Hum se Qutaibah bin Saeed ne byaan kiya , kaha ke hum se Hajjaj bin Muhammad Awar ne byaan kiya , un se Shubah ne , un se Amru bin Murrah ne , un se Saeed bin Musayyab ne ke Uthman aur Ali razi Allahu anhuma Usfan aaye to in mein baaham tamattu ke silsile mein ikhtilaf hua to Ali razi Allahu anhu ne farmaya ke jis ko Rasool Allah salla Allahu alaihi wasallam ne kiya hai us se Aap kyun rok rahe hain ? Is par Uthman razi Allahu anhu ne farmaya ke mujhe apne haal par rehne do . Yeh dekh kar Ali razi Allahu anhu ne Hajj aur Umrah dono ka ahram ek saath baandha .

Hum se Muhammad bin Bashar ne byaan kiya , unhon ne kaha ke hum se Ghundar ne byaan kiya , kaha ke hum se Shubah ne byaan kiya , un se Hakam ne , un se Ali bin Husain (Zain-ul-Abideen) ne aur un se Marwan bin Hakam ne byaan kiya ke Uthman aur Ali razi Allahu anhuma ko maine dekha hai . Uthman razi Allahu anhu Hajj aur Umrah ko ek saath ada karne se rokte thay lekin Ali razi Allahu anhu ne is ke bawajood dono ka ek saath ahram baandha aur kaha «labbaika bi-umratin wa-hajjatin» Aap ne farmaya tha ke main kisi ek shakhs ki baat par Rasool Allah salla Allahu alaihi wasallam ki hadees ko nahi chhor sakta .