne farmaya tha ke katarwane walon par bhi
.

Hum se Ayash Bin Waleed ne bayan kiya, kaha hum se Muhammad Bin Fuzail ne bayan kiya, un se Amarah Bin Qaqaa ne bayan kiya, un se Abu Zur'ah ne aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne dua farmayi Aye Allah! Sar mundwane walon ki maghfirat farma! Sahaba (Radi Allahu Anhum) ne arz kiya aur katarwane walon ke liye bhi (yahi dua farmaiye) lekin Nabi Kareem (Sallallahu Alaihi Wasallam) ne is martaba bhi yahi farmaya Aye Allah! Sar mundwane walon ki maghfirat kar. Phir Sahaba (Radi Allahu Anhum) ne arz kiya aur katarwane walon ki bhi! Teesri martaba Nabi Kareem (Sallallahu Alaihi Wasallam) ne farmaya aur katarwane walon ki bhi maghfirat farma
.