Hum se Ismail bin Abdullah ne byaan kiya ‘ kaha ke mujh se Imam Malik rahmatullah alaihi ne Abul Zinad se byaan kiya ‘ un se Aaraj ne ‘ aur un se Abu Hurairah razi Allahu anhu ne ke Rasool Allah salla Allahu alaihi wasallam ne farmaya miskeen woh nahi hai jo logon ka chakkar kaatta phirta hai taake usay do ek luqma ya do ek khajoor mil jayein . Balke asli miskeen woh hai jis ke paas itna maal nahi ke woh is ke zariya se be-parwah ho jaye . Is haal mein bhi kisi ko maloom nahi ke koi usay sadqa hi dede aur na woh khud haath phailane ke liye uthta hai .

Hum se Hajjaj bin Minhal ne byaan kiya . Unhon ne kaha ke hum se Shubah ne byaan kiya . Unhon ne kaha ke mujhe Muhammad bin Ziyad ne khabar di unhon ne kaha ke maine Abu Hurairah razi Allahu anhu se suna ke Nabi Karim salla Allahu alaihi wasallam ne farmaya miskeen woh nahi jisay ek do luqme dar dar phiraayein . Miskeen to woh hai jis ke paas maal nahi . Lekin usay sawal se sharam aati hai aur woh logon se chimat kar nahi mangta (miskeen woh jo kamaye magar baqadar-e-zaroorat na pa sake) .

Hum se Saeed bin Abi Maryam ne byaan kiya , unhon ne kaha hum se Muhammad bin Jafar ne byaan kiya , unhon ne kaha ke mujh se Shareek bin Abi Namr ne byaan kiya , un se Ata bin Yasar aur Abdur Rahman bin Abi Amrah Ansari ne byaan kiya aur unhon ne kaha hum ne Abu Hurairah razi Allahu anhu se suna , unhon ne byaan kiya ke Nabi Karim salla Allahu alaihi wasallam ne farmaya ”Miskeen woh nahi hai jise ek ya do khajoor , ek ya do luqme dar ba dar liye phirein , balkay miskeen woh hai jo maangne se bachta rahe aur agar tum daleel chaho to (Quran se) is aayat ko parh lo «la yas'aloona-naasa ilhaafan» ke ”woh logon se chimat kar nahi maangte .“