Hum se Abdullah bin Muhammad Musandi ne byaan kiya , kaha ke hum se Abu Asim Nabeel ne byaan kiya , kaha ke mujhe Ibn Juraij ne khabar di , kaha ke mujhe Amru bin Dinar ne khabar di , kaha ke maine Jabir bin Abdullah razi Allahu anhuma se suna , unhon ne byaan kiya ke (zamana-e-jahiliyat mein) jab Kaaba ki tameer hui to Nabi Karim salla Allahu alaihi wasallam aur Abbas razi Allahu anhu bhi patthar utha kar la rahe thay . Abbas razi Allahu anhu ne Nabi Karim salla Allahu alaihi wasallam se kaha ke apna tehband utaar kar kandhe par daal lo (taake patthar uthane mein takleef na ho) Nabi Karim salla Allahu alaihi wasallam ne aisa kiya to nange hote hi behosh ho kar Aap zameen par gir pare aur Aap ki aankhein aasman ki taraf lag gayin . Aap kehne lage mujhe mera tehband de do . Phir Aap salla Allahu alaihi wasallam ne usay mazboot baandh liya .

Hum se Matar bin Fazl ne bayan kiya unhon ne kaha hum se Rauh bin Ubadah ne bayan kiya, unhon ne kaha hum se Zakariya bin Ishaq ne bayan kiya, unhon ne kaha hum se Amr bin Dinar ne, unhon ne kaha ke main ne Jabir bin Abdullah Ansari Razi Allah Anhuma se suna, woh bayan karte thay ke Rasool Allah Sallallahu Alaihi Wasallam (nubuwwat se pehle) Kaaba ke liye Quraish ke sath patthar dho rahe thay. Is waqt Aap tehband bandhe hue thay. Aap Sallallahu Alaihi Wasallam ke chacha Abbas ne kaha ke bhatije kyun nahi tum tehband khol lete aur ise patthar ke neeche apne kandhe par rakh lete (taake tum par aasani ho jaye) Jabir ne kaha ke Aap Sallallahu Alaihi Wasallam ne tehband khol liya aur kandhe par rakh liya. Isi waqt ghashi kha kar gir pade. Is ke baad Aap kabhi nange nahi dekhe gaye. (Sallallahu Alaihi Wasallam)

Mujh se Mahmood Bin Ghailan ne bayan kiya, kaha hum se Abdur Razzaq ne bayan kiya, kaha ke mujhe Ibn Juraij ne khabar di, kaha ke mujhe Amr Bin Dinar ne khabar di, unhon ne Jabir Bin Abdullah Radi Allahu Anhuma se suna, unhon ne bayan kiya ke jab Kaabah ki tameer ho rahi thi to Nabi Kareem Sallallahu Alaihi Wasallam aur Abbas Radi Allahu Anhu is ke liye patthar dho rahe thay Abbas Radi Allahu Anhu ne Nabi Kareem Sallallahu Alaihi Wasallam se kaha apna tehband gardan par rakh lein is tarah patthar ki (kharash lagne se) bach jayein ge. Aap Sallallahu Alaihi Wasallam ne jab aisa kiya to aap zameen par gir pare aur aap ki nazar aasman par gar gayi jab hosh hua to aap ne chacha se farmaya ke mera tehband layein phir unhon ne aap ka tehband khoob mazboot baandh diya
.

Hum se Ubaidullah bin Musa ne Israel ke waaste se naql kiya, unhon ne Abu Ishaaq se Aswad ke waaste se bayan kiya, woh kehte hain ke mujh se Abdullah bin Zubair Radhiallahu Anhuma ne bayan kiya ke Aisha Radhiallahu Anha tum se bahut baatein chupa kar kehti thein, to kya tum se Ka’ba ke baare mein bhi kuch bayan kiya, main ne kaha (haan) mujh se unhon ne kaha ke Rasoolullah Sallallahu Alaihi Wasallam ne (ek martaba) irshaad farmaaya tha ke aye Aisha! Agar teri qaum (daur-e-jaahiliyyat ke saath) qareeb na hoti (balke puraani ho gayi hoti) Ibn-e-Zubair Radhiallahu Anhu ne kaha yani zamaana-e-kufr ke saath (qareeb na hoti) to main Ka’ba ko tod deta aur us ke liye do darwaaze bana deta. Ek darwaaze se log daakhil hote aur doosre darwaaze se bahar nikalte, (baad mein) Ibn-e-Zubair ne yeh kaam kiya.