Hum se Ali bin Abdullah bin Jafar ne byaan kiya , kaha ke hum se Jarir bin Abdul Hameed ne Mansoor se byaan kiya un se Mujahid ne , un se Ta'oos ne aur un se Ibn Abbas razi Allahu anhuma ne byaan kiya ke Rasool Allah salla Allahu alaihi wasallam ne fatah Makka par farmaya tha ke Allah Ta'ala ne is shehar (Makka) ko hurmat wala banaya hai (yani izzat di hai) pas is ke (darakhtoon ke) kaante tak bhi nahi kaate ja sakte yahan ke shikar bhi nahi hankaye ja sakte . Aur in ke alawa jo elaan kar ke (maalik tak puhanchane ka irada rakhte hon) koi shakhs yahan ki giri pari cheez bhi nahi utha sakta hai .

Hum se Abu-al-Numan ne bayan kiya, un se Thabit Bin Yazid ne bayan kiya, un se Abu-al-Rahman Ahwal Asim ne bayan kiya, aur un se Anas (Radi Allahu Anhu) ne ke Nabi Kareem (Sallallahu Alaihi Wasallam) ne farmaya Madinah Haram hai falan jagah se falan jagah tak (yani Jabal-e-Ayr se Thaur tak) is had mein koi darakht na kaata jaye na koi bidat ki jaye aur jis ne bhi yahan koi bidat nikali is par Allah Ta'ala aur tamam Malaika aur Insaanon ki lanat hai
.

Abu Musa (Muhammad Bin Musanna) ne bayan kiya ke hum se Hashim Bin Qasim ne bayan kiya, un se Ishaq Bin Said ne bayan kiya, un se un ke walid Said Bin Amr ne, un se Abu Hurairah (Radi Allahu Anhu) ne kaha ke is waqt tumhara kya haal hoga jab (jizya aur khiraj mein se) na tumhein dirham milega aur na dinar! Is par kisi ne kaha. Ke janab-e-Abu Hurairah (Radi Allahu Anhu) aap kaise samajhte hain ke aisa hoga? Abu Hurairah (Radi Allahu Anhu) ne kaha haan is zaat ki qasam! Jis ke hath mein Abu Hurairah ki jaan hai. Ye Sadiq-o-Masdooq (Sallallahu Alaihi Wasallam) ka farman hai. Logon ne pucha tha ke ye kaise ho jaye ga? To aap ne farmaya, jab ke Allah aur us ke Rasul ka ahd (Islami hukumat ghair-muslimon se un ki jaan-o-mal ki hifazat ke bare mein) toda jane lage, to Allah Ta'ala bhi zimmiyon ke dilon ko sakht kar dega. Aur wo jizya dena band kar dein ge (balki ladne ko mustaid honge)
.

Hum se Muhammad bin Abdullah bin Haushab ne byaan kiya ‘ kaha ke hum se Abdul Wahhab ne byaan kiya . Kaha hum se Khalid Hazza ne ‘ un se Ikrima ne ‘ un se Ibn Abbas razi Allahu anhuma ne ke Nabi Karim salla Allahu alaihi wasallam ne farmaya ke Allah Ta'ala ne Makkah ko haram kiya hai . Na mujh se pehle kisi ke liye (yahan qatl o khoon) halal tha aur na mere baad ho ga aur mere liye bhi thori der ke liye (Fatah Makkah ke din) halal hua tha . Pas na is ki ghaas ukhaari jaye na is ke darakht qalam kiye jayein . Na yahan ke jaanwaroon ko (shikaar ke liye) bhagaya jaye aur siwa is shakhs ke jo elaan karna chahta ho (ke yeh giri hui cheez kis ki hai) kisi ke liye wahan se koi giri hui cheez uthani jaiz nahin . Is par Abbas razi Allahu anhu ne kaha ”lekin is se Idhkhir ka istishna kar dijiye ke yeh hamare sunaroon ke aur hamari qabroon mein kaam aati hai .“ Aap salla Allahu alaihi wasallam ne farmaya ke magar Idhkhir ki ijazat hai . Abu Hurairah razi Allahu anhu ki Nabi Karim salla Allahu alaihi wasallam se riwayat mein hai . ”Hamari qabroon aur gharon ke liye .“ Aur Aban bin Salih ne byaan kiya ‘ un se Hasan bin Muslim ne ‘ un se Safiya bint Shaybah ne ke unhon ne Nabi Karim salla Allahu alaihi wasallam se isi tarah suna tha . Aur Mujahid ne Tawoos ke wasta se byaan kiya aur un se Ibn Abbas razi Allahu anhuma ne yeh alfaz byaan kiye . Hamare Qayn (loharoon) aur gharon ke liye (Idhkhir ukharna haram se) jaiz kar dijiye .